Read Khiamniungan Naga 1 Korint 15 Bible Online

1 Korint 15 - Khiamniungan Naga bible

1 Korint 15

¹Lo ngü asam tü chimtsün Ngem Amei sübao asamüh loum, naiuso nung amonglam nou da asam mongkü tsaji, naiuso sübao nou asam kipsan, nung Ngem Amei thaiutha asam tü ngioshiau aiuji.

²Ngü asam tü chimtsün ngio asamüh mongkü thalonai, asam kipsankü noin, tsüdekünaito asam amonglam yaang.

³Tititenai apem chiko atengting ngü ti loum, ngü nung asam tü chimji. Asiongio nai satkü taiutsünli, asam chaithe thaiutha Khrista een,

⁴küta khanan. Loüh Asiongio nai satkü taiutsünli, samnyi nouko apa ahkü shin.

⁵Apa Peter naiuso sahoi chekü nime khako sung.

⁶Nungai atao tsak ko apa tü hoiluttsün 500 chiai shikü dongai sung, ngüso ongko apia nou losaokü aa noin, lüko ajantso eaniu.

⁷Nungai apa Yakob naiuso hongthonhoi apem dongai shin.

⁸Khaiunia achetau atao mosaokü chettsünli ngo noilükoaphiting nai apem chiko apa jü dongai lüko tsangsheikü sung.

⁹Tititenai ngo hongthonhoi ongko ehenting naiuso hongthon ta jonau tsümai, tiautenai ngü Goa donthe omhe-i.

¹⁰Lüko Goa atsüojin tsangkü ngo ti noin nung noin, naiuso apaüh ngü hau kiutsün nung atsüojin yaang tsüde. Nungtü jeishikü ngü amao honghoi tü tekkü kongkü chhi, nungti lüko atsüoting jüchhi tsüde, lüko Goa atsüojin nou ngüko aikü chhiji.

¹¹Nungtiphe ngü ainou tsüdekünai ngüso ainou shilüko, nung sam chikü nou chimji, naiuso nung da asamüh monglamji.

¹²Loüh Khrista ee ainou ahkü shin ta chimnai, ee nouso ahkü shitsün tsünoi ta titi asam ongko ajantsoüh ngioji?

¹³Lüko ee nouso ahkü shitsün tsünoikünai, Khrista lüko ahkü tsüshi.

¹⁴Naiuso Khrista ahkü tsüshinai, samüh chimtsün yaang, naiuso asam amonglam lüko yaang.

¹⁵Nunglu tsüde, sam Goa thaiutha atsüotsüdekü epsanji, tititenai Goa nou Khrista ahkü shi-in, ta samüh mitha kiu: nungtiphe atsüoting ee nouso ahkü tsüshikünai apaüh Khrista ahkü tsüshi-i-e.

¹⁶Tititenai ee nouso ahkü tsüshikünai, Khrista lüko ahkü tsüshi.

¹⁷Khrista ahkü tsüshinai, asam amonglam yaang, asam loüh meshen chaithe nai noin.

¹⁸Naito sauhai Khrista nai een, ngüso lüko mowan-e.

¹⁹Samüh Khrista tü yangtaiutsün nung goumchiko hau thaiuthalu naito nung goumchi chikü nai amaohai tü tekkü shimkü sam ayangelatau tsak maikü noin.

²⁰Lüko ngiotsüo nouto nung noin: Khrista ee ainou ahkü shin, sauhai ee nai sailakü noin ngüso lüko ahkü shi-e.

²¹Titi khaiunia tsak tsangkü ee nou shin, nungti Khaiunia tsak tsangkü ee nouso ahkü shitsün lüko shin.

²²Adam tsangkü nai apem titi eanji, nungti Khrista tsangkü nai apem aa iula-e.

²³Lüko khaiunia pungkü meshen ayam thakü nai ahkü shi-e; apem chiko ayating Khrista, naiuso amonglamhoi nouso apa ahshitsün tao ahkü shi-e.

²⁴Nungphiai athon nou shi-e, Khristaüh Onthso nokshing nouso, naiuso oukong nouso chikü shiolo-e, küta nokshing nou Po nou Goa phamongai thumkü lethio-e.

²⁵Tititenai Goa nou meshen eh apem apa hok khemai motaiukün lektso Khristaüh nokshing-ela.

²⁶Athonting shioloau eh nou eantsün noi-e.

²⁷Tititenai Asiongio nou ngioji, “Goa nou alum apa hok khemai taiu” nung “alum chikü” ta ngiotsün tsangsheikü, sauüh alum chikü Khrista hok khemai taiuji, nung Goa nou tsümongthio.

²⁸Tilai alum Khrista nokshing khemai taiu-e, nungai Thso nou lüko apa khemai taiu-e, naiuso nung chikü khengai Goa nou thumkü nokshing-e.

²⁹Lo khaiunia sauhaiüh ee thaiutha khiamai lim ngüso thaiutha ti in? Ngüsoüh ti chhi chhisanau yangji? Ajantsoüh ee nouso ahkü tsüshi-e ta ngiotsün nung atsüo naito, tiau khaiunia ajantsoüh ee thaiutha khiamai lim?

