Read Khiamniungan Naga 1 Korint 10 Bible Online

1 Korint 10 - Khiamniungan Naga bible

1 Korint 10

¹Deisinioso, sam paosiposo apem thengmia khemai noiküla, naiuso apem nou sheasong yankü khu ta ngü asam hau tsünge-ikü noiau tsüaiu.

²Naiuso Mosa phiai hoilut nouso apem thengmia nai naiuso sheasong nai limkiu.

³Onthso nou kiutsün themtsai apemüh wekü he,

⁴naiuso Onthso nou kiutsün khiam wekü shiu. Onthso Lung sübao ngüsoko aikü khuha, nung ainou khiam shiu; nung amao tsüde lüko Khrista pem noiküla.

⁵Nungti lüko Goa ngüso apia nouko tsümongling, nungtiphe ngüso ee mea nouso liutsa apemai wanpengan.

⁶Ngüsoüh chhitsünli tsümeikün jengtsaiu tsüchinekau, nung chikü sam thaiutha athatluau tsak noin,

⁷tsüdekünai ngüso ajantsoüh chhitsünli sotsom goa nou tü tsüamkhamau sam lotsüoji. Asiongio nou, “Khaiuniahoi sümai nai heshiuau moknoi, nung thengshiutsün naiuso ajisiwop chhitsün iulan,” ta ngioji.

⁸Naiuso ngüso ajantsoüh ajisiwop kankei nou shioko ajekhaiu tsak ko mepem 23, 000 ean; nungti samüh lakankeiko.

⁹Tsüdekünai ngüsoüh APAOU lilu, naiuso pao nou jeikü eantsünli samüh APAOU laliluko.

¹⁰Nungsoüh namnamtsünli lanamnamko. Ngüso ean-itsün aünhong nou ngüso lomowan-e.

¹¹Nungso chikü ngüso tü amaohai thaiutha athatluau shithawao, naiuso nung sam lotsüoau thaiutha satkü taim. Tititenai sam athontao shimkü nouko kihji.

¹²Nungshioko sauüh mongkü tsaji ta yangji, apa khia-an-e nou ta lütsüolo.

¹³Asamüh epkü naiuso ngekü shitsün alilu chikü khaiuniahoi nou tü shitsün wekülu noin. Lüko Goa nou apa athaolutsün chhiji, naiuso apaüh asam oukong chiaito aliluau ayam tsükiu-e, ti ataoko asam lilu-e, apaüh asam hau akipluau oukong kiu-e, naiuso asam thakhuau ayam han-e.

¹⁴Nungtiphe ngü tsüojintsünso, sotsom goa amtsün ainou asam lükhulu.

¹⁵Ngo angelahoi nousoko chiteji, ngo ti ngioji nung asamüh lüyanglu.

¹⁶Thengkam sübao samüh APAOU sümai nai kankeiji, naiuso samüh shiutsün taoko sübao thaiutha Goa hau nianlom kiuji, samüh Khrista she janeloji. Themtsai sübao samüh lopekji, nung samüh Khrista pem janelutsün noin.

¹⁷Sam piakü noilüko, themtsai tsaklu noitsün khekkü pem tsaklu, tititenai sam apem nou themtsai tsaklu janeluji.

¹⁸Israel hai tü lüyanglu, sauhaiüh aloat chaithio heji, nungsoüh amthang nai haoson tsüloji süne?

¹⁹Naito sotsom goa tsüdekünai nung hau eheshiu kiutsün tsotsak atsüoting noin ta ngü thaluji süne?

²⁰Tsüde! lüko Goa tsüngekünsoüh chaithio kiutsünso Goa tü tsüde, lüko biya hau kiuji, naiuso ngü asam biya nousoko ha-iau tsüaiu ta ngioji.

²¹Asamüh APAOU thengkam naiuso chaithe chaithio nouso thengkam shiuau tsüshiu, asamüh APAOU ün asio-puo naiuso biya puo nai heau tsüshio.

²²Nungti tsüdekünai samüh APAOU tü alu tsüaiujiso? Apako nai sam oukongjeng süne?

²³Nungtiphe ngüsoüh ngioji, “Samüh alum chhiau ayam satkü noin,” Nung ngiotsüo, lüko chiküto amei tsüde, “Samüh alum chhiau ayam noin,” lüko chiküto alesan tsünoi.

²⁴Apemüh momo meiaulu tsüyamkü meshen phaosipohai meiau lüyam.

²⁵Ti nyih chaikam nai janji nung tsüyangelatkü lühe.

²⁶“Tititenai goumchi naiuso goumchiko noitsün apem APAOU ün” ta Asiongio nou ngioji.

²⁷Tsümonglamkün khaiunia tsaküh ni chiheau jonkü khunai, akhako tilüsong taiukiuji nung ti tsüyangelatkü lühe.

²⁸Lüko ajantsoüh nitü, “Nung chaithio jengtsaiu nou to sotsom hau kiutsün noin,” ta ngionai nungai sauüh ti ngioji apa thaiutha naiuso amongyang thaiutha nung lahe.

²⁹Nung asam ayang angela thaiutha tsüde, lüko amao khaiuniahoi ayang angela thaiutha noin. Ajantsoüh sang, “Naito, Mei,” “Amao khaiunia ayang angela tsangkü tiau tsüomei chhi nou athat yangkü the-e?

³⁰Ngü jü eheshiu thaiutha Goa hau nianlom kiunai, ngü nianlom kiutsün eheshiu thaiutha tiau lotsaoji?”

³¹Nungtiphe asamüh helüko, shiulüko, alum chhilüko, apem Goa ajinka-iau thaiutha lüchhi.

³²Nungti asam lüko, Yihuda hai lüko, Grik hai lüko, Goa donthe lüko lathekat-i.

³³Ngo li sauüh meshen alesan tsüyamkü khaiunia apem mongtsamau lükankei.