Read Khiamniungan Naga 1 Korint 7 Bible Online

1 Korint 7 - Khiamniungan Naga bible

1 Korint 7

¹Lo asamüh sattsün thaiutha nai: Pohaiüh tsamsigoh tsüyang naibao mei.

²Lüko ajisiwop nou miankü noiphe, pohai pungkü nou meshen tsammongnyiu lütaiu, naiuso nyiuhai pungkü nou meshen tengkhaiu tsammongpo lütaiu.

³Pohai tsaküh meshen chhi tsak shithawao-iau noin, naiuso nyiuhai tsaküh meshen chhi shithawao-iau noin, naiuso tsaküh tsak apoutsün mongtsamiau noin.

⁴Tsammongnyiu tsak meshen pem khaiuko Apaou tsüde, lüko tsammongpo nou Apaou nungtilu tsammongpo nou meshen pem khaiuko Apaou tsüde, lüko tsammongnyiu nou Apaou.

⁵Ayating asamüh asam atao sakhalektso misaonai wanau thaiutha mongchioekü tsüdekün lektsoto, asamüh tsaküh tsak ta tsüthalu-ekü lanoi, lüko nungphiai lüko aya jeiaitsün nai lünoishi. Asam meshen chija athatsamlo tsünoikün shioko Biya alilu ainou nungtili asam taiu-e.

⁶Lüko nung thaiutha ngü ngiokhem tsükiuji, angiolu ngioluji.

⁷Ngü mongchiotsünto khaiunia apem ngülilu iula-iau aiuji, nungti lüko khaiunia pungkü Goa ainou paopei ajantso in tsak, ajantso in tsak ta epkü noin.

⁸Lüko ngü tsamsigoh moyangkünso naiuso jihi nouso tü ngioji, Ngüli noiau ngüso thaiutha mei.

⁹Lüko ngüsoüh meshen pem akiploau tsüshiokünai, tsamsigoh lüyanglo, tititenai ajisiwop noukoto tsamsigoh yangnai chen.

¹⁰Tsamsigoh shantsün tü loüh APAOU nou; tsammongnyiu nou tsammongpo ainou tsüpunge-e ta ngiokhem kiuji.

¹¹Lüko pungeannaito, apa jihi ta lüwanan, nungti tsüdekünaito apa tsammongpo nouko lüjeiai; naiuso tsammongpo nou meshen tsammongnyiu ainou lapunge.

¹²Lüko APAOU nou tsüdekü amaohai tü ngo ngioji, deisinio ajantso tsümonglamkün menyiu tsak ko haikü, apaüh nung menyiu jonau aiunai, apa ainou pungekü lakhu.

¹³Naiuso tsammongnyiu ajantso tsammongpo tsümonglamkün noinai, naiuso apaüh apako kih au aiunai, apa ainou pungekü lakhu.

¹⁴Tititenai tsümonglamkün tsammongpo nung tsammongnyiu nou losioloji, naiuso tsümonglamkün tsammongnyiu nung tsammongpo nou losioloji. Nungti tsüdekünai asam thso asio tsüde, lüko lo ngüso asio.

¹⁵Lüko tsümonglamkün shioko pungeau aiunai, apa lükhu-i. Nungtin ko amonglamtsün deisinio tsüdekünai nuosinio keshikü tsünoi, tititenai Goa nou sam aalo nai noiau jon.

¹⁶Oh tsammongnyiu, ni tsammongpo kipsane süne tsükipsane, ni titi ngen, naiuso tsammongpo ni tsammongnyiu kipsane süne tsükipsane ni titi ngen?

¹⁷Khaiunia pungkü APAOU nou apa hau ti paopei kiu naiuso aküo nai jon, nungti lükih. Nung ngiokhem ngü donthe apemai chimji.

¹⁸Atippantsün khaiunia tsaküh Goa ün ajontsün lounai, apaüh atippantsün aleng ii lowanau lakowe; naiuso tsütippankün khaiunia tsaküh Goa ün ajontsün lounai, apaüh tippanaulu lakowe.

¹⁹Tititenai khaiunia tsak tippan süne tsütippan nung ti tsünoi; lüko Goa Ngiokhem nouso kankeitsün naibao ouk noin.

²⁰Khaiunia pungkü ti aküoko noinai jon, nungtilu lünoi.

²¹Ni sua aküo nouko noinai jon süne? Nung thaiutha layangshi, lüko ni khaiuniatsüo iulaau shionai, nungbao chen.

