Read Khiamniungan Naga 1 Korint 2 Bible Online

1 Korint 2 - Khiamniungan Naga bible

1 Korint 2

¹Deisinioso, tilai ngo asam dongai shi, ngio achek tsüdekünai mongyang asong nou Goa mitha kiukü tsüshi.

²Tititenai Yisu Khrista naiuso apa Paiphu nai laluttsün tü simkü ngü asam ongko amao ti tsüngesanau mongchiosan.

³Naiuso ngo asam ongko outsükong, ahat naiuso thatü angaongao nai noiküla;

⁴nai ngü chitetsün naiuso tsandetsünso khaiunia mongyang ngiomei ko nou tsüep, lüko Goa Onthso oukong nou shiolotsünko ep.

⁵Naito, asam amonglam khaiunia chiai tsüde, lüko Goa mongyang chiai noin.

⁶Ngü onthso nouko shekü noitsünso ongko mongthat mongsai ngiongem pungpengji, nung goumchi da nokshingtsün amowantsün oukong tsüdekünai nung goumchi ün tsüde.

⁷Mongyang amei ngü chimtsün nung Goa ün akaungio noin, sübao khaiuniale ainou tsangan, lüko nung apaüh sam ajinka thaiutha goumchi mosaikü aita yakü chosankü wan.

⁸Nung mongyang amei goumchi nokshing nousoüh sauüh tsünge. Ngüsoüh nung ngetünto, ajinka APAOU nou Paiphu nai tsülalut-ela.

⁹Tititenai Asiongio nou ngioji, “Sauüh tilai tsëpkün tsüdekünai tsülukün, sauüh tilai tsüyanglutengkün thawao-e, ta ngiotsün ngio Goa nou apa tü tsüojintsünso hau khemkü taim.”

¹⁰Lüko Goa nou akaungio nung apa Onthso tsangkü sam hau nge-in. Goa mongyang akheiteng saokü alum Onthso nou ngeji.

¹¹Tititenai khaiunia da noitsün onthso tü simkü khaiunia mongko sauüh khaiunia mongyang ngeji? Nungti Goa Onthso tü simkü sauüh Goa mongyang tsünge.

¹²Samüh nung goumchi onthso tsülo, nungliko Goa hau kiutsün ngeau samüh Goa nou hongtsün Onthso nou lu.

¹³Nungti naito, samüh khaiunia mongyang ngio nouso tsangkü tsüchimji, lüko Onthso ngio nouso tsangkü nai tsandeji, samüh Onthso taiutsünso tü Onthso ngiotsüo nouso chiteji.

¹⁴Goumchi khaiunia nou Goa Onthso paopei nouso tsüluji; tititenai ngüso apa thaiutha tsüngekün noin. Naiuso apaüh ngüso ngeau tsüshio, tititenai ngüso onthso taiutsün tsangkülu mikhem-e.

¹⁵Sauhaiüh Onthso taim nungsoühlu alum nge-e, lüko sauüh apa mikhemao tsüshio.

¹⁶Asiongio nou, “Sauüh APAOU mong ngeji? Sauüh Apa hau ayamhan kiuao shio-e?” Tititenai sam da Khrista mong noin ta ngioji.