³⁰Sam lüko tiauta gontao pungkü angja nai tsaji?

³¹Deisinioso ngo ajekhaiu pungkü ee nou waoheji! nung asam thaiutha APAOU Yisu Khrista nai ngo atsüoting bülomkü ngioji.

³²Ngo nung Ephesa nai “liu thainian” nouko lihetsün nung shesinyih mongyang taiukü naito, ngü ti in shiolo? Lüko ee nouso ahkü tsüshi-etünaito angiotsünli, “samüh heko naiuso shiuko tititenai lühom to sam ean-e”

³³Asam lasapthio-e: “Hai tsümeikü nou sakshi amei nou tsümeikühau iula-iji.”

³⁴Asio iulakü lüchou, naiuso angei lachhi, tititenai khaiunia ajantsoüh Goa tsünge. Asam miam-iau ngü nung ngio chiteji.

³⁵Lüko ajantsoüh ngio-e, “Ee nouso titi ahkü shiji? Naiuso ngüso pem ti khekkü noi-e?

³⁶Ni mainga! ni siupengtsün lelu tsü ekünai aa tsü-iulaji.

³⁷Naiuso ni lelu siuji, nungto pem asamao nou tsüde, lüko wheat tsowoi tsüdekünai amao tso siuji, nung ainou apaipem samsan-e.

³⁸Goa nou nung lelu apaüh mongchiotsünli pem nouko hakü kiuji, apaüh lelu pungkü momo likü apaipem sung-iji.

³⁹Aa noitsün nyih apem in tsaklu tsüde, lüko khaiunia pungkü nyih in tsak noin, naiuso thainian nyih in tsak, waionyih in tsak, ngou nyih in tsak.

⁴⁰Loüh aün pem noin, naiuso goumchi pem noin. Lüko aün nai noitsün pem nouso ajinka in tsak, naiuso goumchi nai noitsün pem nouso ajinka in tsak noin.

⁴¹Aje ajinka in tsak, alei ajinka in tsak, naiuso kianthsüo ajinka in tsak noin, tititenai kianthsüo si kianthsüo lüko ajinka amomo noin.

⁴²Nungti ee nouso ahkü shitsün lüko noin. Pem nou lai khanan, nung amowantsün tsümowankünai ahkü shi-iji.

⁴³Akhanantsün tao outsükong naiuso aleng tsümei lüko oukongkü naiuso aleng meikü ahkü shi-e,

⁴⁴Shesinyih pem khanan, Onthso pem ahkü shi-e. Goumchi pem noinai, Onthso pem lüko noin.

⁴⁵Loüh Asiongio nai ngioji, “Aya khaiunia Adam aa iula.” Aphi Adam nung Khrista aa kiutsün Onthso iula.

⁴⁶Nungti lüko ti Onthso nung aya tsüde, lüko goumchi nou nung aya, küta onthso.

⁴⁷Ayating khaiunia Adam pu nou sheitho, pu ainou shin, nime nou Adam aün ainou shin.

⁴⁸Sauhai goumchi ün noin ngüso goumchi nou shantsünli noin, sauhai aün ün noin nungti ngüso aün ainou saotsün noin.

⁴⁹Sam goumchi nou shantsün khaiunia tholokü noitsünli, nungli aün ainou saotsün khaiunia khekkü tholo-e.

⁵⁰Deisinioso, shesinyih nou Goa nokshing tengkam kamau tsüshioji, tsüdekünai amowantsün nou tsümowankün tengkam kamau tsüshioji ta ngü ngioji.

⁵¹Athaplu, ngü asam tü akaungio tsak ngioji, sam apem nou tsüsai-e, lüko alekta niohap mohapkünai,

⁵²athon jangongmat nai sam apem li-e-e, tititenai jangong mat-e, naiuso ee nouso tsümowankünai ahkü shi-e, naiuso sam pem li-e-e.

⁵³Tititenai nung amowantsün pem, tsümowankün pem iula-e, naiuso nung eantsün pem tsü-eankü iula-e.

⁵⁴Nungtiphe tilai nungso shithawao-e, eantsün pem nung tsüeantsün nai phokle-e, naito Asiongio nai ngiotsün atsüo shithawao-e: “Ee nou lomo-iu; ashiolotsün nou thapungiu!”

⁵⁵“Oh eantsün, ni shiotsün tiai noin? Oh eantsün, ni tawaikiutsün oukong tiai noin!”

⁵⁶Eantsün, atawaitsün oukong chaithe ainou, naiuso chaithe oukong nou ngiokhem ainou.

⁵⁷Lüko Goa nian lülom! Apaüh sam APAOU Yisu Khrista tsangkü sam hau ashiolotsün kiuji!

⁵⁸Nungtiphe ngü tsüojintsün deisinioso, tsülemlemkü mongkü, APAOU chhisiya nai tsüphioau asaita lükowe, tititenai APAOU nai asam chhi nung yaang tsüde, ta asamüh ngen.