Read Khiamniungan Naga Rom 10 Bible Online

Rom 10 - Khiamniungan Naga bible

Rom 10

¹Deisinioso, jü mongai Goa tü misao saotsün nung jü khaiunia kipsanau thaiutha nou noin!

²Tititenai Goa thaiutha ngüso thumkü mongchiotsün noin ta ngü ngüso thaiutha mitha kiuji; lüko ngüso thumkü mongchiotsün nou ngiotsüo ngetsün tsangkü tsüde.

³Ngüsoüh Goa nou khaiuniahoi apako titi pen-iji nung yam tsünge, naiuso nung likoto ngüsoüh ngüso chija amaoyam shanau kowe; nung thako Goa nou apako khaiunia penkiutsün khemai ngüso chija tsünap.

⁴Tititenai Khristaüh Ngiokhem nung athon kankü shin, nungtiphe Goa da monglamtsünso apem apako penkiuji.

⁵“Sauüh Ngiokhem ün asio nou chhi-e, apa nung khekkü aa kih-e.” Ta Mosaüh sat.

⁶Lüko amonglam tsangkü Goako pen-itsün thaiutha Asiongio nou ti ngioji nung noin: “Sau aün ai sunge? ta asamüh asam chija sangau tsünoi,” (nungühto Khrista lonyapanji).

⁷“Tsüdekünai sau athan tsüyangkün khan ai sao-e?” (nungti Khrista ee ainou niasanji).

⁸Nungüh nungti ngioji: “Goa Ngio nou ni shimkü, asontham naiuso amongai noin,” nung samüh chimtsün amonglam ngio noin.

⁹Tititenai ni asonthamüh Yisu APAOU ta thalunai, naiuso amongai Goa nou apa ee ainou ahkü shi-in ta monglam nai, ni kipsan-e.

¹⁰Tititenai asio iulaau thaiutha khaiunia nou mong nou monglamji, naiuso aasan epau thaiutha apaüh son nou thaluji.

¹¹Asiongio nou ngioji, “Sauhaiüh apa da monglam-e ngüso tsümiame.”

¹²Nungüh apem mongloji, tiautenai Yihudahai naiuso Melemaohai jetko ti amomo tsünoi; sauüh apa tü jon-e, apem phopkü oukkiuau Goa to apem hau APAOU wekü noin.

¹³Asiongio nai ngioji, “Sauhaiüh APAOU nianko ahalouau jon-e ngüso kipsan-e.”

¹⁴Naito sau da ngüsoüh tsümonglam apa tü titi jon-e? Naiuso sau thaiutha ngüsoüh tsülula, apa tü titi monglam-e? Naiuso achimtsün tsak tsünoikünai, ngüsoüh titi lula-e?

¹⁵Naiuso Ngem Amei kantsünso tsühongkünai Ngem Amei titi thekü chimau shio-e? Asiongio nai ngiotsünli, “Ngem Amei kankü shitsünso hok titi aleng amei!”

¹⁶Lüko amonglingau Ngem nou ngüso apemüh to tsümonglam. Tititenai Isaiaüh ngiom, “APAOU, sauüh sam Ngem tü monglam?”

¹⁷Nungtiphe amonglam nou alulatsün ainou shiji, naiuso alulatsün Khrista Ngio chimtsün ainou shiji.

¹⁸Lüko ngü sang: Ngüsoüh Ngem Amei atsüo tsülulaso? Ngüsoüh aluto lulan, -tititenai Asiongio nou ngioji; “Ngüso sangngem goumchi apemai khu-iu; ngüso ngio nousoüh goumchi athon sao-iu.”

¹⁹Loüh ngü sang: Israel haiüh tsüngela süne? Nungko ayating thalaau nou Mosa apa pem noin: “Ngo jü khaiuniaso niokia-iau mele tsak kankei-e; naiuso mainga mele tsak tsangkü ngo jü khaiuniaso mongmat-i-e.”

²⁰Naiuso Isaiaüh thatü mongsongkü ngioji, “Sauhaiüh ngo tsüyamküla, ngüsoüh ngo eplou-iu; sauhaiüh ngü tü tsüsangküla, ngüso khako ngo atsangshei sung.”

²¹Lüko apaüh Israel thaiutha ngioji, “Angio tsüangkün naiuso akhengshi khaiuniahoi monglingkü louao ajekhaiu pungkü ngo jüpha tsatphukü noin.”