Read Khiamniungan Naga 1 Korint 5 Bible Online

1 Korint 5 - Khiamniungan Naga bible

1 Korint 5

¹Asam ongko ajisiwop sübao Goa tsüngekünhoi ongko lüko tsüep, lüko asam ongko tsaküh meshen po ün nyiu yan ko kamhaji ta ngiongem atsüoting shi-iu.

²Nungaito asam titi bülomji? sauüh nungtin chhi nou chhiji apa asam ong ainou soianiaubao mongsaiukü hau noiküla.

³Tititenai ngo jüpem asamko tsüha lüko onthso nai hatsünli nung chhitsün khaiunia nou ngü mikhem kiu-iu.

⁴Jü onthso nai asam kamshikü eptsünli sam APAOU Yisu Khrista oukong samko hatsün nou ngo asamko pheten,

⁵asamüh nung khaiunia nou apa pem lotheanau thaiutha, apa onthso APAOU ajekhaiu nouko nai kipsankü hau Biya hau thumkü kiu-iu.

⁶Asam bülomtsün amei tsüde! Asamüh nungti ngiotsün ngeji, “Phoplao ehen tsak nou themtsai apem pek-iji.”

⁷Asamüh akeng phoplao nou lowanau noin, nungaito asam thumkü asio noi-e. Naiuso asam phoplao tsüthiokün themtsai ayan tsak khekkü noi-e, atsüoting asam ngo atsüo nungti ngeji. Tititenai sam Aasantsün Sümai lo khemkü taim, nungko sam Aasantsün Sümai nouko Onnemokthso, aa chaithio nou Khrista kiu-iu.

⁸Nungtiphe phoplao akeng tsümeikü nou tsüde, tsüdekünai mong chaithe suntsün nou tsüde, lüko atsüoting naiuso ngiotsüo phoplao tsüthiokün themtsai sümai nou samüh saoheko.

⁹Asam ajisiwop ko lahai ta ngo asam dongai jü thsamsat satkiu.

¹⁰Lo ngü nung Goa tsüngekün ajisiwop nouso, tsüdekünai achinektsünso, kau nouso, naiuso paisilung amtsünso ta tsüngioji. Ngüso wanau thaiutha asam nung goumchi ainou thumkü soianau noin.

¹¹Lüko deisinio ta jontsün khaiunia ajantso ajisiwop, achinektsün, sotsom goa amtsün, alotsaotsün, thengshiu, tsüdekünai apia aiutsün noinai, nungtinko ehe lüko laheshiuha ta lo ngo asam dongai satji.

¹²Tititenai tsümonglamkünso mikhemau ngo ti ayam noin? Goa nou ngüso mi khem-e.

¹³Lüko asamüh asam ongai noitsünso mi tsükhem-e süne? Asiongio nou ngiotsünli, “Tsümeikün khaiunia asamhoi ainou lüsoi-an-i.”