Read Khiamniungan Naga Rom 9 Bible Online

Rom 9 - Khiamniungan Naga bible

Rom 9

¹Ngü ngiotsüo nai chiteji; ngü Khrista ün nou naiuso ngü yaang tsüchiteji. Jü mongyang Asio Onthso nou kankeiji, naiuso ngo yaang tsüchiteji ta nungüh mitha kiuji.

²Tilai ngü jü mongpemai amongmat asong titi noin ta ngioji, naiuso jü mongpem nai omhe tsülaokü noin

³jü khaiunia thaiutha jü tengkhaiu jü shesinyih! Tititenai ngüso shioko ngo jü chija Goa athesan khemai naiuso Khrista ainou pungeankü noiküla.

⁴Ngüso Goa ün khaiuniahoi; apaüh ngüso apa thsosoau iula-in naiuso apa ajinka ngüso tü han; apaüh meshen athalou-e ngüsoko shan naiuso ngüso hau Ngiokhem nou kiu; ngüsoüh atsüoting amkhamji; naiuso ngüsoüh Goa athalutsünso ep;

⁵ngüso atengting Ibrihai paosiposo ainou nyimsan; naiuso Khrista khaiuniali ngüso le ainou noiküla. Goa sauüh apem khaiuai nok shingji, apa athontsüyang nianlom lüthe! Amen.

⁶Lüko Goa nou thaloutsün yaang iulan ta tsüngioji. Tititenai Israel hai apem to Goa khaiunia tsüde,

⁷tsüdekünai ngüso Abraham le nou shioko ngüso chikü Goa thsoso ta tsüde; Goa nou Abraham tü ngiom, “Isak tsangkü ngo thaloutsün jü thsaosithsoso shing-e.”

⁸Nung nungti noin, nyih nai athsoso Goa thsoso tsüde, lüko athaloutsün tsangkü chettsün Goa thsoso atsüoting.

⁹Tititenai nung athalutsün ngio tsak noin, “Nungtaoko ngo shi-e, naiuso Saraüh melothso tsak chette.”

¹⁰Naiuso nunglu tsüde, Rebecca thso melothso nime po tsak nung sam po Isak noin.

¹¹Thso nou mochetkünai, naiuso amei si tsümei ti mochhikünai, chhi ainou tsüde, lüko sauüh jon apa ainou, athalutsünli Goa nou mongchiotsün tsaloau thaiutha,

¹²apaüh Rebecca tü nungti ngiom, “Apetche nou niophi yathsüo-e,”

¹³Asiongio nai satkü taimli, “Ngü Yakob tsüojin, lüko Esau chinyan.”

¹⁴Naito samüh ti ngio-e? Goa da tsüsiokü noin süne? Nungti tilaitso tsüde!

¹⁵Tititenai apaüh Mosa tü ngiom, “Sauhai tü ngü atsüojinyang hanau aiuji ngüso tü ngü atsüojinyang han-e, naiuso sauhai tü ngü mongai kiakü yangkiutsün hanau aiuji, ngüso tü ngü mongai kiakü yangkiutsün han-e.”

¹⁶Nungtiphe nung sauüh mongchioji apa ainou tsüde, tsüdekünai sauüh ko-eji apa ainou tsüde, lüko atsüojinyang noitsün Goa ainou.

¹⁷Tititenai Asiongio nou Ijip nokpao Farao tü ngiom, “Ni hau jü oukong hanau, naiuso jünian goumchi apemai ngiopengkü khuao, ngo ni lotsüokiu.”

¹⁸Nungtiphe sau tü apaüh atsüojinyang hanau aiuji, apa hau hanji, naiuso sau mong kong-iau aiuji apaüh apa mong kong-iji.

¹⁹Nungai asam ongko ngo tü tsaküh ngio-e, “Tiau apaüh loüh aphio thaluji? Tititenai sauüh apa mongchiotsün kiapji, ajantso noimo?”

²⁰Lüko haimeiso, Goa tü sauüh thashi-e? Ashantsün jengtsaiu nou ashanpao nou tü, “Tiau ni ngo nungti shan ta ngio-e süne?”

²¹Tsüdekünai pusun tsak nou lak aleng amei tsak, naiuso haoson tsak nou amao lak tsak saiau gohthsai-pu nou khako lak saitsün oukong tsünoiso?

²²Goa nou meshen mongmat sungtsün hanau naiuso apa oukong nge-iau mongchio lüko, amowanau thaiutha khemlotsün mongmat sungtsün lak apaüh laiukü kiplo,

²³kümi naita ajinka thaiutha apaüh khemkü taiutsün nungso atsüojinyang lak nou da apa ajinka jengtsaiu nge-iau kiplo.

²⁴Sam sauhai apaüh Yihudahai ong ainoulu tsüde, lüko Melemaohai ong ainou lüko jon, sam lüko nungso atsüojinyang eptsün lak nouli noin.

²⁵Loüh Hosea Thsamai apaüh nungti ngioji: “Sauhai jü khaiuniaso tsüdeküla, ngüso tü ngo ‘Jü Khaiuniaso’ ta jon-e. Mele sübao tü ngo tsütsüojinküla nung mele tü ‘Ngo Tsüojintsün’ mele ta jon-e.

²⁶Naiuso ngüso tü tiai, ‘Asam jü khaiunia tsüde,’ ta ngiotaim, ngüso tü aa Goa thsoso ta jon-e.”

²⁷Naiuso Isaiaüh Israel thaiutha nungti wekü ngioji, “Israel thsoso haove khiamnok nai singtsoli noilüko, külüko ngüso thsaothsaokülu kipsan-e;

²⁸tititenai APAOU nou goumchi noutü alekta mikheme”.

²⁹Nung khako Isaiaüh ngiotsünli, “Akhengteng APAOU nou sam hau thsaosithsoso ajantso tsütaiukiu tünto, sam Sodom si Gomora ne khekkü iulakü noi-ela.”

³⁰Nungtiphe melemaohai sauhaiüh meshen chija Goako apen tsüyamküla, ngüsoüh amonglam tsangkü Goako apen ep, ta samüh ngioji.

³¹Tilai Goa khaiuniahoi nou Goa ko penkü noiau Ngiokhem yam lüko, ngüsoüh tsüep.

³²Tiautenai ngüsoüh amonglam tsüniolut, lüko ngüso chhi tü niolut. Ngüso “Athekattsün Lung nouko thekat.”

³³Asiongio nai ngioji, “Athaplu, ngo Zion nai Lung tsak taiuji nung Lung tü khaiuniahoi hok thekkü, ngüso loian-i-e. Lüko sauhaiüh apa da monglamji ngüso tsülekkat-e.”