Read Khiamniungan Naga Rom 5 Bible Online

Rom 5 - Khiamniungan Naga bible

Rom 5

¹Nungtiphe amonglam nou penkiu nou shioko, sam Po Yisu Khrista tsangkü sam Goako aalo nai noin.

²Sam lo aa noitsün nung Goa atsüojin nai amonglam tsangkü apaüh niakü shin. Nungtiphe Goa ajinka haoson samüh ayangluttsün taiu nou shioko sam bülomji!

³Nunglu tsüde, lüko samüh omhe angja nai lüko monglengeji, tiautenai angja omhe ainou ajeilu, naiuso

⁴ajeilu ainou saisile amei sungji.

⁵Nung ayangtaiutsün nou sam tsümiam-iji, tititenai Goa nou apa atsüojin paopei sam hau kiuau nou noin, nung sam mongpemai Asio Onthso tsangkü ngeshikü noin.

⁶Loüh sam outsükongkün ataoting nai Khrista chaithe suntsünhoi thaiutha ean.

⁷Asio khaiunia thaiutha sauüh eau tsüaiu, lüko khaiunia amei tsak thaiutha to eau somkütso-e.

⁸Lüko Goa nou sam tü titi thatso tsüojinji nung haniu, nung sam loüh chaithe suntsünhoi noikünai Khrista sam thaiutha ean!

⁹Apa etsün tsangkü sam lo Goa ko penkü noin; naito, nungtü tekkü Goa amongmat sungtsün ainou apaüh sam kipsan-e!

¹⁰Tititenai sam eh noinai, Apa Thso etsün tsangkü sam Goa ko jeiai-in tünaito, sam nungtü simkü jeiaikü noiphe, Apa Thsoüh sam kipsaniu!

¹¹Nunglu tsüde, lüko loüh sam APAOU Yisu Khrista, sau tsangkü samüh ajeiai epiu, apa tsangkü sam Goa da monglengji.

¹²Nungtiphe titi khaiunia tsak tsangkü goumchi ai chaithe shin, naiuso chaithe tsangkü ee nou shin, nungti khaiunia apem tü ee nou shin, tititenai apemüh chaithe sunlo.

¹³Goumchi nai Ngiokhem mokiukün khako lüko chaithe to noiküla, lüko tiai Ngiokhem tsünoi, chaithe noitsün ti avesan tsünoi.

¹⁴Lüko Adam tao ainou Mosa tao saokü, Adamüh Goa athoiluttsün angio tsüangkü chhi nou lilu to chaithe suntsün tsüchhi lüko, khaiunia le chikü chiai ee nou nokshing shing. Ashiau noitsün tsak nou nung Adam noiküla.

¹⁵Lüko nung nime nou wekü tsüde, tiautenai Goa ün amai tsüyang paopei nouto Adam ün chaithe li tsüde, khaiunia tsak chaithe shioko, piakü ean nung atsüoting noin. Lüko Goa atsüojin to nungtü tekkü songkü, naiuso Khaiunia tsak Yisu Khrista atsüojin tsangkü apa amai tsüyangkün paopei nung khaiunia piakü hau noin.

¹⁶Naiuso nungai khaiunia tsak chaithe si Goa paopei ne jetko amomo noin. Khaiunia tsaküh chaithe sunküta, “Aphio Mikhem” nou shin: lüko chaithe piakü phiai aluao tsütinkü nou “Aphio Tsüde! paopei nung shin.

¹⁷Tiautenai khaiunia tsak chaithe tsangkü ee oukong nou nokshingau yalo. Lüko nung khaiunia tsak, ta ngiotsün Yisu Khrista tsangkü chhi asongting chhin! Goa atsüojin phupkü sauüh lou, naiuso apako khaiuniatsüo iula, ngüsoüh Khrista tsangkü aa nai nok shing-e.

¹⁸Titi chaithe tsak tsangkü khaiunia apem aphio kiuau thaiutha mikhem kiutsün shin, nungti asio chhi tsak tsangkü khaiunia apem pen-iau naiuso aa kiuau thaiutha amai tsüyangkün paopei shin.

¹⁹Tiautenai titi khaiunia tsak tsangkü angio tsüangtsün nou khaiunia piakü chaithe suntsünhoi iula-i, nungti tsaküh Goa angio angtsün tsangkü khaiunia piakü asiohoi iula-i-e.

²⁰Aphio chhi shingau thaiuthako Ngiokhem nou shin, lüko tiai chaithe nou shingji, Goa ün atsüojin tekkü shingji.

²¹Nungti chaithe suntsün nokshing nou eaulu shingtsünli, Goa ün atsüojin nou asio tsangkü nai shingji, sam APAOU Yisu Khrista tsangkü athontsüyangkün aa yamai sam nialutji.