Read Khiamniungan Naga 1 Korint 9 Bible Online

1 Korint 9 - Khiamniungan Naga bible

1 Korint 9

¹Ngo khaiuniatsüo tsüdeso? Ngo hongthonhoi tsüdeso? Ngo Yisu sam APAOU tsüepso? APAOU thaiutha asam jüchhi ainou lesantsünso tsüdeso?

²Amaohaiüh ngo hongthon tsakli tsülou lüko, asamühto atsüoting lou-e! Tiautenai asam aakih asam chija APAOU ko jeiai nou, ngo hongthon tsak ta mitha kiuji.

³Tilai khaiuniahoi nou ngü lotsaoji, nungai jü chija ngü pentsün noin:

⁴Jü chhi thaiutha ngühau eheshiu kiuau ayam tsünoi süne?

⁵Amao hongthonhoi naiuso APAOU deisinioso, naiuso Peterühli ngü amonglam nyiuhai tsak niakeiau ayam tsünoi süne?

⁶Tsüdekünai ngo naiuso Barnaba je sam aa thaiutha chhi tsüchhikü noiau tsüshio süne?

⁷Süpai sauüh meshen eheshiu thaiutha tangka wanji? Eiu-a khaiunia nou meshen eiu ainou sainaoshep heau tsüshioso? Onnemok jimtsün nou meshen onnemok da anyao thiploau tsüshioso?

⁸Nungso ajekhaiu pungkü athatlu nou ngü jü chija yangelatau tsünoi, tiautenai ngiokhem nou nunglu ngioji.

⁹“Ni jangtso nou tsonyak nyanai ason lakiap,” ta ngiotsün Mosa ngiokhem nai samüh veji. Lo Goa nou jangtsopong thaiutha ngioji süne?

¹⁰Tsüdekünai apaüh nung ngio sam thaiutha ngioji süne? Nung ngio sam thaiutha sat, tititenai sauüh eiu nai lelu lethioji, apaüh ayang noikü lethioau noin, naiuso sauüh yamheji, apaüh be-eiuyam haoson eppe ta yangkü yamheau noin.

¹¹Samüh asam ongko Onthso lelu lethio-iu. Asam ainou samüh jengtsaiu alesan yamlonai nung thatü athsüoting ta yangji süne?

¹²Amaohaiüh nung asam ainou epau ayam naito, samüh nungtü tekkü songkü eppau ayam tsüdeso? Lüko samüh nungti tsükankei. Nunglikoto, samüh Khrista thaiutha Ngem Amei yamai akiapjei tsünoiau alum jeilo.

¹³Amkham tsamai asio jengtsaiu kankeitsünsoüh chaithiotsün heji, naiuso chaithiotsün nai yathsüotsünsoüh chaithiotsün ainou meshen haoson epji, nung asamüh ngen.

¹⁴Nunglilu, sauhai APAOU Ngem Amei chimtsün nai noin, ngüsoüh Ngem Amei chimtsün ainou ngüso aa eheshiu epau ngiokhem kiu.

¹⁵Lüko ngo nungti tsükankei, naiuso jü thaiutha nungti kankei-iau ngü nungso ngio tsüsatji, tititenai ngo bülomtsün yaang iula-itsün noukoto ngo eanbao chen! Sauüh ngü thakü bülomtsün ngiokeng nai tsüphoklekiu-e!

¹⁶Tititenai ngü Ngem Amei chimnai, ngo ti abülomau tsünoi, tiautenai nung thsa ngü da kanlutkü noin. Tititenai ngü Ngem Amei nou tsüchim nai jü thaiutha inyate!

¹⁷Tititenai ngü nung jü mongchioüh chhinai, ngo amai epau noin, lüko nung jü thsale, tiautenai Goa nou ngü hau nung thsale kiutaiukü noin.

¹⁸Naito, ngü nou alesan ti? Ngem Amei amai tsüyangkü chimau naiuso jü chhi thaiutha amai tsülotsün jü thaiutha amongling.

¹⁹Ngo sau ün sua tsüde lüko, khaiunia piakü shiusanao thaiutha jü chija apem sua iula.

²⁰Yihudahai niajikanau ngo Yihudahai khako Yihudahaili iula; ngiokhem khemai noinso niajikanau, ngo Mosa Ngiokhem khemaito tsünoi lüko, ngiokhem khemai noinso khako, ngo ngiokhem khemai noinsoli iula.

²¹Ngiokhem tsütaiukünso niajikanau, ngo ngiokhem tsütaiukünso khako ngiokhem tsütaiukünsoli iula. Lüko Goa khako ngo ngiokhem tsütaiukü tsüde, lüko Khrista khako ngo ngiokhem khemai noin.

²²Amonglam nai outsükongkünso niajikanau ngo outsükongkünso khako outsükongküli iula. Ashiotsün lektso ajantso kipsanau ngo alumko apem khako apem iula.

²³Nung ouk haoson nouso janeau, nungso chikü ngü Ngem Amei thaiutha chhi.

²⁴Ashe-etsünso apem she-eji, lüko tsakühlu amai epji, nung asamüh nge-en. Nungti asamüh amai epau thaiutha lüshe-e.

²⁵Ashe-etsün pungkü nou amowantsün kandio epau ayamhan thatü tsüokü angkü thumkü kiuji; lüko samüh to athontsüyangkün amai alesan tsak thaiutha chhiji.

²⁶Nungshioko ngo alaothang nou tü thapkü jingji, nungtiphe ngü pha thao-etsün yaang nai tsüdekü atsüo nai thao-etsünli noin.

²⁷Akhengeau nouso jonkam küta ngo akhengeau tsümaikü tsü-iula au jü chija pem kongkü naiuso thatsamkü taiuji.