Read Khiamniungan Naga 1 Korint 16 Bible Online

1 Korint 16 - Khiamniungan Naga bible

1 Korint 16

¹Lo Yihuda nai noitsün asio khaiunia hachuau tangka shisanau ni sattsün thaiutha: Ngo Galatia donthehoi tü ti chhiau kium, asamüh lüko nung chhiau noin.

²Ngü shinai tangka tsüshikü hau thaiutha anou pungkü asam khaiunia pungküüh momo ouk eptsün likü lüshikamtaiu.

³Tilai ngo shi-e, asamüh sauhai da monglamji, ngüso hau thsamsat kiukü asam chaithio Yirusalem nai hong-e.

⁴Ngo khuau yam noinai ngüso ngüko hakü khu-e.

⁵Ngo Makedonia thsatkü asam dongai shi-e, tititenai ngo Makedonia thsataulu noin.

⁶Tsüngean ngo ah uo thathonkü tsüdekünai atao intso asamko shamkütso-e, naiuso nungphiai ngo tilüsongai khu-e, asamüh ngo süme tsülaokü khutsünko hachuau shio-e.

⁷Ngo yamai ayanlükhun taoko asamko sakhalektso pheteaulu to tsüaiu; APAOU mongchio naito, ngo asamko atao laiukü wankü noiau yangji.

⁸Lüko aopungonyi sümai saokü ngo Ephesa nai shaman-e,

⁹tiautenai eh piakü noilüko chhi asong chhisanau thaiutha kou nou soppankü noin.

¹⁰Loüh Timothi shinai, apa asam ongko mongtsamkü lünoi-i, tititenai ngü chhitsünli apaüh APAOU chhi chhiji.

¹¹Nungtiphe sauüh apa lalochi. Lüko apa jü dongai shiau thaiutha yamai aalu nai lüyanthio, tititenai apa deisiniosoko aikü shiau ngo taiuji.

¹²Lüko deisinio Apollo thaiutha, apa deisiniosoko asam dongai shiau ngü thatü koja. Lüko apa lo shiau mongai ayang tsünoi, lüko tilai atao amei eppe nungai apa shi-e.

¹³Thsümonkü lünoi. Amonglam nai mongkü lütsa. Mong lüsong. Ou lükong.

¹⁴Asamüh chhitsün apem atsüojin nai lüchhi.

¹⁵Loüh deisinioso, (Achaia nai Stephan tsamkhaiu aya khristan iulatsünso, naiuso ngüsoüh asiohoi hachuau meshen chija thumkü kiu ta asamüh ngen.)

¹⁶Asam nungtin khaiunia khemai naiuso APAOU chhi hachukü shitsün apem khemai lünoi ta ngü asam tü kojaji.

¹⁷Stephen, Fortunatu naiuso Achaikus shiphe ngo monglingji, tiautenai asamüh tsüthapungkiutsün ngüsoüh ngühau kiu.

¹⁸Tititenai ngüsoüh asam onthso oulokongtsünli jü onthso oulokongkiu. Nungtiphe asamüh nungtin khaiunia nian jonsanau maikü noin.

¹⁹Asia shingkhan nai donthe nousoüh asam dongai salam kiu-inji. Aquila naiuso Priscilla naiuso ngüso tsamai kamtsün donthehoi nou APAOU nai asam dongai salam thatü mongkü kiu-inji.

²⁰Deisinio apem nou asam dongai salam kiu-inji: Asamüh deisinio si deisinio asio soncheptsün nou salam lükiu-e.

²¹Ngo, Paulüh nung salam nouso meshen pha nou sattsün noin.

²²Sauhaiüh APAOU tü tsütsüojinji, apa athesan lüthe. Sam APAOU shiji! “Maranatha”

²³APAOU Yisu Khrista atsüojin asamko lünoi.

²⁴Yisu Khrista nai jü atsüojin asam apem nouko lünoi.