Read Khiamniungan Naga Hong 5 Bible Online

Hong 5 - Khiamniungan Naga bible

Hong 5

¹Khaiunia tsak nian nou Anania naiuso apa tsammongnyiu Safira neüh lüko ngüne ün gohthang tsak jan.

²Apaüh amai nou ajantso apa tsammongnyiuüh lüko ngekü taiuwan, küta apoi nou kankü shikü hongthonhoi dongko taiu.

³Nungaih Peterüh sangkü ngiom, “Anania, Asio Onthso khako atsüotsüdekü chiteau, naiuso gohmai ajantso taiuwanau tiau Biya hau among mean-in?

⁴Nung mojankün khako ni ün noiküla; naiuso nung jankütün phiai ni nung tangka nou ni ün naito, tiau ni nungti chhiau thatsan? Ni khaiunia khako tsüde lüko Goa khako atsüotsüdekü chite-iu!”

⁵Tilai Ananiaüh nung ngio lula, apa nungko yaktaiukü loikü ean, naiuso nung lulatsün chikü thatü hat.

⁶Oumhoi nou shikü apa pem tsanloküta kankü khukü khanan.

⁷Gontao süme thatso noikütün phiai nung khako ti thawao nung tsüngekü apa tsammongnyiu nou sungh.

⁸Peterüh apatü sangkü ngiom, “Ajeüh goh nou nungtitsohe jan süne tsüde, ngütü angio?” Nungaih apaüh, “Ah, nungtitsohe jan” ta thalakü ngiom.

⁹Nai Peterüh nyiuhai noutü ngiom, “APAOU Onthso liluau titi thekü aje ngio jeiai-in? Athaplu, atsammongpo khantsünso koukhan dongko noin, naiuso ngüsoüh ni lüko kankü khu-e!”

¹⁰Nungailu apa dongko nung nyiuhai nou yaktaiukü ean. Naiuso nungko oumhoi nouso shikü, apa ekü epkü kankü saoküta apa tsammongpo khanthang shimkü khanan.

¹¹Amonglamhoi apem nung ngiolutsünso thatü hat.

¹²Hoi ongko hongthonhoi pha tsangkü ii naiuso athanga piakü chhisan, naiuso ngüso chikü mong tsak hau thekü Solomon tsamsuo ai noiküla.

¹³Lüko ngüsoko haau amaohai ongko sauüh tsümongsong, nungti lüko hoi nou ngüso mong losong-in.

¹⁴APAOU da monglamtsün nyiuhai naiuso pohaihoi piakü ngüsoko haove nai halut.

¹⁵Nungshioko Peter yanlükhun nai ngüso apa sohüh lüko ajantso sohjeiau thaiutha ngüsoüh akiahoi sonkeng nai niajikankü then naiuso sham chiai taiukiu.

¹⁶Naiuso loüh Yirusalem lemkü noksong nouso ainou khaiuniahoi nou akia nouso si angei onthso nou angjakü noinso aikü niakü shikü kamshi, küta ngüso khaiunia pungkü lomeikiu.

¹⁷Lüko Akhengteng Meson naiuso apako noinso Sadokihoi apem niokia mongkhem nou mean, nungtiphe ngüso tü pha poh au ngüsoüh thatsan.

¹⁸Ngüsoüh hongthonhoi nouso tü pha pohkü ngüso keloküta noksong nai apin akhutsamai khothio.

¹⁹Lüko APAOU aünhong nou asoh akhotsam kou soppankiukü ngüso niasankü ngiom,

²⁰“Asam khukü Amkham Tsam nai tsaküta khaiuniahoi nouso hau nung aa ayan thaiutha lüchite.”

²¹Hongthon nousoüh angiotsün angkü, ngüso Amkham tsamai sungküta atsandeau yalou. Akhengteng Meson naiuso apa haisoüh Yihuda petchehoi nouso apem akhengteng ngiokam kamau thaiutha jonkam, nungaih akhotsam ainou hongthon nouso ngüso khako nialokü shiau thaiutha ngüsoüh ngiokhem kiu.

