Read Khiamniungan Naga Rom 13 Bible Online

Rom 13 - Khiamniungan Naga bible

Rom 13

¹Khaiunia pungkü nokpao nokshinghoi khemai lünoi, tiautenai Goa ün ayamhan tsühakü ti oukong lünou noiau tsüshio, naiuso lo ti nokpao nokshing noin nung Goa noulu kiutaim.

²Nungtiphe sauüh nung aniakeitsün thako tsa-e, apa Goa nou shingsantsün thako tsaji. Naiuso sauhai nung thako tsaji, ngüso chija mikhemtsün eppe.

³Tititenai nokshinghoi chhi amei chhitsünso thaiutha ahatau tsünoi, lüko chhi tsümeikü chhitsünso ahatau noin. Naiuso ni nokshingso tsühatkü noiau aiuji süne? Ti amei nung lüchhi, naito ni apa ainou nianlom eppe.

⁴Tititenai athaiutha Goa ainou ayathsüotsün apa tsak noin. Lüko ni ti tsümei nung chhinai, lühat. Tititenai yaang nai apa salaiu tsükankeiji, tiautenai apa Goa ainou ayathsüotsün tsak noin, chhi tsümeikü chhitsünso ta Goa aluhat chhitsün apa noin.

⁵Nungtiphe amongmat hattsün thaiuthalu tsüde, lüko asam ngelatsün tsangkü asamüh aniakeitsün khemai lünoi.

⁶Nung tsangkü asamüh liukim lüko kiuji; naiuso ngüsoüh ngüso chhi chhitsün lektso Goa yathsüoji.

⁷Sauhai hau ti kiuau noin ngüso hau lükiu; liukim kiuau noitsün hau liukim lükiu, amai kiuau noitsün hau amai lükiu, sau tü hatau noin apa tü lühat, naiuso sau tü asuhatau noin apa tü asu lühat.

⁸Tsaküh tsak tü tsüojineau nou tü simkü sau tü chailaiu la-iula. Tititenai sauüh meshen phaohai tsüojinji, apaüh Ngiokhem thawaoiji.

⁹Ngiokhem nouso: ajisiwop lakankei; laloat; lakau; me ün ta lachinek; nungso naiuso nung chiai nouso: Ngiokhem tsakkolu kamkü noin: “Ni aphaohai tü meshen tsüojintsünli lütsüojin.”

¹⁰Atsüojin nou phaohai tü ti tsümeikü tsüchhiji, nungtiphe atsüojin nou Ngiokhem thawao-iji.

¹¹Naiuso lo asailatsün ainou thsümonau atao shisao-iu ta asamüh nung alat ataothat ngen. Tititenai samüh aya monglamtsün tü lo aasan nou sam tekkü shimkü noin.

¹²Anyakhem nou laiukü yananiu, naiuso awon shikü noin. Nungtiphe samüh anyakhem chhisiya leanko; naiuso awon ehli li-etsün sheitho thouloko.

¹³Samüh awon naili ngiotsüo thekü tsakeiko; haikam naiuso thengtok nai tsüde, nyih nou aiutsün naiuso abülom nai tsüde, alihetsün naiuso aluao tsüaiukün nai tsüde.

¹⁴Lüko asamüh APAOU Yisu Khrista sheitho lüthoulo, naiuso nyih nou aiutsün shithawao-iau thaiutha layang.