Read Khiamniungan Naga Rom 12 Bible Online

Rom 12 - Khiamniungan Naga bible

Rom 12

¹Nungtiphe deisinioso, asamüh Goa chhi nai apa mong lengikü thumkü chaithio tsakli lükiu ta apa atsüojinyang asong noitsün shioko ngo kojaji. Nung asam amkham atsüoting nou noin.

²Asam nung goumchi sai nouko lanoi, lüko mong thumkü li-eshitsün tsangkü asam mongpem Goa hau ayan lüshan-i. Naito ti amei, apa tiüh mong leng-iji, naiuso thapemji nung Goa mongchiotsün asamüh ngeau shio-e.

³Tiautenai ngü hau Goa nou atsüojin paopei kiu nou shioko ngü asam pungkü tü ngioji: Ayangheau nou tü simkü asamüh meshen thaiuthalu thatü layang. Nunglikoto, asam mongyang nai lütsamlo, naiuso Goa nou amonglam asam hau kiutsün likü meshen chija lüyanglu.

⁴Tiautenai titi pem tsak nouko oujei piakü noin, naiuso oujei chhi nou apem wekü tsüde,

⁵nungti sam piakü noilüko, sam Khrista nai pem tsak noin, naiuso khaiunia pungkü tsaküh tsak ko oujei iulakü noin.

⁶Sam hau atsüojin likü paopei kiutsün amomophe, Khapiam ngio paopei naito, samüh amonglam likü khapiam ngio chiteko.

⁷Ayathsüotsün paopei naito, samüh ayathsüotsün nai thumkü kiuko, sauüh chimji, apaüh lüchim; tsüdekünai sauüh lotsüoji, apaüh lülotsüo.

⁸Sauüh kiuji, apaüh mongchiokü lükiu, sauüh nok shingji, apaüh tsüokü lüshing; sauüh atsüojinyang hanji, apaüh monglingkü lühan.

⁹Atsüojin asong lünoi; sübao tsümei nung lüchinyan; sübao amei nung lüpiplo.

¹⁰Amonglam deisiniosoli tsaküh tsak thatü meikü lütsüojine; naiuso asuhat kiutsün nai tsaküh tsak chen ta lüyang.

¹¹Kongkü lüchhi naiuso cholakkü lanoi. Mong athum kiukü APAOU lüyathsüo.

¹²Ni nou ayangtaiuüh ni monglingkü lünoi-i, angja omhe nai lamonghen, naiuso atao pungkü misao lüsao.

¹³Donthehoi poukü noitsün nai lükiu, mesanhai tü atsüojin lühan.

¹⁴Asam angja-itsünso thaiutha Goa tü misao nai lükankiu, ah, athesan tsüdekü ouk lükiu ta lüsaokiu.

¹⁵Amonglingtsünso ko lümonglinge, sauhai shapji ngüsoko aikü lüshap ha.

¹⁶Khaiunia pungkü thaiutha ayangkiutsün wekü lütaiu. Asam labülom, lüko anyaoteng chhisiya nouso mongchiokü lülo. Asam meshen chija mongthat mongsai noin ta layang.

¹⁷Sauhaulünou tsümei liko tsümeikün lakiushi. Khaiunia apem khako ti ngiotsüo noin, nung chhiau mongthat lütaiu.

¹⁸Shionaito, nito khaiunia apemko nokmei nai lünoi.

¹⁹Atsüojintsünso, asam chija phaosan lasan, lüko Goa mongmat sungtsün taiukü lünoi, tititenai Asiongio nai nungti satkü taim, APAOU nou ngioji, “Phaosan nou ngü ün, ngü laokü kiushi-e.”

²⁰Nunglikoto Asiongio nou ngiotsünli, “Asam eh naiunai lütsad, apa khiam nou lenai ashiuau lükiu; tititenai nung chhitsün tsangkü ngüso thatü miamat-e.”

²¹Tsümeikün hau asam lashiolowan-i; lüko, tsümeikün amei nou lüshiolo.