Read Khiamniungan Naga Hong 8 Bible Online

Hong 8 - Khiamniungan Naga bible

Hong 8

¹Saulüh Stephan e-iau mongchiokü noiküla. Nung ajekhaiutengko Yirusalem nai donthehoi thatü thsüokü ajeiat sungh. Hongthon nousolu noikü amonglamhoi apem Yihuda naiuso Samariahai singtap apemai thappekkü pengkü khu.

²Nungko don nai mongkiutsün khaiunia ajantsoüh Stephan thaiutha sangh songkü vekü mongsaiu küta apa khanan.

³Lüko Saulüh tsam pungkü nai napküta amonglamhoi melo si menyiu tenkamkü akhotsamai thiokü donthe lothekiuau kowekü noiküla.

⁴Amonglamhoi pengkü khukü noinsoüh alumai Ngem Amei nou chimkü khu.

⁵Philip Samaria noknio ai saokü nungaih noitsün khaiuniahoi nousotü Khrista thaiutha ngüso tü chim.

⁶Tilai ngüsoüh Philipüh chitetsün lula, naiuso apaüh chhitsün ii nou ep, hoi nou mongkiukü apa tü ang.

⁷Tititenai angei onthso suntsün piakü ainou angei onthso nouso sangh asong nou vekü sungkhuwan. Akelakia suntsün naiuso chiune piakü lomeikiu.

⁸Nungaih nung noknio nouko amongling asong noiküla.

⁹Nung noknio nai Simon nian nou khaiunia tsak alonga chhitsün atao tsakko kihkü noiküla. Apa lüko asong tsak ta yang.

¹⁰Naiuso noknio nai noitsün pungkü, hoi amomo apem ainou apa tü mongkiukü ang. Ngüsoüh ngiom, “Oukong Asong ta ngiokü shitsün Goa oukong nou apa noin”

¹¹Ngüsoüh apatü ang, tiautenai atao laiukü aita apaüh apa alonga chhi nou ngüso ngawan-in.

¹²Lüko tilai Goa nokshing thaiutha Ngem Amei naiuso Yisu Khrista nian Philipüh chimtsün tü ngüsoüh monglam, ngüso pohai si nyiuhai limkiu.

¹³Simonüh lüko monglam naiuso limkiukü Philipko tsakei, nungai ii naiuso athanga asong chhitsün epkü apa ngawan.

¹⁴Tilai Yirusalem nai noitsün hongthonhoi nousoüh Samariahaiüh Goa Ngio nou lou-iu ta lulan, ngüsoüh Peter si Yohan ne ngüso dongai hong.

¹⁵Tilai ngüne shisaom, ngüneüh amonglamhoi nousoüh Asio Onthso loau thaiutha misao sao.

¹⁶Tititenai ngüso sau da tso Asio Onthso mosaokü ngüso APAOU Yisu niankolu limkiukü noiküla.

¹⁷Nungaih Peter si Yohan neüh ngüso chiai pha nou thang, nai ngüsoüh Asio Onthso lo.

¹⁸Hongthon hoi nousoüh ngüso pha amonglamhoi tü thangnai Asio Onthso kiutsün Simonüh ep. Nungtiphe apaüh Peter si Yohan nehau tangka,

¹⁹kiukü ngiom, “sauhai da ngü jüphaüh thange, apaüh Asio Onthso loaulümeikü nung oukong ngü hau lüko akiu.”

²⁰Lüko Peterüh thalakü apatü ngiom, “Ni naiuso atangka niko lümowan, tititenai Goa ün paopei tangka nou tuh au shio-e ta yangji!

²¹Sam chhi nouko ahaoson titso tsünoi, tiautenai amongpem nung Goa khako thakü tsünoi.

²²Nungtiphe apim angei ayang ainou mong lüphokle, küta nungti yangtsün thaiutha awankiu ta APAOU tü awan saokü misao lüsao.

