Read Khiamniungan Naga Rom 14 Bible Online

Rom 14 - Khiamniungan Naga bible

Rom 14

¹Sau amonglam nai outsükong asamüh apa lülo, lüko ngio tsüjeiaikü ngematau thaiutha tsüde.

²Khaiunia tsaküh tilünou heau amonglam taim, lüko sau outsükong apaüh sünga nou heji.

³Khaiunia sauüh eheshiu alum heji nung tsühekün khaiunia nou apa tsülotsaoau noin; loüh khaiunia sauüh sünga lu heji, apaüh alum heshiutsün khaiunia chiai mikhem tsükiuau noin; tititenai Goa nou apa lo-iu.

⁴Loüh amaohai ayathsüotsün chiai mi yamau ni sau? Apaüh ashio ep si tsüep nung janeau apa ün tengkhaiu APAOU noin. Naiuso apaüh shio-e, tiautenai APAOU nou apa ashio-iau shankiu.

⁵Khaiunia tsaküh ajekhaiu tsak nou tüto amao ajekhaiu tsak meijeng ta yangji, amao khaiunia tsaküh ajekhaiu apem khek-ekü noin ta yangji. Khaiunia pungkü nou meshen mongai sasakü yangtaiuau noin.

⁶Sauüh ajekhaiu nou asio ta veji, apaüh nung APAOU asu hatji, naiuso sauüh heji, apaüh nung APAOU asu hatji, tititenai eheshiu thaiutha apaüh Goa hau nianlom kiuji. Naiuso sauüh tsüheji, apaüh Goa nian lomsanji.

⁷Tititenai sam sauüh meshen thaiutha aa tsükihji, naiuso meshen thaiutha tsü-eji.

⁸Tititenai sam aa noi nai, sam APAOU thaiutha aa noiji, naiuso sam ee nai APAOU thaiutha eji. Nungtiphe sam e lüko, tsüdekünai aa noi lüko, sam APAOU ün.

⁹Tititenai ee nou si aa noinso khako APAOU iulaau Khrista en küta ahkü shin.

¹⁰Naito asam süngalu hetsünsoüh tiauta asam deisinioso lotsaoji? Tititenai asam chikü Goa mikhem nou khako tsa-e.

¹¹Tititenai nungti Asiongio nai satkü taim, “Khaiunia pungkü nou jü khako kau-e, naiuso khaiunia pungkü nou ngo Goa ta thalou-e, nung Ngo atsüoting aa Goa ta APAOU nou ngioji.”

¹²Nungtiphe sam khaiunia pungkü nou meshen mi Goa hau chite-e.

¹³Nungtiphe samüh haisihai mi yamtsün laoloko. Nungliko, asamüh meshen deisinio thekattsün tsüdekünai chaithe suntsün nai salitsün chhi titso tsüchhiau thalouko.

¹⁴Ngü APAOU Yisu da monglamtsün tsangkü meshen chija jengtsaiu titso tsüsiokü tsünoi, lüko samüh ti jengtsaiu tsüsio ta yangji, apa thaiutha nung tsüsiokün ta ngen.

¹⁵Ni tso heshiutsün tsangkü meshen deisinio amonglam lothenai, naito ni atsüojin tsangkü ti tsüchhiji. Ni heshiutsün chih nou Khrista sau thaiutha saukü en apa amonglam lalothekiu!

¹⁶Asamüh ti-in mein ta yangji nung nian lalothe.

¹⁷Tititenai Goa nokshing nouto eheau tsüdekünai ashiuau tsüde, lüko Asio Onthso nou kiutsün asio, aalo, naiuso amongling noin.

¹⁸Tititenai sauüh nungko Khrista yathsüoji, apaüh Goa mongtsam-iji, naiuso khaiunia khako lüko amei noin.

¹⁹Nungtiphe ti-in nou aalo sung-iji, naiuso ti-in nou tsaküh tsak sakshinai oukong-iji, samüh nungso kankeiko.

²⁰Eheshiu thaiutha Goa chhi lalothean. Eheshiu apem heau shio-e. Lüko eheshiu ajantso tsangkü khaiunia ajantso chaithe sun-inai nungto aphio noin.

²¹Nyih hetsün lüko, theng shiutsün lüko, naiuso ti-in nou adeisinio amonglam lothe-iji nungso tsüchhikünai mei.

²²Naito, ni nung chhi thaiutha ti amonglam noin, nung ni naiuso Goa jetko lütaiu. Tilai khaiunia tsaküh meshen chhi nai thakü lusanji, naiuso apa chhi nai ti aphio mongyang tsüshiji, nung khaiunia thaiumei!

²³Lüko henyinyikü henai apa phio-iji, nung Goa nou apa hau aphio kiuji, tititenai apaüh amonglam nou tsühe, naiuso tilüsong amonglam tsangkü tsüde nung angei.