Read Khiamniungan Naga Rom 7 Bible Online

Rom 7 - Khiamniungan Naga bible

Rom 7

¹Atsüo ngü asam tü ti ngioau noin nung asamüh ngen, jü deisinioso titi kih asam apemüh Ngiokhem thaiutha ngeji. Ngiokhem nou khaiuniahoi aa kihtsünkolu shingji.

²Tititenai tsamsigoh yangkü noitsün nyiuhai tsak meshen tsammongpo aa noin lektso ngiokhem nou tsammongpo tü kelutkü noin, lüko tsammongpo nou ean nai, tsammongpo ngiokhem ainou apa sokji.

³Nungtiphe tsammongpo aa noikü apa pohai amao dongai khunai, apa ajisiwop nyiuhai ta jon-e. Lüko tsammongpo eannai, apa ngiokhem ainou sokkü noin. Nungaito apa amao pohai dongai khulüko, apa ajisiwop nyiuhai tsüde.

⁴Jü deisinioso, asam thaiutha lüko nungtilu noin. Ngiokhem thangko naito asam ee noin, tiautenai asam Khrista pem haoson noin, naiuso lo sam Goa yathsüotsün chhi nai atheau lümeikü hau sau ee ainou ahkü shin apa asam ün noin.

⁵Tiautenai tilai sam nyih nou aiutsün nai noiküla,, Ngiokhem tsangkü chaithe chinektsün nou sam pem nai chhi chhikü aa noiküla, naiuso samüh chhitsün athon apem ee noiküla.

⁶Sam ngiokhem sübaoko jam ee nai keshikü noiküla, nung Ngiokhem ainou lo sam khaiuniatsüo noin. Nungtiphe sam asattaiutsün Ngiokhem akeng yamai yathsüotsün tsüde, lüko Onthso ayan yamai yathsüoji.

⁷Naito samüh ti ngio-e? Ngiokhem nou chaithe süne? Nungti tilaitso tsüde! Nungti lüko chaithe nung ti-in ngo tsüngekü noiküla, ngiokhem tsangkülu ngen. Tititenai “ni lachinek ta ngiokhem nou tsüngio tünto ngo achinektsün tsünge-ela.”

⁸Lüko nung ngiokhem tsangkü ngü tü nyih achinektsünso in chikü lotsüoau chaithe nou athang ep. Ngiokhem ainou pungekü, chaithe nouto ee noin.

⁹Ngo jam ngiokhem ainou pungekü aa noiküla, lüko ngiokhem shinai, chaithe nou ahkü shin, naiuso ngo ean.

¹⁰Naiuso Ngiokhem sübaoüh ngo aa yamai niaau noiküla, nungüh ngo ee yamai nia.

¹¹Chaithe nou apa athang ep, naiuso nung ngiokhem nou tsangkü ngo sapthio-i naiuso loatan.

¹²Nungtiphe ngiokhem naiuso athoiluttsün asio, ngiotsüo naiuso amei noin.

¹³Naito sübao amei nungüh ngo etsün sungi süne? Nungti tilaitso tsüde! Lüko nung chaithe nou chhin, naiuso chaithe nou thatü thsüokü chaithe ta epiau thaiutha, sübao amei noiküla, nung tsangkü chaithe nou ngü da ee sung-in.

¹⁴Ngiokhem to onthso ta samüh ngen, lüko ngo chaithe hau sua tsakli janankü noitsün eantsün khaiunia tsak noin.

¹⁵Ngü ti chhiji nung ngü tsünge, tititenai ngü ti chhiau mongchioji nung tsüchhiji; lüko ngü ti chinyanji nung ngü chhiji.

¹⁶Lüko ngü ti chhiau tsümongchioji nung ngü chhiji, nai ngiokhem mei ta ngü thaluji.

¹⁷Nungtiphe loto nung ngü tsüchhi, lüko ngü da noitsün chaithe nou nung chhiji.

¹⁸Amei nou ngü da tsünoi ta ngo ngen nung jü shesinyih pem nai noin. Tititenai ngü da amei chhi chhiau mongchio lüko, sübao amei nung ngü chhiau tsümon.

¹⁹Ngü ti amei chhiau mongchioji, nung tsüchhiji, lüko ti tsümeikü chhiau ngü tsümongchioji nung ngü chhiji.

²⁰Lüko ngo ti tsümongchio nung chhinai, nung ngo tsüde, lüko ngü da noitsün chaithe nou chhiji.

²¹Nungtiphe ngo sauüh amei chhiau mongchioji, ngüko tsümeikün hakü noin ta nung ngiokhem ngü ep.

²²Jü mongkhei nai Goa Ngiokhem nai monglingji.

²³Lüko ngo jü pem nai ngiokhem amomo chhi chhitsün epji, sübao jü mongüh lutsün noin, nung ngiokhem nou thako li-eji. Chaithe Ngiokhem sübao nou jüpem nai chhi chhiji nungüh ngo akhothiotsün tsak iula-iji.

²⁴Oh, ngo titi a-angja amongmat khaiunia! Nung eantsün pem ainou sauüh ngo kipsan-e?

²⁵Sam APAOU Yisu Khrista tsangkü sauüh chhiji ngü nung Goa nian lomji! Nungtiphe ngü jü chija jümong nou Goa Ngiokhem atsüoting yathsüoji, lüko nyih nou chaithe Ngiokhem yathsüoji.