Read Khiamniungan Naga Rom 11 Bible Online

Rom 11 - Khiamniungan Naga bible

Rom 11

¹Nungai ngü sang, Goa nou meshen khaiunia wanan süne? Nungti tilaitso tsüde! Tititenai ngü lüko Abraham le, Benjamin kau ainou Israelhai tsak noin.

²Goa nou sau ayating ainou chosantsün apa khaiuniaso tsüwanan. Elijaüh Goa tü Israel thako koja, nung Asiongio nai ti ahoiko ngioji asamüh ngeji:

³“APAOU, ngüsoüh ni ün E-po nouso loatküta, nitü amtsün athang nouso thaiutheaniu, naiuso ngolu poikü noin, loüh ngüsoüh jüpem aa lüko loatau koweji.”

⁴Lüko Goa nou apatü thalakü ngioji, “Ngo Jü thaiutha Baal sotsom khako tsükauthiokün khaiunia 7000 poitaiukü noin.”

⁵Lo lüko nungtilu noin: Goa nou apa atsüojin shioko nungai achosantsün ahoi tsak thsaothsaokü poikü noin.

⁶Apa achosantsün chhi to ngüso chhi ta tsüdekü apa atsüojin chiai noin. Tititenai Goa achosan chhi nou khaiunia chhi nou ta lu naito, nungaito apa atsüojin nung atsüoting atsüojin tsüde.

⁷Naito ti? Israel khaiunia nousoüh ti thaiutha yam nung tsüep? Goa nou chosantsün ahoi ehenthso noulu nung ep; apoi nouso Goa ajontsün ainou noukek iula.

⁸Nungti Asiongio nai satkü noin, “Goa nou ngüso hau Onthso tsüepau niovei tsütsüokü naiuso alulaau tsüshiokün nuokhan kiu, naiuso lonyi saokü nungti noin.”

⁹Naiuso Davidüh ngioji, “Ngüso sümai heshiutsünko ngüso lüthalo; ngüso loianküta angja lükiu!

¹⁰Ngüsoüh tsüepkü hau niovei lüpekki, naiuso ngüso om angja nou asaita lükaulüshi-i.”

¹¹Nai ngü sang: Tilai Yihudahai thekat, ngüso alothe nai mowan süne? Nungti tilaitso tsüde! Yihudahaiüh chaithe sunlophe ngüso da niokia-iau thaiutha aasan Melemao hai dongai shikü noin.

¹²Yihudahai chaithe nou goumchi dongai memei ouk kanjikan, naiuso ngüso onthso tsosilu tsangkü melemaohai dongai ouk asong kankü shin. Naito, tilai Yihudahai thumkü ha-e, nai titithatso ouk asongting noi-e.

¹³Lüko asam Melemaohai tü ngü ngioji, ngo Melemaohoi thaiutha hongthon noitsün lektso ngü monglengkü chhi-e.

¹⁴Tsüngean ngü jü khaiuniaso jü kau mongai niovei kia-ikü iulaau shio, naiuso nungai ngüso ajantso kipsanau shio-e.

¹⁵Tititenai tilai ngüso wanan, khaiuniale Goa dongai eh noitsün apa haimei iulan. Naito tilai ngüso lushin?, Nung ee nouso thaiutha aa noili-e!

¹⁶Ayating anelang themtsai Goa hau kiunai, naito themtsai apem nou lüko apa ün, naiuso pai eiu nouso Goa hau chaithio kiunaito, paikia nouso lüko apa ün noin.

¹⁷Eiu ai kihtaiutsün olip pai kia ajantso losanküta liutsa nai noitsün olip pai kia nung ta jiplut. Asam melemaohai nung liutsa nai noitsün olip paili noin, naiuso lo asam Yihudahai ongko aa nai haoson amei nai haji.

¹⁸Nungtiphe asamüh sauhai paikia nousoli lothean, ngüso tsülotsaoau noin. Asam titi bülomau shio-e? Asam paikia tsaklu noin; asamüh pai eiu nouso tü tsühachuji, lüko pai eiu nousoüh asam hachuji.

¹⁹Lüko asamüh ngio-e, “Ah, lüko jü thaiutha tsampai shanau paikia nouso lotheaniu.”

²⁰Nung atsüo noin, ngüsoüh tsümonglam shioko ngüso lothean, asam ti athang ai noin nung tiautenai asamüh tsümonglam. Lüko ahatau nou liko; nung thaiutha labülom.

²¹Goa nou Yihudahai sauhai paipem da noitsün akia noiküla, ngüso tsüpoitaiushi; naito apaüh asam poitaiu-e ta yangjiso?

²²Nungtiphe nungai Goa amongmei naiuso ahatsün athaplu: aloiantsün thaiutha ahating, lüko ni Goa amongmei nai tsülaokü noinai, athaiutha apa mongmei nou noi-e, ni lüko Goa ko tsünoikünaito he-an-e.

²³Yihudahaiüh ngüso mongtsülamkü noitsün ainou mong phoklenaito, ngü aya nai noitsün athang nai taiushi-e, tiautenai Goa nou shiokü noin.

²⁴Tititenai liutsa olip pai tsak ainou ni hesan nai, naiuso sai tsüdekünli olip pai amei nai ni noilutnai, nungai paipem da noitsün akia nouso meshen olip pai nai titithekü noilutkiu-e?

²⁵Jü deisinioso, ngü asam hau nge-iau aiutsün nungai akau ngiotsüo tsak noin, tititenai nungüh asam titi mongthat amei ta yangtsün ainou pungekü noi-iau thaiutha noin. Israel khaiunia mongkongkü iulatsün nung asaita hau tsüde, lüko Melemaohai apem Goa dongai moshikünko yangkülu noi-e.

²⁶Nungti Israelhoi apem kipsan-e: Asiongio nou ngioji, “Akipsantsün Zion ainou shi-e küta Yakob thsaosithsoso ong ainou tsümeikün apem lowan-e.

²⁷Tilai ngo ngüso chaithe nouso kanlükhune, ngo nung athalou-e ngüsoko shan-e.”

²⁸Ngem Amei asamüh wanan nou shioko Yihudahai asam Melemaohai thaiutha Goa eh nouso noin. Lüko Goa nou ngüso paosiposo shingsantsün tsangkü ngüso apa haimei noin.

²⁹Tititenai Goa nou apaüh sauhai chosanji naiuso oukkiuji, nung thaiutha apa mong tsüli-eshiji.

³⁰Tititenai asamüh kümi Goa tü angio tsüang, lüko lo Yihudahaiüh angio tsüangkün nou asamüh atsüojinyang ep;

³¹nungti asam tü hantsün atsüojinyang nou lo ngüso lüko atsüojinyang epau thaiutha angio tsüangkün noin.

³²Tititenai Goa nou apem tü atsüojinyang hanau thaiutha apem angio tsüangkün nai kiaptaiu.

³³Goa ün memei titi asong noin! Apa mongthat mongsai naiuso angetsün titithatso aokü noin! Apaüh thatsantsün sauüh sasakiuau shio-e? Apa yam nouso sauüh ngelaau shio-e?

³⁴Asiongio nou ngiotsünli, “Sauüh APAOU mong ngeji? Apa hau ayamhanau sauüh shioji?

³⁵Apaüh laokü kiushiau lümeikü, sauüh tilai apa hau alum kiuwan?”

³⁶Tititenai apem apa tsangkü shan, naiuso apem apa thaiutha apa tsangkü aa noi. Goa tü athontsüyang ajinka lüthe! Amen.