²³Tititenai ni thatü thsüokü achinek naiuso angei nou kepokkü noin ta ngo epji.”

²⁴Simonüh Peter si Yohan netü ngiom, “Ni chitetsün ngiotsakühlu lüko ngü tü tsüshithawaokü hau APAOU noutü ni jüthaiutha misao asaokiu.”

²⁵Ngüsoüh ngüso mitha kiukü naiuso APAOU ngiongem chimkütün phiai, Peter naiuso Yohan Yirusalemai laokü khu. Ngüso khutsün yamko Samaria nok piakü nai ngüsoüh Ngem Amei nou chim.

²⁶APAOU aünhong tsaküh Philip tü ngiom, “Akhemlo, küta ajepekki nai Yirusalem ainou Gaza ai khutsün yam tü lüsao.” (Lonyi lühom nung yam ta tsükeishiji.)

²⁷Nai apa tsalokü khunai, Ithiopiahai menyiu nokpao tsamai jengtsaiu apem khaiuko asong thetsün nung Ithiopiahai nou ashantsün khaiunia sau asonghoi ongko atengting tsak apa meshen tsamai akhu noiküla.

²⁸Apa Yirusalemai Goa amkhamau khuküta meshen tsamkei ko noikü tsamai laokü shikü noiküla. Apa tsamkei nai noikü khu taoko apaüh E-po Isaia thsam ainou vekü noiküla.

²⁹Asio Onthso nou Philip tü ngiom, “nung tsamkei dongai khuküta apa shimkü lünoi.”

³⁰Philip apa dongai kopkü khunai apaüh E-po Isaia thsam ainou vetsün lula. Nungai Philipüh apa tü sangkü ngiom, “Ni vetsün nung ngelajimo?”

³¹Asonghai nou thalakü ngiom, “Khaiunia ajantsoüh ngü hau nung sasakü tsüchitekün lektsoto ngo nung titi thekü ngelaau shio-e?” Naiuso apaüh Philip tü tsamkei chiai apa shimkü sungkü amoknoita jon.

³²Apaüh vekü noitsün asiongio ahoi nou nung noiküla: “Aloat au kanlükhuntsün onnemok tsak khekkü apa noiküla, apon tippan taoko tsüshikü tsamkü noitsün onnemokthso tsak khekkü apaüh meshen sonkou sopkü ngiotsaktso tsüngio.

³³Apa lomiamkiu, naiuso ngiotsüo apen nou apa thaiutha tsüchhi. Sauühlünou apa thsaosithsoso thaiutha tsümonchite-e, tiautenai apa aakih goumchi ainou athon shi-iu.”

³⁴Nung ashantsün khaiunia nou Philip tü sangkü ngiom, “E-po nou sau thaiutha nung ngioji ngü hau achite? Apa thaiutha süne tsüdekünai khaiunia ajantso thaiutha nung ngioji?”

³⁵Nungai Philipüh nung asiongio ahoi ainou yalokü apa hau Yisu thaiutha Ngem Amei nou chiten.

³⁶Nungti ngüne saokü yamai tsakeikü noinai, ngüne khiam noitsün athang tsakai shisaom, nungai asong khaiunia nou ngiom,

³⁷“nungai khiam intso noin. Ngo khiam limkiutsün ainou akiap noi-emo?”

³⁸Nai asong khaiunia nou tsamkei nou laoau ngiom, naiuso Philip si ashantsün khaiunia ne haiu ai saokü Philipüh apa limkiu.

³⁹Tilai ngüne khiam ainou sung, APAOU Onthso nou Philip kankü khuwan. Nungko ashantsün khaiunia nou Philip tsüepshi, lüko apa meshen yamai amongling nou meankü laokü khu.

⁴⁰Lüko Philip Azota nai noikü ngesan, loüh apa Kaisarea nai khutsün ko noksong pungkü nai Ngem Amei nou chim.