²²Sua khaiunia sau APAOU nou jon, apa APAOU ün khaiuniatsüo, nung khekkü khaiuniatsüo sau Khristaüh jon apa Khrista sua.

²³Asam amai thamaikü thamkü tuh, khaiunia sua la-iula.

²⁴Deisinioso, khaiunia pungkü momo ti aküo nai noikuai jon, nungtilu Goa nouko lünoi.

²⁵Tsamsigoh tsüyangkün khaiuniahoi thaiutha ayangluao: Ngü hau APAOU nou athoilut tsükiu, lüko ngo mongtsüoau APAOU ainou atsüojinyang tinkü eptsünli ngü yangtsün ngioko.

²⁶Nung angja noiphe khaiunia pungkü apa titi noin, nungtilu noiau mei ta ngo yangji.

²⁷Ni tsammongnyiu jontaim süne? Apa konou pungeau layang. Ni tsamsigoh tsüyangkün süne? Tsammongnyiu layam.

²⁸Lüko ni tsamsigoh yangnai, aphio tsüsunheji, naiuso mesohaiüh tsamsigoh yangnai apaüh aphio tsüsunheji. Ngü nung tsamsigoh yangtsünso angjatsün ainou thakhuao ngioji.

²⁹Lüko deisinioso, ngü yangtsünto nungti noin: atao laiukü tsünoishiphe, lo nai yakü tsamsigoh yangkü noitsün khaiunia nouso tsamsigoh tsüyangli lü-iula;

³⁰sauhai shapji, ngüso tsümongsaiukünsoli; sauhai nyaiji, ngüso tsümonglingkünsoli, sauhaiüh tuhji, ngüsoüh tuhtsün ngüso ün tsüdeli;

³¹sauhaiüh goumchi jengtsaiu kankeiji, nungüh ngüso apemko thumkü tsüthaluli lünoi. Lo noinli nung goumchi thaiutha laiukü tsünoi-e.

³²Lüko ngü asam yangelattsün lohekkü iula-iau aiuji. Tsamsigoh moyangkün khaiunia nou APAOU chhi thaiutha naiuso APAOU titi monglingi-e, nungso thaiutha yangji.

³³Lüko tsamsigoh yangkü noitsün khaiunia nou goumchi chhi thaiutha naiuso meshen tsammongnyiu titi monglingi-e nungso thaiutha yangji.

³⁴Nungtiphe apa mongai ajanpai noin. Tsamsigoh tsüyangkün mesohaiüh yangtsün nung meshen pem si onthso ne ai asio theau APAOU chhi thaiutha yangji. Lüko tsamsigoh yangtsün nyiuhaiüh goumchi chhi thaiutha naiuso meshen tsammongpo titi monglingi-e, nungso thaiutha yangji

³⁵Ngü tü hachuao yangtsün tsangkü nung ngioji, ngü asam hau akeshitsün tsak taiukiuao thaiutha nung tsüngioji, lüko tsüangjakü thakü APAOU yathsüo-ikü noi-iau naiuso asam meiau thaiutha ngioji.

³⁶Pühe meso akih-au nyungetsün yamko nai sauüh tsamsigoh tsüyangau thalou, pühe nou meso khako saisile thakü tsükankeiji ta yangnai, naiuso apa shesinyih amongchio thatü songkü noinai, naiuso apaüh ngüne tsamsigoh yangau noin ta yangnaito, apaüh aiutsünli ngüne tsamsigoh yangiau noin, nungko aphio tsünoi.

³⁷Lüko melo nou tsamsigoh tsüyangau apa mongai mongkü thalukü noinai, nungtü chhiaulu ta choi-au tsünoi, naiuso apa mongpemai ti chhi-e nung thumkü thatsamkü thalunaito, nung meso nouko tsamsigoh tsüyangau apaüh meikü chhi-iu.

³⁸Nungtiphe melo sauüh tsamsigoh yangji apaüh amei chhiji, lüko sauüh tsamsigoh tsüyang loüh apaüh meijeng chhiji.

³⁹Tsammongpo aa noin lektso tsammongnyiu keshikü noin. Lüko tsammongpo eannai, apaüh sau dongai khuao aiuji, apa mong, lüko APAOU da monglamtsün ongkolu apa tsamsigoh ashankiu.

⁴⁰Lüko apa tsamsigoh tsüyangshikü noinai mongling jenge ta ngo yangji, naiuso Goa Onthso ngüko lüko han ta ngo yangji.