Read Khiamniungan Naga 1 Korint 12 Bible Online

1 Korint 12 - Khiamniungan Naga bible

1 Korint 12

¹Asamüh Asio Onthso ainou paopei nouso thaiutha ti sat, lo nung thaiutha. Jü deisinioso, ngo asam hau nungso thaiutha ngiotsüo nou ngelaiau aiuji.

²Asam Goa tsüngekün taonai, aa tsünoikün sotsom goa amkhamtsün yam piakünai hoilutkü khuwan ta asamüh ngen.

³Khaiunia tsak apa Asio Onthso tsangkü tsüniakünai, “Yisu to APAOU,” ta thaloau tsüshioji, naiuso sau Asio Onthso tsangkü niakeiji apaüh, “Yisu tü athesan!” ta ngioau tsüshio, ngü nung asam hau nge-iau aiuji.

⁴Onthso paopei in amomo noin, lüko Onthso tsakühlu nung kiuji.

⁵Naiuso ayathsüotsün in amomo noin, lüko APAOU tsaklu yathsüoji.

⁶Chhi yathsüoau oukong amomo noin, lüko Goa tsaklu nou khaiunia pungkü hau ngüso ayathsüotsün chhi amomo thaiutha ashioau kiuji.

⁷Khaiunia pungkü hau apem meiau thaiutha Onthso atsangshei sungtsün kiuji.

⁸Khaiunia tsak hau Onthso tsangkü mongthat mongsai ngio kiuji, naiuso amaohai tsak hau Onthso nunglu tsangkü angetsün ngio kiuji.

⁹Loüh amaohai tsak hau Onthso nunglu tsangkü amonglam, naiuso amao tsak hau Onthso nunglu tsangkü alumeiau paopei;

¹⁰Onthso nou khaiunia tsak hau athanga chhi chhiau oukong kiuji; amao tsak hau Goa Ngio chiteau paopei; naiuso loüh amao tsak hau paopei amomo jetko nung Asio Onthso ainou süne amao ainou ta chiteau oukong kiuji. Khaiunia tsak hau apaüh ngio amomo chiteau oukong kiuji, naiuso amao tsak hau apaüh tsüngekün ngio tsangsheikü chiteshiau oukong kiuji.

¹¹Lüko Onthso nungühlu meshen mongchio likü nungso apem khaiunia tsak tsak hau janekü kiuji.

¹²Pem titi tsaklu thekü nouko uojei piakü pokü, naiuso pem uojei piakü lüko pem tsaklu, nungti Khrista noin.

¹³Tititenai sam Yihudahai lüko, Grik hai lüko, sua lüko, khaiuniatsüo lüko, chikü Onthso tsaklu nai limkiu, naiuso sam chikü hau Onthso tsak ainou shiu-i.

¹⁴Tititenai pem nai uojei tsaklu tsüde, lüko piakü noin.

¹⁵Hok nou, “ngo pha tsüde, nungtiphe ngo pem nai tsüha” ta ngionai, nung ngio pem nai tsühakü tsünoi.

¹⁶Naiuso noukhan nou, “ngo niovei tsüde, nungtiphe ngo pem nai tsüha” ta ngionai, nung ngio pem nai tsühakü tsünoi.

¹⁷Pem apem niovei naito, ti nou lula-e? Pem apem noukhan naito, ti nou anyam nge-e?

¹⁸Goa nou uojei in amomo apaüh taiuau aiutsünli pem nai taiu.

¹⁹Lüko apem uojei tsaklu naito, pem tiai noi-e?

²⁰Nungso uojei piakü lüko pem tsaklu.

²¹Naiuso niovei nou pha tü, “Jü thaiutha ni ti poukü tsünoi!” ta ngioau tsüshio. Tsüdekünai khaiu nou hok tü, “Jü thaiutha ni ti poukü tsünoi!” ta ngioau tsüshio.”

²²Nungli pem nai uojei outsükongli yangtsün tsühakü samüh chhi chhiau tsüshio.

²³Naiuso pem uojei sübao tü samüh tsümai ta yangkiuji, nung hau samüh asuhat tekkü kiuji, naiuso sam uojei aleng tsümeikünbao aleng tekkü meijeng noin.

²⁴Oujei sübao aleng thatü meikü noin nungbao atheau tsünoi. Goa nou uojei ehen nouso hau asuhat aphop kiuau pem nou sheitho.

²⁵Nungtiphe pem nai tsüjeiaikü ti tsünoi lüko uojei amomo chikü nou tsaküh tsak thaiutha yangkiu-ekü noin.

²⁶Naiuso uojei tsak omhenai, uojei apem apako omheji; naiuso uojei tsak lomsannai, nungko apemüh monglingeji.

²⁷Asam apem Khrista pem noin, naiuso asam khaiunia pungkü nungko uojei noin.

²⁸Naiuso Goa nou donthe nai ajantso, ayating nouko hongthonhoi, nime nouko E-pohoi, süme nouko atsandetsün, nungphiai athanga chhitsünso, nungphiai alumei paopei suntsün, tsüdekünai ahachuao paopei suntsün, tsüdekünai ngüso yam hanau, tsüdekünai ngio in amomo chiteau shiotsün sunkiu.

²⁹Ngüso apem to hongthonhoi tsüde, E-pohoiüh tsüde, tsüdekünai atsandetsünhoi tsüde.

³⁰Apem hau to athanga chhi chhiau, alumeiao, ngio amomo nai chiteau, tsüdekünai khapiam ngio tsangsheikiuao oukong tsükiu.

³¹Lüko paopei asongtso nouso thatü lümongchio. Loüh ngo asam tü yam ameiting nou chim-e.