Read Khiamniungan Naga Hong 9 Bible Online

Hong 9 - Khiamniungan Naga bible

Hong 9

¹Nung taoko Saulüh APAOU sahoi nouso thako alohat naiuso aloatau ngio kiupeng. Küta apa Akhengteng meson dongai khukü

²Damaska nai noitsün Yihuda kamthang nouso hau ayamhan kiuau thsamsat saom, nungaito apaüh APAOU sahoiso melo si menyiuhoi ajantso epnai keloküta ngüso Yirusalemai kankü shishiau thaiutha noiküla.

³Saul apa khutsünko Damaska noknio shimkü shisaonai, alekta awon tsak apa lemkü aün ainou thsalut.

⁴Apa goh ai salian, naiuso sangh tsaküh apatü ngiotsün lula, “Saul, Saul! Tiau ni ngü jeiatji?”

⁵“APAOU, ni sau?” ta apaüh sang. “Ni jeiat-itsün Yisu Ngo,” ta sangngem nou thashin.

⁶“Lüko atsa, küta noknio nai lünap, nungaih ni ti chhikü haulu noin nung ni tü ngio-e.”

⁷Saul ko hakü tsakeitsün khaiuniahoi nouso ti tsüngemkü tsa; ngüsoüh sangngem nou lulan lüko titso tsüep.

⁸Saul goh ainou tsaküchu küta apa niovei nou thaplunai titso epau tsüshio. Nungtiphe ngüsoüh apa pha nai heiloküta Damaska nai nialoukü nap.

⁹Samnyi chikü apa nioveiüh epau tsüshio, naiuso nungtaoko apaüh ehe lüko tsühe naiuso ashiu lüko tsüshiu.

¹⁰Damaska nai Anania ta niankü amonglam khaiunia tsak noiküla. Apaüh atsangshei tsak ep, nungko APAOU nou apatü ngiom, “Anania!” “Ngo nungai noin, APAOU” ta apaüh thala

¹¹APAOU nou apatü ngiom, “Lükhemlo, küta Yam Alu ta jontsün nai lükhu, naiuso Yihuda tsamai Tarsus ainou shitsün khaiunia tsak nian Saul thaiutha lüsang. Apaüh misao saoji,

¹²naiuso apaüh atsangshei tsak ko khaiunia tsak nian Anania ta niankü nou shikü apaüh epshiau thaiutha apa phaüh thangkü epiu.”

¹³Ananiaüh thalakü ngiom, “APAOU, khaiunia piakü nou nung khaiunia thaiutha Yirusalem nai akhaiuniaso tü thatü tsaokü chhitsün chite-iu.

¹⁴Naiuso ni tü amkhamtsünso apem keloau akhengteng mesonhoi ainou oukong lokü apa Damaska nai shikü noin.”

¹⁵APAOU nou apatü ngiom, “Lükhu, tiautenai ngü yathsüoau Ngo apa melemaohai, nokpaohoi, naiuso Israelhai hau jünian ngela-iau chosaniu.

¹⁶Naiuso Ngo apa jünian thaiutha ti chantso omheau noin nung apa tü hanne.”

¹⁷Nungtiphe Anania khukü, Saul noitsün tsamai napküta apa pha nou thangkü ngiom, “Deisinio Saul,” “APAOU Yisu, sau ni nungai shitsün taoko yamai nai adongai sungh, nung Yisu apa pemüh ngo hong. Ni müjam epshiau naiuso Asio Onthso nou meanau thaiutha apaüh ngo hong.”

¹⁸Alekta apa niovei ainou ngoulap kuttantsünli tsotsak salian, naiuso apaüh epau shiokü iula. Apa tsakü chu, küta khiamai limkiu;

¹⁹küta apaüh heshiukü phiai oukongkü shin. Damaska nai Saul amonglamhoi ajantsoko ajekhaiu intso noiha.

²⁰Apa saitha Yihuda kamthang nouso ai khuküta Yisu nung Goa Thso ta chimau yachu.

²¹Apa ngio lulatsünso apemüh ngakü ngiom, “Yirusalem nai Yisu tü amkhamtsünso loattsün nung khaiunia nou apa tsüdeso? Naiuso nung khaiunia nouso keloküta akhengteng mesonhoi nouso dongai kankü khuau shitsün apa tsüdeso?”

²²Lüko Saulüh chimtsün tekkü oukongkü iula, naiuso Yisu nung Khrista noiküla ta mitha kiutsün nou Damaska nai kihtsün Yihudahaiüh apa ngiotü thashiau tsüshio.

