Read Khiamniungan Naga 1 Korint 14 Bible Online

1 Korint 14 - Khiamniungan Naga bible

1 Korint 14

¹Atsüojin lüyam, naiuso loüh Onthso paopei thaiutha thatü lümongchio, lüko achimau tekkü lümongchio.

²Tititenai ngio mothikü chitetsün khaiunia tü tsüde, lüko Goa tü chiteji; tititenai sauüh tsüngesanji, lüko apaüh akaungio Onthso oukong nou chiteji.

³Lüko sauüh Goa ngiongem chimji, apaüh khaiunia ko chiteji naiuso alotsüo ngio, naiuso aalu ngio chiteji.

⁴Sauüh ngio mothikü nou chiteji, apaüh meshen chija oukong-iji, lüko sauüh chimji apaüh donthe oukong-iji.

⁵Ngü asam apem hau ngio mothikü nouko chite-iau aiuji, lüko tekkü chimiau aiuji. Ngio mothikü chitetsün nou donthe oukong-iau thaiutha athatlu tsüchitekünai ngio mothikü chitetsün noukoto achimtsün songtso.

⁶Lüko deisinioso, ngo asam tü atsangshei sungtsün ngio tsüdekünai angetsün ngio, achimtsün ngio, tsüchitekü asam dongai ngio mothikü chitekü shinai, asamüh ti tsülesan-e.

⁷Aa tsüsunkün sang kiutsün jengtsaiu, poipoi lüko, kokyang lüko, ngüsoüh sang amomo tsükiukünai, ti matji tsüdekünai khongji titi thekü nge-e?

⁸Tititenai jangong nou sangngem atsüo tsükiukünai, ehliau sau khemlo-e?

⁹Nungti asam leiüh angelaau shiokü ngio tsüsingiokünai, asamüh ti singioji nung titi thekü nge-e? Tititenai asamüh tsüngelakü naito nung ahsheih nai chitetsünli noi-e!

¹⁰Goumchiko ngio nungti piakü noin, lüko athatlu tsühakü ngio tsaktso tsünoi.

¹¹Nungtiphe ngo athatlu ngio ngioau tsüshiokünai, ngio chitetsün khako ngo gohmao khaiuniahaili noi-e, naiuso jü khako ngio chitetsün gohmao khaiuniali noi-e.

¹²Asamüh Onthso paopei nouso epau mongchiophe, donthe oulokongau sübao apem chiko akhengting, loüh asongting paopei atheau nou, ta koweau noin.

¹³Nungtiphe sauüh ngio mothikü nou chite-e, apaüh athatlu chiteau shiokü hau misao lüsao.

¹⁴Tititenai ngü ngetsün ngio nou misao saonai, jü onthso nou misao saoji, lüko ngo ngesantsün alesan tsünoi.

¹⁵Naito ngo ti chhi-e? Ngü onthso nou misao saoko, naiuso loüh ngo jümong nou lüko misao saoko. Ngü onthso nou jih jih ko, lüko ngo ngelatsün nou jih ko.

¹⁶Tsüdekünai ni onthso noulu nian lomnai, tsüngekünsoüh ni ngiotsün tü apaüh titi ngelakü, “Amen” ta ngio-e? Tititenai ngüsoüh ni ti ngioji nung tsüngela.

¹⁷Asamüh Goa tü nianlomkiu misao thatü meikü saolüko, amao khaiunia nouto titso alesan tsüepji.

¹⁸Ngü asam chikü tü ngio apiateng nou chitenai, Goa nian lomji.

¹⁹Nungti lüko amkham taoko ngü ngio mothikü hengche chite noukoto amaohai tsandeau shiokü naiuso ngelaau shiokü ngiopem pungobao chiteau noin.

²⁰Deisinioso, mongai methso lathe, tsümeikünai nionyaothso lüthe, lüko asam mongai ashe lüthe.

