Read Khiamniungan Naga Rom 6 Bible Online

Rom 6 - Khiamniungan Naga bible

Rom 6

¹Naito samüh ti ngio-e? Atsüojin tekkü sungiau sam chaithe suntsün nai tsülaokü noi-e süne?

²Nungti tilaitso tsüde! Sam sauhai chaithe ainou pungekü een, loüh sam nungkolu titi noi-e?

³Sam khiamai limtsün atsüoting nung Yisu Khrista etsünko jeiai ta samüh ngen.

⁴Nungtiphe titi Po nou ajinka oukong tsangkü Khrista ee ainou ahkü shi-in, nungti sam lüko aa ayan nai tsakeiau thaiutha apem alimtsün athat eantsün nai apako khan.

⁵Tititenai samüh apa etsün khek nou apako jeiai nai, sam apa ahkü shitsün nai lüko apako jeiai-e.

⁶Chaithe akejei nai sam tsünoikü hau, chaithe suntsün pem mowanau thaiutha, sam akeng saisile apako paiphu nai lalut ta samüh ngen.

⁷Tititenai sau ean-e apa chaithe suntsün ainou sokkü noin.

⁸Lüko sam Khrista ko e naito, sam loüh apako aa noi-e ta samüh monglamji,

⁹tititenai Khrista e ainou ahküta loto tsü-ee ta samüh ngen. Apa chiai loto ee nou nokshing tsüshing-e.

¹⁰Tititenai apa ean, chaithe nou apa chiai oukong tsünoi, loto apa Goa ko aikü aa kihji.

¹¹Nung asam chaithe yamkolu naito, asamüh chija ee noin ta lüyang, lüko Yisu Khrista tsangkü Goa ko aa nai noin.

¹²Nungtiphe asamüh pem abülom nai angio angkü hau, asam eau pem nai chaithe hau nokshing lashing-i,

¹³tsüdekünai asam phasihok tsüsiokün sahsingiuli chaithe hau lakiu. Nungliko ee ainou aa iula-itsünso pem apem asio thaiutha kankeiau kiuwantsünso khekkü asam chija Goa hau lükiu.

¹⁴Tititenai asam khako chaithe nou nokshing tsüshinge, tiautenai asam Ngiokhem khemai tsüde, lüko atsüojin khemai noin.

¹⁵Naito ti? Sam Ngiokhem khemai tsüde, lüko atsüojin khemai noiphe, samüh chaithe kankei-e süne? Nungti tilaitso tsüde!

¹⁶Khaiunia ajantso angio angau sua nousoli asam chija tilai asamüh thumkü kiuji nung asamüh atsüoting ngen, asamüh sau APAOU angio angji, asam atsüoting apa suaso noin, chaithe ee shithsattsün, tsüdekünai angio angtsün sübao nou Goako penkü iula-iji nungko tsak.

¹⁷Lüko Goa lülomsan! Atao tsak ko asam chaithe sua noiküla, atsandetsün nai ngiotsüo noitsün asamüh loutsün mongpem apemüh angio.

¹⁸Asam chaithe ainou khaiuniatsüo iula-ikü, asam asio sua nouso iula.

¹⁹(Asam pem outsükong nou shioko, ngü asam tü khaiuniali chiteji.) Ataojam asamüh asam chija thumkü tsüsiokün hau naiuso tsümeikün hau akausai chhi thaiutha sua nousoli kiu. Nung yam lilu asamüh lo asam chija asio chhi thaiutha sua nousoli asio nai thumkü kiuau noin.

²⁰Tilai asam chaithe sua nouso noiküla, asam asio nou khemai tsünoiküla.

²¹Naito lo asamüh sübao chhi nouso thaiutha miamji, nung chhi tao nouko nungso ainou asamüh ti alesan ep? Tititenai nungso chhi athon nou eantsün noin!

²²Lüko lo chaithe khem ainou khaiuniatsüo, naiuso Goa sua nouso iulaküta, asam alesan ashiotsün noin, naiuso athon nou asaita aa noin.

²³Tititenai chaithe mai ee nou noin, lüko sam APAOU Khrista nai Goa ün amai tsüyangkün paopei asaita aa nou noin.