Read Khiamniungan Naga 1 Korint 6 Bible Online

1 Korint 6 - Khiamniungan Naga bible

1 Korint 6

¹Asam ajantsoüh deisinio ongko misingem losannai, donthehai letaiukü don tsüthekünso dongai mikhem khuao mongsongji süne?

²Goa khaiuniahoi nou goumchi mi khem-e ta asamüh tsüngeso? Naiuso asamüh goumchi mi khemnai, mi ehen nou khemau asam tsüshio süne?

³Samüh aünhonghoi mi lüko khem-e asamüh tsüngioso? Naito nung goumchi aakih nouso tü mi tititso tekkü yam-e!

⁴Nungtiphe nung goumchi thaiutha asamüh mi khemau noinai, donthe nai nian tsünoikünso hau mi nou khemi-e süne?

⁵Asam thaiutha amiam! Deisinio jetko mi khemao asam ongko mongthat amei khaiunia tsak lüko tsüeppe süne?

⁶Amonglam khaiunia tsak haisihai thako mi khemtsün nai khutsün liko tsümonglamkünso khakobao mi nou khemji!

⁷Atsüoting lo lüko asam tsaküh tsak ko mi ngemtsün tsangkü asam ashio tsüep ta sasakü hanji. Asamüh nungti kankei noukoto tiau aphiowan noubao tsütheji? Tsüdekünai meshen tangkabao tsü aplo-iji?

⁸Tsüde, lüko asamüh asam chija aphio chhiji, naiuso laple nou tangka loküta nungso asam deisinioso thakobao chhiji!

⁹Atsüoting tsüsiokünhoi nou Goa nokshing tengkam tsükam-e ta asamüh nge-en. Asam lasapthio-e; chhi tsümeikü kankeitsün lüko, sotsom goa amtsün lüko, ajisiwop lüko, sai tsüdekü nou kankeitsün lüko, pohaiüh pohaiko tsümeikü kankeitsün lüko,

¹⁰kauhai lüko, achinek lüko, thengtok hoi lüko, alutsüaiukün lüko, kau lüko, nungsoüh Goa nokshing tengkam tsüeppe.

¹¹Nungtin asam ongko ajantso noiküla, lüko sam APAOU Yisu Khrista nianko naiuso Goa Onthso nai asam tsawaniu, asam losiolo-iu, asam penkiu-iu.

¹²“Ngü alum chhiau ayam noin,” ta ajantsoüh ngio-e, lüko athaiutha alum to ayam tsünoi. Ngü alum chhiau ayam noin ta ngioau shio-e, lüko nungso chhi nou ngo sua ao tsü-iula-i-e.

¹³Ajantsoüh ngio-e, “Thai thaiutha eheshiu, naiuso eheshiu thaiutha thai.” Lüko Goa nou nungne nemtso lothe-e. Pem nou ajisiwop thaiutha tsüde, lüko APAOU yathsüoau thaiutha, naiuso APAOU nou pem tü paotsangji.

¹⁴Goa nou APAOU Yisu ahkü shi-in, naiuso sam lüko apa oukong tsangkü ahkü shi-e.

¹⁵Asamüh asam pem Khrista pem nai oujei noin ta nge-en, naito ngü Khrista uojei kankü khukü ajisiwop nyiuhai ko uojei iula-e süne? Nung tilaitso tsü-iula-e!

¹⁶Tsüdekünai sau ajisiwop nyiuhaiko hai-e, apako nyih tsaklu iulaji ta asamüh tsüngeso? Asiongio nou thatü sasakü ngioji, “Ngüne nyih tsaklu iula-e.”

¹⁷Lüko APAOU nouko sau jeiai-e, apa, Apa Onthsoko tsaklu.

¹⁸Ajisiwop ainou lükhulo. Amao chaithe khaiunia nou sunlotsün nou apa pem tsülotheji, lüko sauhaiüh ajisiwop kankei-e, apaüh meshen pem thako chaithe kankeiji.

¹⁹Goa nou asam hau sau kiukü nung asam da noin, nung Asio Onthso amkham tsam asam pem noin ta asamüh tsüngeso?

²⁰Tititenai asam maikü kiukü tuhsan, nungtiphe asam pem nai Goa ajin lükha-i.