²²Lüko kam petchehoi sauhai shin, ngüsoüh hongthonhoi nouso akhotsamai tsüep, küta laokü shikü ngiom,

²³“Samüh akhotsam meikü kiapkü ep, naiuso ajimtsünso kuokhanko tsakü noiküla, lüko tilai samüh kuo soppan, tsammongai sau tsüep!”

²⁴Tilai Akhengteng Meson nouso naiuso amkham tsam ehühoi nouso niakeitsün nou hongthon nouso tü ti thawaoküla nung lulan, nungko ngüso ngawan.

²⁵Lüko khaiunia tsaküh shikü apatü ngiom, “Anglu! asamüh akhotsamai lothiotsün khaiuniahoi nousoüh amkham tsamai tsakü hoi nouso hau tsandeji.!”

²⁶Nungai kam petchehoi nousoko petchehoi khu, naiuso hoi nousoüh lung yakkau hatkü ngüso tsümongmatkü nialokü shin.

²⁷Hongthonhoi nouso achosanhoi ngiokam kamtaiunai nialokü nap, küta ngüso khako tsa-i, nungaih akhengteng meson nou ngüso tü sangkü ngiom,

²⁸Apaüh ngiom, “samüh nung Khaiunia nou nianko tsütsandeau asam tü thatü mongkü ngiokhem kiuji.” “Lüko athaplu, asamüh ti chhin! Asamüh tsandetsün ngem nou Yirusalem meaniu, naiuso asamüh nung Khaiunia eantsün thaiutha aphio nou sam da sungiau aiuji.”

²⁹Lüko Peter naiuso hongthonhoi nousoüh thalakü ngiom, “Samüh khaiunia noukoto Goa ngiobao angau noin.

³⁰Yisu, sau asamüh paiphu tsak tü lalutkü loat, sam paosipo Goa nou apa ahkü shi-in.

³¹Apa nokpao naiuso aasantsün iulaau, naiuso Israelhai mongphokletsün naiuso angei wantsün kiuau thaiutha Goa nou apa uai noi-in.

³²Nung thaiutha sam mitha noin, Asio Onthso sau Goa nou apatü angio angtsünso hau kiu-iu, apa lüko mitha noin.”

³³Lüko tilai ngüsoüh nung lula, ngüso mongmat achiai sung, küta ngüsoüh hongthonhoi nouso loatau aiu.

³⁴Lüko Farisihai naiuso ngiokhem tsandetsün asong tsak nou naiuso khaiunia apemüh asuhatkü loutsün khaiunia tsak nian nou Gamaliel, apa ajeiaikam nai tsakü khaiuniahoi jam kengchiai soi-iau ngiom,

³⁵naiuso nungai apaüh achosanhoi noutü ngiom, “Israelhai, asamüh nung khaiunia nouso tü ti chhiji lütsüolo.

³⁶Tititenai kümi naiüh Tudaüh apa chija asong ta shankü tsalou, naiuso apako khaiunia haove tsom püle hoilut, naiuso apa phiai hoiluttsünso chikü penglükhun küta titso tsüiula.

³⁷Nungphiai Galilhai khaiunia tsak Yihuda nung niansattsün taoko shi, apa phiai khaiuniahoi asong tsak tailükhun, apa lüko loattan, naiuso apa phiai hoiluttsünso chikü pengkü khuwan.

³⁸Lo, nung asamtü ngioko, nung khaiunia nouso tü titso lakankei, küta ngüso nungti lütaiu! Tititenai ayangtsün naiuso chhi nung khaiunia ainou naito, nung mowane.

³⁹Lüko nung Goa ainou naito, asamüh ngüso mowaniau tsüshio-e, naiuso asambao Goa thako li-elatkü shithonane!” Ngüsoüh apatü ah, ta thalo.

⁴⁰Tilai petche nousoüh ngüso dongai hongthonhoi jon, ngüsoüh hongthonhoi ta shiuh, küta Yisu nianko tsüchiteau ngiokhem kiukü hongan.

⁴¹Nungtiphe Yisu nian thaiutha amiam epkühau tinkü veha nou shioko monglingkü ajeiaikam ainou ngüso punge.

⁴²Naiuso ajekhaiu tsütokü amkham tsamai si tsamai Yisu nung Khrista ta atsande naiuso achimtsün tsülao.