Read Khiamniungan Naga 1 Korint 1 Bible Online

1 Korint 1 - Khiamniungan Naga bible

1 Korint 1

¹Paul, Yisu Khrista hongthon tsak theau Goa mongchio tsangkü jontsün, naiuso sam deisinio Sosteni ainou

²Korint nai noitsün Goa donthe Yisu Khrista nai asiohoi theau jontsünso amonglamhoi apem dongai:

³Sam Po Goa naiuso APAOU Yisu Khrista ainou asam dongai atsüojin naiuso aalu lüthe.

⁴Goa atsüojin sübao Yisu Khrista nai asam hau kiu, nung thaiutha ngü jü Goa nian asai lomji;

⁵nungti alumai ngio chitetsün apem, naiuso angetsün apemai apa da asam memei iula.

⁶Khrista thaiutha mitha asam ongko mongkü lula-iu

⁷nungtiphe sam APAOU Yisu Khrista tsangsheikü sungao taiutsünko ouk tsüepkü titso tsünoi.

⁸Sam APAOU Yisu Khrista ajekhaiu nai asam aphio tsülepkü iula-iau thaiutha apaüh asam athon saokü mongi-e.

⁹Goa sau tsangkü apa Thso APAOU Yisu Khristako jeiai-iau jon, apa monglamao noin.

¹⁰Deisinioso, asamüh ngio tsak hau thekü chiteau, naiuso asam ongko ajanpai tsünoikü, mongyang wekü naiuso mikhemtsün wekünai thapungiau ta ngo sam APAOU Yisu Khrista nianko asam lotsüoji.

¹¹Jü deisinioso, asam ongko angemat noin ta Kloi tsammongso ainou asam thaiutha ngü tü ngiom.

¹²Ngü nung ngioji: asam khaiunia pungkü nou, “Ngo Paul sahoi,” “Ngo Apolo sahoi,” “Ngo Peter sahoi.” Naiuso ajantsoüh ngo Khrista sahoi ta ngioji.

¹³Khrista janpek süne! Paul asam thaiutha paiphu nai lalut süne? Tsüdekünai asam Paul nianko limkiu süne?

¹⁴Krispa si Gaya ne tü simkü ngo asam ongko sau tsülimkiu nou shioko ngo Goa nianlomji.

¹⁵Asam jü nianko limkiu ta sauüh tsüngiokü hau,

¹⁶(Ngo Stephan tsammongso lüko limkiu, nungtü simkü amaohai tsak ngü limkiu süne tsülimkiu nung ngü tsünge.)

¹⁷Tititenai alimkiuau thaiutha tsüde, Ngem Amei nou tsandeau Khristaüh ngo hong. Lüko Khrista Paiphu yaang iula-i-e nou ta apaüh mongthat amei ngionai chimau ngo tsühong.

¹⁸Tititenai sauhai mowanji, ngüso thaiuthato Khrista Paiphu nai eantsün ngio nung maingahai ngio, lüko sam kipsankü noinso thaiutha to nung Goa oukong noin.

¹⁹Asiongio nou ngioji, “A-ngehai mongthat mongsai ngü mowani-e, naiuso ange amonhai mongsai ngü yaang iula-i-e.”

²⁰Naito, mongthat mongsai noitsün naiuso angehai tiai noin? tsüdekünai nung goumchiko ngiokhenge montsünso tiai noin? Goa nou nung goumchi ün mongthat mongsai mainga noin ta hanji!

²¹Tititenai Goa mongyang nou goumchi mongyang tsangkü, Goa tsüngeau kiapan, nunglikoto samüh “mainga” ngiongem ta chimtsün sauhaiüh monglam-e ngüso kipsanau Goa mongchiotsün noiküla.

²²Tititenai Yihudahaiüh atsangshei au ii nou saoji, naiuso Grik haiüh mongthat mongsai nou tü yamji,

²³lüko samüh Khrista Paiphu nai laluttsün chimji, sübao Yihudahai thaiutha athekattsün lung naiuso Melemaohai thaiutha tsüngekün noin.

²⁴Lüko ajonsantsünso Yihuda hai naiuso Grik hai nemtso thaiutha Khrista Goa oukong naiuso Goa mongyang noin.

²⁵Tititenai Goa ün tsüngekün nung khaiunia mongthat tü meijeng, naiuso Goa outsükongkün nung khaiunia tü oukongjeng noin.

²⁶Jü deisinioso, tilai Goa nou asam jon, asam ti aküo nai noiküla, nung lüyangsan. Khaiunia saisile yamko naito, asam thsaothsaokülu a-nge tsüdekünai oukong, naiuso asonghoi noiküla.

²⁷Lüko Goa nou a-ngehoi nouso miamiau thaiutha goumchiko mongyang tsüpungkünso shingsan. Naiuso oukong nouso miamiau thaiutha goumchiko outsükongkünso shingsan.

²⁸Goumchi nou sübao atengting ta yangji nung lotheanau thaiutha, apaüh awesan tsünoikünso, lochilotsaokünso, naiuso titso tsüde ta yangtsünso shingsan.

²⁹Goa khako saulünou abülomao tsüshio ta nungüh ngioji.

³⁰Lüko Goa nou asam Khristako ajeiai nai kankü shin, naiuso Goa nou Khrista sam hau mongyang shankiu. Apa tsangkü sam Goako pen-iji, naiuso sam Goa ün asio khaiuniahoi naiuso khaiuniatsüo iula-e.

³¹Nungti Asiongio nou, “Sau bülomau aiuji apaüh APAOU nou ti chhin nungtü lübülom.” Ta ngioji.