Read Khiamniungan Naga 1 Korint 3 Bible Online

1 Korint 3 - Khiamniungan Naga bible

1 Korint 3

¹Deisinioso, ngo asamko Onthso khaiuniako chitetsünli chiteau tsüshio, lüko asam nung goumchi khaiuniali naiuso Khrista nai methsohoili ngü asamko chiteji.

²Ngo asam chih ajüoche nou tsütsad, lüko jangnyao nou tsad, tititenai asamüh nung amonglam luao tsüshio, naiuso loüh tsüshioji, tiautenai asam loüh nyih noin.

³Tiautenai losaokü asam goumchi khaiuniali kihji. Asam ongko niokia naiuso ali-etsün noiphe nung tsangkü asam nung goumchi saisile nai noin ta tsühanjiso?

⁴Tiautenai tsaküh “Ngo Paul sahoi,” naiuso amao tsak nou “Ngo Apolo sahoi,” ta ngionai asam nyih khaiunia tsüdeso?

⁵Naito Apolo naiuso Paul sau? Ngüsoto ayathsüotsünso, ngüso tsangkü asamüh monglam, naiuso ngüso pungkü hau APAOU nou kiutsün yangkü ngüsoüh chhi.

⁶Ngo thom, Apoloüh khiam thsalut, lüko Goa nou samsan-i.

⁷Nungtiphe sauüh thom, tsüdekünai sauüh khiam thsalut; ngüso ti tsünoi, lüko Goa nou samsan-in.

⁸Sauüh thom naiuso sauüh khiam thsalut ngüne wekü, lüko ngüso pungkü nou meshen chhi yangkü paopei eppe.

⁹Tititenai sam Goa nouko aikü chhi chhitsünso, naiuso asam Goa ün eiu nouso noin. Loüh asam Goa tsam noin.

¹⁰Goa nou ngü hau kiutsün atsüojin yangkü, mongthat taiutsün asong tsamlahai tsakli ngo tsam nou lahsaniu, naiuso amaohaiüh nung chiai lahlutji. Lüko khaiunia pungkü nou titi lahsanji nung thaiutha lütsüo.

¹¹Tititenai Goa nou Yisu Khrista tsangkülu athanya au oukong kiu, nungtü simkü sauüh amao lahsanau tsüshio-e.

¹²Nung chiai ajantsoüh chaiou, tangkason, chaiou lung, naiuso ajantsoüh pai, sang, tsokap nou lahlut-e.

¹³Khaiunia pungkü nou chhisantsün tsangsheikü sunge, tiautenai Khrista Ajekhaiu nou nung han-e, tititenai nung in nou tsangkü achiai sung-e, khaiunia pungkü chhi titi nung in nou lilu-e.

¹⁴Nung achiai lahluttsün khaiunia ajantso chhi poisankü taiunai, apaüh alesan eppe.

¹⁵Khaiunia ajantso chhi jahwan nai, apa sappate, lüko apato in ainou thakhutsünli kipsan-e.

¹⁶Asam Goa amkham tsam, naiuso Goa Onthso asam da noiji ta asamüh nge-en!

¹⁷Khaiunia ajantsoüh Goa amkham Tsam lothenai, Goa nou apa lothe-e, tititenai Goa amkham tsam asio naiuso nung asam noin.

¹⁸Sauüh meshen chija lasapthiolo. Asam ongko ajantsoüh nung goumchi mongyang nai mongthat amei ta yangnai apa mongthat pungtsün atsüo iulaau thaiutha tsüngekün lü-iula.

¹⁹Tititenai nung goumchi mongthat nou Goa khako tsüngekün noin. Asiongio nou ngioji, “APAOU nou mongthat amei nouso meshen akausai nai thaluji.”

²⁰Naiuso loüh Asiongio tsakai ngioji, “APAOU nou mongthat amei nousoüh thattsün yaang ta ngeji.”

²¹Nungtiphe sauüh khaiunia nou chhisantsün thaiutha labülom, tititenai apem asam ün;

²²Paul lüko, Apolo lüko, Peter lüko, goumchi lüko, ee lüko, aa lüko, ashiau nou lüko, apem asam ün.

²³Naiuso sam Khrista ün, naiuso Khrista Goa ün.