²¹Asiongio nai nung satkü noin, “Ngio mothikü chitetsün khaiuniahoi nou tsangkü ngo jü khaiuniaso ko chite-e; ngo gohmao khaiuniahai son tsangkü chite-e, nungti lüko ngüsoüh jüngio tsüange ta APAOU nou ngioji.”

²²Nungtiphe ngio mothikü chitetsün amonglamhoi thaiutha tsüde, lüko mongtsülamkünso thaiutha ii noin, naiuso achimtsün nung tsümonglamkünso thaiutha tsüde, lüko amonglamhoi thaiutha noin.

²³Nungtiphe donthehoi apem nou kamkü noikü, apem nou ngio mothikü chitenai, naiuso tsüngekün tsüdekünai tsümonglamkün shinai, ngüsoüh asam waiwai ta tsüngio-e süne?

²⁴Lüko khaiunia pungkü nou tilai tsümonglamkünso tsüdekünai khaiunialon tsak shinai, Goa ngiongem pungpengkü lunai apaüh ti lulaji nung tsangkü apa chaithe yangsankü iula-e. Apaüh lulatsün apem tsangkü apa miame.

²⁵Apa mongai noi nou akaungio nouso tsangsheikü sung-e, nungtiphe apaüh kaukü, “asam ongko Goa atsüoting noin” ta ngiokü Apa amkham-e.

²⁶Deisinioso ngü nung ngio-e. Asam tilai amkham thaiutha kamshi-e, khaiunia tsaküh jih tsak, amao nou atsandeau, amao nou atsangshei sungtsün tsak, loüh ngio mothikü athatlu chitetsün tsak. Nungso apem donthe oukong-iau thaiutha lüchhi.

²⁷Ngio mothikü nou chitenai, khaiunia nime hau tsüdekünai apiating nai süme hau li-ekü lüchite-i, naiuso khaiunia tsak hau nung ngio lüthunkiu-i.

²⁸Lüko ngiothuntsün tsünoikünai, ngio chitetsün donthe nai tsamkü anoi-i, naiuso apaüh meshen ko naiuso Goa ko lüchite-i.

²⁹Naiuso achimtsün nime tsüdekünai süme lüchite-i, küta amaohai hau lü-anglu-i.

³⁰Lüko akamnai noitsün amaohai tsak tü atsangshei sungtsün tsak ngela-inai, aya chitetsün tsamkü anoi-i.

³¹Tititenai apem nou ngeloau naiuso lotsüoau thaiutha asam apem nou tsakühjam tsakühjam ta chimau shio.

³²Goa ngem pungpengtsün paopei nou achitetsün kankeiau noin.

³³Tiautenai Goa nou sam pülaikü tsüde, lüko ajeiai nai naiuso aalu nai noi-iau aiuji.

³⁴Donthe nai nyiuhai nyankü anoi-i. Tititenai ngüso ngio chiteau ayam tsünoi, lüko Yihudahai ngiokhem nou ngiotsünli, ngüso akhemai lütaiu.

³⁵Ngüsoüh tso ngeluau aiunai, meshen tsamai tsammongpo hai tü lüsangi, tititenai nyiuhaiüh donthe nai ngio chiteau amiam.

³⁶Tsüdekünai nung Goa ngio nou asam ainou shiau shio-e süne? tsüdekünai nung ngio asam dongailu shi-iu süne?

³⁷Asam ongko ajantsoüh apa Goa hongthon tsüdekünai Onthso khaiunia ta yangnai, ngü asam dongai ti satkiuji nung APAOU Ngiokhem noin ta apa hau lüngela-i.

³⁸Lüko apaüh nung da angio angau tsümongkiunaito, apa da lamonglam.

³⁹Nungtiphe jü deisinioso, Goa ngio achimau thatü lümongchio, naiuso ngio mothikü chiteau lalolao.

⁴⁰Lüko chhi apem aluau meikü naiuso lingtaiukü lüchhi.