Read Khiamniungan Naga Hong 6 Bible Online

Hong 6 - Khiamniungan Naga bible

Hong 6

¹Atao intso shamküta, sahoi nouso haove nai shingkü khutsün tsülaokü iula, nungko Grik ngio ngiotsün Yihudahai si Ibri ngio ngiotsün Yihudahai tsüjeiaikü ali-e sungh. Grik ngio ngiotsün Yihudahai nousoüh asaita jimsiwoi suntsünko ngüso ün jihihoi nouso tsüpunghakü leanji ta ngiom.

²Nungtiphe honghoi chekü nime nousoüh amonglamhoi apem jonkam küta ngiom, Jimsiwoi tuh au chai kankeiyam paotsangtsün nou “samüh Goa Ngio chimtsün nung mongtsükiukü leanau ayam tsüde.

³Nungtiphe deisinioso, nian amei taiutsün, mongthat mongsai amei noitsün, naiuso Onthso nou meantsün, khaiunia chinyat sauhai samüh nung chhisiya nouso tü paotsangau shingsane, asam ongko lüyam.

⁴Lüko samüh thumkü kiukü misao saotsün naiuso achimtsün chhi nai sam atao wane.”

⁵Hongthonhoi nou ayang kiutsünko hoi athum mongling, nungtiphe ngüsoüh amonglam naiuso Asio Onthso nou meantsün khaiunia Stephan, Philip, Prokora, Nikanor, Timon, Parmena, naiuso Antiok hai don thetsün Nikola so shingsan.

⁶Hoi nou ngüso hongthonhoi nouso hau han, naiuso hongthonhoi nousoüh ngüso tü pha nou thangkü misaokiu.

⁷Naiuso Goa Ngio tsülaokü shingkü khutsünko Yirusalem nai lüko sahoi haove tsülaokü shingkü khu, naiuso mesonhoi apiatengüh nung amonglam nou loum.

⁸Goa nou ngeshikü oukkiutsün naiuso amonglam nou meankü noitsün khaiunia tsak nou Stephanüh Goa ii naiuso angawantsün chhi chhin.

⁹Lüko khaiuniatsüo hai kamthang ta jontsün nai mepemhoi, Kurini ainou Yihudahai naiuso Alekander ainouso mongthiokü khaiunia ajantsoüh apa tü khengshikü sung. Ngüso naiuso Kilikia khiamkhan si Asia ainou amao Yihudahai nousoüh Stephanko khengekü yachu.

¹⁰Lüko Stephan hau apa singionai mongthat mongsai Onthso nou kiuphe, ngüsoüh tsüshio.

¹¹Nungtiphe ngüsoüh khaiunia ajantso nekhem paopei kiukü taimeloküta, “Samüh apa Mosa si Goa thako chitetsün lukü noin!” ta ngio-i.

¹²Nungli ngüsoüh khaiuniahoi, petchehoi, naiuso Ngiokhem tsandetsünso mongmat sungikü taipek. Ngüsoüh Stephan thaloküta Ajeiaikam khako apa kankü shin.

¹³Nungaih ngüsoüh khaiunia ajantso apa thaiutha atsüotsüdekü mitha kiu-iau nialokü shin. Ngüsoüh ngiom, “Nung khaiunia,” nou “asaita sam asio Amkham Tsam naiuso Mosa Ngiokhem thako chiteji.

¹⁴Nung Nazarethai nou Yisuüh nung Amkham tsam lotheankü ta sam hau Mosa ainou shitsün saisile nouso apem li-eshi-e ta ngiokü samüh lulan!”

¹⁵Nung Ajeiaikam nouko moknoitsün chikü nou Stephan tü ngüso nioveiüh langlutkü thapnai apa kha hongthon tsak kha khekkü uokü ep.