Read Khiamniungan Naga Rom 1 Bible Online

Rom 1 - Khiamniungan Naga bible

Rom 1

¹Goa Ngem Amei thaiutha pungekü taiukü hongthon tsak theau jonsantsün, Yisu Khrista tsamki Paul ainou.

²Asiongio nai satkü taiutsünli, nung Ngem Amei Goa nou apa ün E-pohoi tsangkü kümi thalou.

³Nung Ngem Amei Apa Thso thaiutha noin;

⁴Apa nyih nai David le tsangkü chet, naiuso Asio Onthso nou ee ainou ahkü shitsün nung Yisu Khrista sam APAOU Goa Thso noin ta, oukong nou ngiopengkiu.

⁵Khaiunia mele apem nou monglamau naiuso angio angtsün nai niasanau Goa tsangkü Khrista thaiutha hongthon tsak theau ngü tü atsüojin han.

⁶Nung tsangkü asam Rom nai noitsün Goa nou chosantsünso lüko hakü noin.

⁷Goa nou Rom nai noitsünso asiohoi theau tsüojinkü jontsün apem dongai: Sam Po Goa naiuso APAOU Yisu Khrista ainou asam dongai atsüojin naiuso aalo lüthe.

⁸Ayanai ngo Yisu Khrista tsangkü asam apem thaiutha Goa nian lomji, tititenai goumchi apemüh asam amonglam louji.

⁹Goa Thso sübao thaiutha Ngem Amei ngü jü mongpem apemüh chimkü yathsüoji, nung Goa nou ngü ngiotsün atsüo ta mitha kiuji. Ngü asam yangsanji ta Goa nou ngeji.

¹⁰Athon nai ngo jeikütso lüko Goa mongchiotsün nou asam dongai shisao-esao ta, misao nai asai kojaji.

¹¹Tititenai asam oulokongau thaiutha asam hau Onthso ouk kiuau ngo asamko pheteau yangji;

¹²nung ngio nou: atao tsakkolu jü amonglam tsangkü asam hachu naiuso asam amonglam tsangkü ngo hachu ta noin.

¹³Deisinioso, ngo melemaohai ongkoli asam ongko lüko mong phokletsün ajantso epau thaiutha piaküjam asam dongai shiau mongchiosan, lüko tso tsangkü losaokü tsükhukü noin.

¹⁴Angelahai si khaiunia saisile tsüsuntsünso naiuso angehai si tsüngekühai ne thaiutha ngo chailaiu noin.

¹⁵Nungtiphe ngü shiotsünlektso asam Rom nai noitsünso tü lüko Ngem Amei chimau khemlokü noin.

¹⁶Ngo Ngem Amei thaiutha tsümiam, tiautenai nung amonglamhoi apem ayanai Yihudahai, naiuso Melemaohai lüko kipsanau nou Goa oukong noin.

¹⁷Tititenai Goa nou khaiuniahoi apako titi pen-iji, nung Ngem Amei nou tsangsheikü hanji: nung aya ainou athon saokü amonglam tsangkü noin. Asiongio nou ngioji, “Khaiunia sau amonglam tsangkü Goa ko penkü noi-e, apa aa kih-e.”

¹⁸Goa amongmat, angei naiuso khaiuniahoi tsümeikün sauhai chhi tsümei tsangkü ngiotsüo achiai tsüsung-iji, nungso thako aün ainou tsangsheikü sungkü noin.

¹⁹Tititenai Goa thaiutha ti ngeau shio, nung ngüso ta atsangshei sungkü noin; Goa nou ngüso dongai atsangshei sung-i.

²⁰Goa nou goumchi shantao ainou, apa thaiutha niovei nou epau tsüshiokü noitsünso, apa athontsüyangkün oukong naiuso goa sakshi nemtso tsangsheikü ep, nungso Goa nou shantsün jengtsaiu nouso tsangkü epji. Nungtiphe nung thaiutha ti awankiu tsünoi-e.

²¹Ngüsoüh Goa ngelüko apa Goali ajin tsükha-i, tsüdekünai nianlom tsükiu, lüko ngüso ayangtsün nai yaang iula, naiuso ngüso mongpem akeng noitsün anyakhem nou miankü iula.

²²Ngüsoüh angehai ta ngioji, lüko ngüso maingahoi noin.

²³Tsümowankün Goa amkhamau liko, ngüsoüh khaiunia khekkü shantsün sotsom, waio, thainian, tsüdekünai paosisao amkhamji.

²⁴Nungshioko ngüso ongko meshen pem tsüvesan-iau thaiutha Goa nou ngüso mong abülom nou tsüsiokün hau thumkü kiuwan.

²⁵Tititenai ngüsoüh atsüotsüdekü nouko Goa ngiotsüo nou li-en, naiuso Ashantsün pem asai athontsüyang Amen, ta amtsün liko ashantaiu jengtsaiu tü amkham naiuso yathsüo.

²⁶Tiautenai ngüsoüh nung chhiphe, Goa nou ngüso amiam mongchiotsün hau thumkü kiuwan. Ngüso ongko nyiuhaiüh lüko momo saisile wankü sübao saisile tsüde nung kankei.

²⁷Nungtilu pohaiüh lüko nyiuhaiko saisile kankeitsün wankü, pohai tsaküh pohai tsakkolu amiam kankei naiuso ngüsoüh aphio mai ti epkü hau noin nung ep.

²⁸Ngüsoüh ngüso mongai Goa ngiotsüo taiuau tsüthalu nou shioko, Goa nou ayam tsüdekü nou chhi shanau thaiutha amiam tsülepkün angei hau ngüso thumkü kiuwan.

²⁹Ngüso tsüsiokün, tsümeikün, nioveikia, mongngei nou, achinek nou, khaiunia loattsün nou, ngem losantsün nou, laple naiuso achinyan nou mian;

³⁰ngüso akaongio chitetsünso, nianlochitsünso, Goa chinyantsün, tsüvesankün, abülom, mekoi, tsümeikün chhi yangtsünso, posinyiuhai angio tsü-angtsünso,

³¹tsüngesankün, athalu lotheantsünso, atsüojin saisile tsülepkünso, atsüojinyang tsünoikünso,

³²khaiunia sauhai nung saisile nai noiji, eau maikü noin ta Goa ngiokhem nou ngiotsün ngüsoüh ngen. Lüko ngüsoüh nungso kankeitsünlu tsüde, loüh nung kankeitsün khaiunia nousoko monglingeji.