Read Khiamniungan Naga Rom 3 Bible Online

Rom 3 - Khiamniungan Naga bible

Rom 3

¹Naito Melemaohai tü Yihudahai ti amothi noin? Tsüdekünai atippantsün alesan ti noin?

²Apemai piakü ayating nai Goa nou ngüso hau Akeng Asio Thsamlai nou kiu.

³Tititenai ajantsoüh tsümonglam nai ti noin? Ngüso tsümonglamkü nou Goa monglamtsün yaang iula-e süne?

⁴Nungti tilaitso tsüde! Khaiunia pungkü ngiotsüo tsüdekü noi lüko, Goa to ngiotsüo noin. Asiongio nou ngiotsünli, “Ni ngio chitetsün taoko ni thakü noin ta hanau noin; ni lilutsün taoko ni penkü noin ta hanau noin.”

⁵Lüko sam tsüsiokü nou Goa asio lomkü chitenai, samüh ti ngio-e? Goa nou tsüthakün lohatnai, apa tsüshiokü noin süne? (Asaitha nou nungti sangau shiom.)

⁶Nungti tilaitso tsüde! Nungti naito, Goa nou titi goumchi mikhem kiu-e?

⁷Lüko jü ngio atsüotsüdekün tsangkü Goa ngiotsüo nou apa hau ajinka kiunai ngo tiau loüh chaithe khaiunia tsakli mikhem kiu-e?

⁸Naito, “asamüh amei sungau thaiutha tsümeikü chhiko” ta tiau tsüngioji? Khaiunia ajantsoüh nung ngio nou ngiotsün thaiutha atsüoting ngü hau aphio kiukü lochilotsaoji! Ngüso aphiolilu ngüso lotsao-e.

⁹Naito ti? Melemaohai konaito sam Yihudahai aküo meijeng süne? Tsüde, nung tilaitso tsüde! Yihudahai naiuso Melemaohai nemtso chaithe khemai noin ta ngü hananiu.

¹⁰Asiongio nai satkü taimli, “Sau asio tsünoi, ah, tsaktso tsünoi;

¹¹Angelatsün sau tsünoi tsüdekünai Goa amtsün sau tsünoi.

¹²Ngüso chikü Goa ainou pungekü khuwan, ngüso chikü aphio nai khuwan; ti yam atha noin nung sauüh tsüchhiji, tsaküh lüko tsüchhiji.

¹³Ngüso ngio akausai nou miankü noin, ngüso lei akausai laple nou miankü noin; naiuso ngüso leikhaiu pao ün aliule khekkü akausai atsaoting sunkü noin.

¹⁴Ngüso son athesan naiuso akhou nou miankü noin,

¹⁵ngüso hok shelopengau thaiutha khaolaoji;

¹⁶ngüso khutsün yam apemai alothe naiuso angja omhetsün noin.

¹⁷Ngüsoüh aalo yam tsünge,

¹⁸tsüdekünai Goa asuhattsün tsünge.

¹⁹Lo son pungkü kiapau, naiuso goumchiko noinso apem Goa khako mikhemtsün khemai niakü shiau thaiutha Ngiokhem nai tilüsong ngiotaim, nungso Ngiokhem khemai noinso tü ngioji ta samüh ngen.

²⁰Tititenai Ngiokhem nou poutsün chhi tsangkü Goa khako sau tsüpenkiuji, Ngiokhem nou to, samüh chaithe sunlo-iu ta ngela-iau thaiutha chhiji.

²¹Lüko lo Goa nou khaiuniahoi pen-iau thaiutha ayam sungi-iu. Mosa Ngiokhem naiuso E-po nousoüh mitha kiulüko nung ta Ngiokhem nou ti chhiau tsüshio.

²²Goa nou khaiuniahoi Yisu Khrista ko ngüso amonglam tsangkü pen-iji, Goa nou Yisu Khrista da monglamtsün pungkü hau nungti chhiji.

²³Khaiunia pungkü nou chaithe sunlo-iu, naiuso Goa ajinka tsüngoi.

²⁴Lüko Yisu Khrista nai sübao aasan noin, nung tsangkü apa atsüojin nou ngüso penkiuji.

²⁵Apa da monglamtsünso chaithe wankiuau Goa nou Yisu chaithio kiu. Goa nou nung apa asio nou hanau thaiutha chhin.

²⁶Kümi taoko apaüh akiplo nou khaiuniahoi chaithe nouso tsüvesankü noiküla, lüko lo taoko apaüh meshen asio hanau thaiutha chaithe nouso tü metsüoji. Nungli Goa nou meshen chija asio nou hanji naiuso khaiunia pungkü sauhaiüh Yisu da monglamji ngüso penkiuji.

²⁷Naito abülomtsün tiai noin! Nung tsünoikü iula-iu. Nung thaiutha mitha ti noin? Samüh Ngiokhem angtsün nou süne? Tsüde, samüh monglamtsün nou noin.

²⁸Tititenai ti Ngiokhem nou thoilutji nung chhi tsangkü tsüde, lüko khaiunia tsak Goa ko amonglam tsangkülu penkiuji ta samüh thunthioji.

²⁹Tsüdekünai Goa nung Yihudahai Goalu süne? Apa Melemaohai Goa lüko tsüdeso? Apa chikü ün Goa noin.

³⁰Tititenai Goa tsakluphe, apaüh amonglam tsangkü penkiu-e, naiuso melemaohai lüko amonglam tsangkülu penkiu-e.

³¹Naito amonglam tsangkü Ngiokhem yaang iulaji süne? Nungti tilaitso tsüde! Lüko samüh Ngiokhem lomong kiuji.