Read Khiamniungan Naga Rom 2 Bible Online

Rom 2 - Khiamniungan Naga bible

Rom 2

¹Oh khaiunia, ngio mikhem kiutsün ni saulünou, ni athalaau tsütaiu. Tititenai amaohai mi khemnai ni achija aphio sunloji, tititenai ni mikhem kiutsün ko ni wekülu.

²Nungso kankeitsün thaiutha Goa nou ngiotsüo noulu mikhem kiuji ta samüh ngen.

³Oh Khaiunia, ni sauüh nungso kankeitsünso mikhem kiuji, naiuso ni wekü kankeiji, ni Goa mikhem kiutsün ainou thakhu-e ta yangjiso?

⁴Tsüdekünai tsüngean, asamüh apa atsüojinyang asong, ajeilotsün naiuso akiplotsün tsüvesan. Atsüoting asamüh Goa to atsüojin ta ngen, tititenai apaüh asam mongphokleiau koweji.

⁵Lüko mong tsüphoklekü kongtsün yangkü, Goa nou tilai apa asio mikhemtsün naiuso mongmat sungtsün achiai sunge, nung ajekhaiu thaiutha ni meshen thako mongmat sungtsün singtaiuji.

⁶Apaüh khaiunia pungkü hau meshen chhi yangkü amai laokü kiu-e.

⁷Sauhaiüh akiplo nou amei chhitsün nai ajinka, nianlom naiuso tsümowankü nou yamji, ngüso hau apaüh asai aa nou kiu-e.

⁸Sauhaiüh tsüthakün phiai hoilutau thaipup, naiuso atha nou leanji, Goa nou apa mongmattsün ngüso thako taiukiu-e.

⁹Tsümeikü chhitsün khaiunia pungkü dongai, aya Yihudahai dongai naiuso Melemaohai dongai lüko apaüh angja omhe naiuso ajeiat hong-e.

¹⁰Lüko amei chhitsün khaiunia pungkü dongai, aya Yihudahai naiuso Melemaohai hau lüko meshen ajinka, nianlom naiuso a-alu kiu-e.

¹¹Tititenai Goa nou phaphi phamong tsükankeiji.

¹²Melemaohaiüh lüko Mosa Ngiokhem taim, ngüsoüh angei sunlo-iu naiuso Ngiokhem ainou pungekü noin. Yihudahaiüh Ngiokhem nou taim; ngüsoüh angei sunlo naiuso ngüso ngiokhem nou mi khem-e.

¹³Tititenai Goa khako ngiokhem lulatsünso tsüpenkiuji, lüko ngiokhem kankeitsünso penkiuji.

¹⁴Melemao haiüh ngiokhem tsütaiu, lüko ngüsoüh ngiokhem nou thoiluttsün chhiau koweji, nai ngüso meshen thaiutha ngiokhem iulaji.

¹⁵Ngüso saisile nou ti ngiokhem nou thoiluttsün ngüso mongpemai sattaim nung hanji, ngüso mongpem nou lüko nung atsüo ta mitha hanji, naiuso ngüso ayangtsün nou lüko jam phio-iji naiuso jam tsüphio-iji.

¹⁶Tilai Goa nou Yisu Khrista Ngem Ameili khaiunia akaungio nouso mikhem kiu-e, nung ajekhaiu nai ngiokhem kankeitsünso penkiu-e.

¹⁷Asam thaiutha ti? Asamüh asam chija Yihudahai ta ngioji, asamüh Goa thaiutha ngiokhem tü monglamkü bülomji;

¹⁸Goa nou asam hau ti chhi-iau aiuji asamüh ngen, naiuso ngiokhem ainou sübao asio noin nung choloau asamüh ngelu-iu;

¹⁹anyakhem nai noinso thaiutha awon naiuso niopek hoi thaiutha yamnia,

²⁰maingahai thaiutha ayamhantsün, naiuso tsüngekün khaiunia thaiutha atsandetsün, tsak nou asam noin ta asamüh ngen. Asamüh ngiokhem nai ange naiuso ngiotsüo apem noin ta ngen.

²¹Nungai ni sauüh amaohai hau tsandeji, ni achija lüko tsütsandelojiso? Ni khaiunia tsak tü “tsükau-e ta chimküta ni kaujiso?”

²²Ni khaiunia tsak tü tsüjisiwopau ngioji, ni jisiwopjiso?” Ni sotsom nouso chinyan nai, amkhamtsün nai taiu nou jengtsaiu aplojiso?

²³Ni Goa ngiokhem nai bülomji, lüko ni ngiokhem lothekü Goa asu tsühatso?

²⁴Tititenai Asiongio nai satkü taimli, “Asam Yihudahai shiokolu Melemaohai ongko Goa nian lochiji.”

²⁵Ni Ngiokhem kankeitsün tsak naito, atippantsün atsüoting alesan noin, lüko ni Ngiokhem lothetsün tsak naito, atippantsün nung tsütippankü haili iulakü noin.

²⁶Tsütippankün Melemao haiüh Ngiokhem nai noitsün kankeinai, Goa nou atippantsünlilu tsüsan-e süne?

²⁷Asam Yihudahaiüh Ngiokhem lothe nou shioko Melemaohai tsangkü asam phio-i-e, asam tippankü naiuso Ngiokhem satkü taiu lüko, ngüso nyih nai tsütippan, lüko ngüsoüh Ngiokhem nou angio ang.

²⁸Apem chiko tippankü noitsün atsüoting Yihudahai nou nung sau? Yihudahai naito sau nyih nai tippan, nung khaiunia nou tsüde.

²⁹Sau akheiai Yihudahai, apabao atsüoting noin, naiuso atippantsün nung satkü taiutsün Ngiokhem nai tsüde, lüko nung mongpem nai Goa Onthso chhi noin. Nungtin khaiunia nou nianlom khaiunia ainou tsüde, lüko Goa ainou epji.