Read Khiamniungan Naga 1 Korint 11 Bible Online

1 Korint 11 - Khiamniungan Naga bible

1 Korint 11

¹Ngü titi Khrista sakshi ngeloji, nungti asamüh jü sakshi angelo.

²Ngü asam nian lomji, tiautenai asamüh ngo apemai yangsanji, naiuso ngü asam tü tsandetsünli asamüh hoilutji.

³Lüko khaiunia pungkü khaiu nung Khrista, naiuso nyiuhai khaiu nung pohai, naiuso Khrista khaiu nung Goa ta ngü asam hau nge-iau aiuji.

⁴Pohai pungkü sauüh khaiu loikü misao sao-e, tsüdekünai chim-e, apaüh meshen chiai amiam kanlutloji.

⁵Lüko nyiuhai pungkü sauüh khaiu tsüloipukkü misao sao-e, tsüdekünai chim-e, apaüh meshen tsammongpo hau amiam kanlut kiuji; tititenai nung khaiu iuwankü nouko wekülu noin.

⁶Tititenai nyiuhai khaiuloi tsüloikünai, apa khaiu lü-iuwankiu; lüko nyiuhai khaiu tiptsün, tsüdekünai khaiu iuwantsün amiam naito apa khaiuloi lüloi-i.

⁷Lüko pohaito Goa khektsün naiuso ajinkaphe, khaiuloi tsüloiau noin, lüko nyiuhaiüh pohai ajinka hanji.

⁸Tititenai pohai nouso nyiuhai ainou tsüde, lüko nyiuhai pohai ainou.

⁹Loüh pohai nung nyiuhai thaiutha tsüshan, lüko nyiuhai nung pohai thaiutha shan.

¹⁰Naito, aünhonghoi thaiutha, nyiuhai tsaküh meshen tsammongpo oukong khemai noitsün hankü apaüh khaiuloi loiau noin.

¹¹Nungti lüko APAOU nai nyiuhai nung pohai tü simkü ahaupung tsüde, naiuso pohai lüko nyiuhai tü simkü ahaupung tsüde.

¹²Tititenai nyiuhai titi pohai ainou, nungti pohai nyiuhai nou chet; lüko apem Goa ainou noin.

¹³Nyiuhaiüh khaiuloi tsüloikü nyung amkhamtsünko Goa tü misao saoau ayam noin süne, asam chija lülilu.

¹⁴Pohaiüh khaiuo laiukü saiunai apa thaiutha amiam noin nung saisile da sunkü noin ta asamüh tsüngeso?

¹⁵Lüko nyiuhai khaiuo laiukü saiunai nung apa thaiutha ajinka noin, tititenai apa khaiuo apa khaiu loipukau thaiutha hau kiu.

¹⁶Lüko khaiunia ajantsoüh nung thaiutha sangshiau aiunai, ngo ngioau noitsünto nung sam tsüdekünai Goa donthehoi nou amao amkham saisile tsünoi.

¹⁷Ayamhan ajantso nai ngo asam nian tsülomji, tiautenai asam amkhamau kamtsün nou amei tsüdekü tsümeikübao chhiji.

¹⁸Tititenai asam donthe nai kamnai asam ongko ajanpai noin, ta ngü luji; nung ngio tü atsüo ta monglamji.

¹⁹(Ayangelatau tsünoi, asam ongko ayam thakü sauhai noin nung tsangsheikü ngeau nungko titilünou tsüjeiaikü sungau noin.)

²⁰Nungtiphe asam tilai aikü kamshiji, nungko asamüh APAOU sümai heau tsüshio.

²¹Tititenai ehe taoko khaiunia pungkü nou amaohai khako chong lukü heshiuji; küta tsak naiukü noinai, amao tsak theng nou tokji.

²²Eheshiu au thaiutha asam tsam tsünoiso? Tsüdekünai asamüh Goa donthe lotsaokü eheshiu nou tsüpungkünso hau amiam kiujiso? Ngü asam tü nung thaiutha ti ngio-iau yangji? Ngü asam nian lom-e süne? Nung thaiutha ngü asam nian tsülomji!

²³Tititenai ngü asam tü ti tsande, nung APAOU ainou ngelutsün noin: Apa sapthiotsün sohnai APAOU Yisuüh themtsai lou,

²⁴küta nianlom kiukü ngeppekkü ngiom, “Nung asam thaiutha kiutsün jüpem. Ngo yangsankü hau nung lükankei.”

²⁵Nung khekkü themtsai heküta, apaüh thengkam loukü ngiom, “Nung thengkam jü she thaolutkü taiutsün Goa ün ayan athalu-etsün noin. Asamüh nung thengkam titsojam shiu-e, ngo yangsankü lükankei.”

²⁶Asamüh nung themtsai titsojam he-e, naiuso thengkam nou shiu-e, nungüh APAOU eantsün thaiutha apa moshikün lektso pungpeng kiuji.

²⁷Nungtiphe sauhaiüh tsütinkü themtsai heji, naiuso APAOU ün thengkam shiuji, apaüh, apa pem naiuso apa she thaiutha aphio noi-e.

²⁸Lüko khaiunia nou momo chija yangluküta themtsai nou lühe naiuso thengkam nou lüshiu.

²⁹Tititenai sauüh pem thaiutha tsüyanglukü themtsai heji naiuso thengkam shiuji, apaüh nung meshen pem da aphio lothiokü heshiuji.

³⁰Nungshioko asam piakü outsükong naiuso tsümeilei tsüdekünai piakü eaniu.

³¹Ayating nai samüh sam chija yanglukü chhi naito, sam Goa mikhem nai tsüshi-e.

³²Lüko goumchi nouko aikü sam aphio nai tsüthe-iau APAOU nou sam aphio yamji naiuso lohatji.

³³Nungtiphe deisinioso, tilai asam APAOU sümai heau kamshi-e tsaküh tsak tü taiukü lünoi.

³⁴Naiuso ajantso naiunai, apaüh tsamai lühe, nungtiphe asam aikü kamshinai Goa mikhem nai tsüshiau thaiutha lüchhi. Amao apoi nouso thaiuthato ngo tilai shi-e, nungai chite-e.