Read Khiamniungan Naga 1 Korint 4 Bible Online

1 Korint 4 - Khiamniungan Naga bible

1 Korint 4

¹Asamüh sam sauhai Goa akaungiotsüo nouso ngelaau taiukiu, sam Khrista yathsüotsünsoli ayangsan.

²Ayathsüotsün nou chhiau nou apa meshen APAOU tü angio angau noin.

³Lo, ngü asam tsangkü mi yamau thaiutha tsüyangting, tsüdekünai khaiunia saisile tsangkü ngo jü chija lüko mikhem tsükiuji.

⁴Jü mongyang siokü noin, lüko nungüh ngü atsüoting siokü noin ta tsüpen-iji. Jüchiai mikhem kiutsünto APAOU lu noin.

⁵Nungtiphe atao tongtü moshikün khako asamüh sau tü mikhem lakiu. Athon mikhem nouto APAOU moshikün lektso taiu-e; apaüh anyakhem akaungio nouso awon nai kanjikan-e, naiuso khaiuniahoi akhei mongyang achiai sungi-e. Nungai khaiunia pungkü nou Goa ainou meshen nianlom epau noitsün eppe.

⁶Deisinioso, asam thako sam nime Apolo naiuso ngo, asamhau athatluau kiu, tiautenai ti ngiohei ngio ngioji nung asamüh ngeluau, “Ngiokhem atha nouso lükankei.” Asam saulünou khaiunia tsak ta labülom naiuso amao tsak nou lalochi.

⁷Sauüh asam amaohai chiai noi-iji? Asamüh taiutsün alum Goa nou tsükiuso? Naito asamüh taiutsün paopei tsüdeli asam titi bülom-e?

⁸Asamüh apoutsün atsüoting taiumso? Asam memeiso? sam tsüde, lüko asam nokpaohoi iula-iuso? Ah, sam lüko asamko aikü nokshing theau shiokü hau ngo asam nokpaoau theau aiuji.

⁹Tititenai e-eau thatkiutsün khaiunia nousoli Goa nou athontingau thekü sam nungti hongthonhoi sungi ta ngü yangji, tititenai goumchi khako, aün honghoi khako, naiuso khaiuniahoi khako sam atheau tsak iula-iu.

¹⁰Khrista thaiutha sam tsüngekünso noin, lüko asam mongthat amei nouso noin! Sam outsükong lüko asam oukong! Asam nianlom noin, lüko samto nianlochi noin!

¹¹Lotao saokü sam naiuji naiuso leji, tsosa naiuso omhekü noin, sam woiatkü noin, naiuso athang tsak ainou tsakai ta tsakeiji,

¹²naiuso samüh meshen pha nou kongkü chhitsün shioko tanji. Sam alutsao nai noin lüko asam nianlom nai noin.

¹³Nianlochi kiunai samüh atsüojin nou thashiji, losaokü sam goumchi jengtsaiu beisikinli iula-iji!

¹⁴Ngü nungso asam miamiau tsüsatji, lüko asam ngü tsüojintsün thsoso ta nge-iau satji.

¹⁵Tititenai asam Khrista nai achimtsün heng che noilüko, asam po tsaklu noin, tititenai Ngem Amei tsangkü Yisu Khrista nai ngo asam po au iula.

¹⁶Nungtiphe asam jüsakshi ngelotsünso lüthe ta, ngü kojaji.

¹⁷Nung thaiutha APAOU nai ngo monglamtsün naiuso Khristan aa nai ngo tsüojintsün jü thso, Timothi asam dongai hongji. Naiuso ngü donthe apemai titi tsandeji, nungti Khrista nai ngü chimtsün yam apem apaüh asam hau yangsani-e.

¹⁸Ngo asam dongai tsüshi-e ta yangkü asam ongko ajantsoüh bülomji.

¹⁹Lüko APAOU nou mongchionai, ngo asam dongai shakta shi-e, naiuso nungai jü chija ngü abülom nouso ngio tsüde, lüko ngüso ti oukong tsangkü bülomji nung ngela-e.

²⁰Tititenai Goa nokshing nung ngiolu tsüde, lüko oukong nai noin.

²¹Asamüh ti mongchioji? Ngo asam dongai ashiuh au pai kankü shi-e süne, tsüdekünai atsüojin nai naiuso amongmei onthso nai shi-e?