²³Ajekhaiu piakü yanlükhun küta Yihudahai aikü kamshikü ngüsoüh Saul loatau mongthat that,

²⁴lüko ngüso mongthat apaüh ngelakü noiküla. Nai apa loatau thaiutha ngüsoüh noknio bekhan nai anyi si asoh chikü jiokü noi.

²⁵Lüko sotso Saul sahoisoüh thsa tsak ko apa lokthioküta pephat yankü nialokü khu.

²⁶Saul Yirusalem ai shinai apa sahoi nousoko halutau kowe. Lüko ngüsoüh apa lüko sahoi tsak noin ta mongtsülam, naiuso ngüso apem apalun hatkü noiküla.

²⁷Nungaih Barnabaüh apa hongthonhoi nouso dongai nialokü shikü apa tü hachu. Naiuso Saulüh titi yamai nai APAOU phetekü ep naiuso APAOU nou apako titi chite nung ngüso hau sasakiu. Loüh Saulüh Damaska nai titi mongsongkü Yisu nianko chimkü noiküla nung lüko ngüso hau chiten.

²⁸Nungtiphe Saul ngüsoko noikü Yirusalem thapekkü APAOU nianko mongsongkü chimkü khu.

²⁹Loüh apa Grik ngio chitetsün Yihudahaiko lüko chitekü ngemat, lüko ngüsoüh apa loatau yamkü noiküla.

³⁰Tilai amonglamhoi nousoüh nung ngem thaiutha lula, ngüsoüh Saul Kaisarea ai nialokü khuküta Tarsas ai hongan.

³¹Nungtiphe Yihuda, Galil, naiuso samariahai goumchi apemai donthe nou nokmei tao tsaknai noiküla. Asio Onthso ahachu tsangkü APAOU hau asuhat kiutsün nai kihkü shitsünli donthe nou oukongkü naiuso haove nai shingkü khu.

³²Peter apemai tsakeikü khunai, atao tsak ko Luda nai lüko Goa ün khaiuniahoi sailuau apa khu.

³³Nungai apaüh Ainea ta niankü then ainou khuau tsüshiokü pon petjei akelakia nou kiatsün khaiunia tsak ep.

³⁴Peterüh apatü ngiom, “Ainea,” “Yisu Khristaüh ni lomeikiuji. Achu naiuso athen akanlo.” Alekta Ainea chu.

³⁵Nungaih Luda naiuso Sharon nai kihtsün khaiunia apemüh apa ep, küta ngüso APAOU dongai phokle.

³⁶Joba nai amonglamtsün nyiuhai tsak nian nou Tabitha noiküla. (Grik ngioko apa nian Dorka, alat nou “jinchai tsak”.) ta noiküla. Nung nyiuhai nou apa aakihlaiu chikü chhi amei naiuso angjahai tü hachu nai wan.

³⁷Nungtaoko apa akia noikü ean. Ngüsoüh apa meadang tsaowan küta asongthon tsampai nai taiu.

³⁸Jopa nung Luda ainou thatü laiukü jettekü tsüdekü noiküla, naiuso tilai Jopa nai noitsün amonglamhoi nousoüh Peter nung Luda nai noin ta lula, ngüsoüh apa dongai khaiunia nime ngiongem kankü hongkü ngiom, “Tsüojinyangkü sam dongai liukü ashi.”

³⁹Nungtiphe Peter khemloküta ngüsoko hakü khuha. Tilai apa shisaom, ngüsoüh apa tsampai asongthon nai nialokü sungh nai, Dorka apa aah noitsün taoko phakhut ateitham naiuso amatchai chiutsün apem apa hau hankü jihi nouso apem apa lemkü hoi asong tsak kamshin.

⁴⁰Peterüh ngüso chikü nung tsampai ainou kengchiai taiuwan, küta kaukü napkü misao sao; küta apa nung menyiu nou mea dongai sheikü shiküta ngiom, “Tabitha, achu!” Apaüh niovei sopsat nai tilai apaüh Peter ep, apa mokkü chunoi.

⁴¹Peterüh apa pha chinphukü apa tentsa. Küta apaüh amonglamhoi, jihi nouso apem hakü jonkam küta ngüso hau Tabitha aa kiushi.

⁴²Nung ngiongem nou Jopa thapekkü pengkü khu, naiuso khaiunia piakü nou APAOU da monglam.

⁴³Nungaih Peter Jopa nai khaiunia tsak nian nou Simon ta jonkü nyikhun shantsünko ajekhaiu piakü noi-an.