Read Khiamniungan Naga Rom 4 Bible Online

Rom 4 - Khiamniungan Naga bible

Rom 4

¹Naito, sam le nyimsantsün Po, Abraham thaiutha samüh ti ngio-e? Apaüh ngelotsün ti noiküla?

²Abraham chhi nou penkiu nai, apa bülomau shio; lüko Goa khako tsüde.

³Tititenai Asiongio nai ngioji, “Abrahamüh Goa da monglam, naiuso nung amonglam nou apa thaiutha asio ta vethio.”

⁴Sauüh chhiji apa hau amai kiuji, nung ta paopei ta tsüde, nung apaüh chenlotsün.

⁵Lüko khaiunia sau meshen chhi chiai tsüdekü amonglam chiai niolutji, naiuso Goa sauüh aphio nou tsüphiokü hau shankiutsün da monglamji, Goa nou apa meshenko penkü the-iau naiuso avesanau nung apa amonglam noin.

⁶Goa nou chhi tsangkü tsüdekü asio ta louji, nung Davidüh khaiunia amongling thaiuthako chitetsün noin:

⁷“Sauhaiüh aphio naiuso angei wankiutsün ep, ngüso thaiumei!

⁸Sau chaithe nouso APAOU nou tsüvesanshi-e, nung khaiunia thaiumei!”

⁹Naito nung thaiumei ta Davidüh ngiotsün atippantsünso thaiuthalu süne? Nungti tilaitso tsüde! Nung tsütippankünso thaiutha lüko noin. Tititenai samüh Asiongio nai epji, “Abrahamüh Goa da monglam, naiuso apa amonglam tsangkü Goa nou apa asio ta lou.”

¹⁰Naito nung tilai thawao? Abraham tippankü phiai süne, tsüdekünai motippankün tao? Tippankü phiai tsüde, lüko motippankü khako.

¹¹Tititenai apaüh Goa da amonglam nou asio ta atippantsün ii tsak hanau, motippankün taoko Goa nou apa lou, küta nungphiai apa tippan. Nungtiphe ngüso tsütippan lüko Goa da monglamtsünso chikü hau Abraham nung amonglam Po noin, naiuso Goa nou apa asio ta lou.

¹²Abraham to sauhai tippankü noin ngüso po lüko noin, nung atippanau hoi noiküla, naiuso sam po Abraham motippankün tao amonglam noi nouli aakih wekü noin.

¹³Tilai Goa nou Abraham naiuso apa thsaosithsoso tü goumchi tengkam thalou, apaüh chhin, Abrahamüh Ngiokhem angio angtsün thaiutha tsüde, lüko apaüh monglam shioko apa Goa nou asio khaiunia ta lou.

¹⁴Tititenai Ngiokhem kankeitsünso tengkamau iula-inai, khaiunia amonglam nou akeng naiuso Goa athalutsün yaang iulaji,

¹⁵tititenai Ngiokhem nou mongmat sung-iji; lüko tiai Ngiokhem tsünoi nungai ngiokhem tsüangkün tsünoi.

¹⁶Nung athalutsün Goa ün amai tsüyang paopei Abraham thsaosithsoso chikü hau theau amonglam chiai noiküla. Ngiokhem angio angtsünso thaiuthalu tsüde, lüko Abrahamüh monglamtsünli sauhaiüh monglam-e ngüso hau saokü. Tititenai Abraham sam chikü thaiutha onthso yamko po noin.

¹⁷Goa sau da Abrahamüh monglam, naiuso sauüh ee nouso ahkü shi-iji, naiuso tsünoikün jengtsaiu nouso noi-iji, apa khako Abraham nung amonglamhoi apem Po noin. Asiongio nai, “Ngü ni kau piakü Po iula-in ta satkü noin.”

¹⁸Ayanglutau ti hokngam tsünoi lüko, Abrahamüh monglam naiuso yanglut, nungtiphe, “Athsaosithsoso kianthsüoli piakü shing-e” ta Asiongio nou ngiotsün khekkü apa “mele piakü Po iula.”

¹⁹Apa achetpon tsom tsak, shesinyih pem sunankü noilüko naiuso Sara methso kantsün oukong tsünoishi ta yanglüko, apaüh amonglam nai outsükongkü tsüiula.

²⁰Apa amonglamüh apa tsüwan naiuso apaüh Goa athalu meikü ngeküla, apa amonglam oukong nou miankü noiküla.

²¹Lüko Goa nou ti thalu nung shithawaoau shio ta meikü ngekü, apaüh Goa hau nianlom kiu.

²²Nungshioko “Goa nou amonglam tsangkü Abraham asio ta lou.”

²³Nung, “apa asio ta lou” ta sattaiutsün apa thaiutha haulu tsüde;

²⁴lüko sam APAOU Yisu ee ainou ahkü shitsün da monglamtsünso sam apem asio ta louji.

²⁵Nung Yisu sam chaithe thaiutha thumkü kiu, naiuso sam penau thaiutha müjam ahkü shin.