Read Khiamniungan Naga 2 Korint 1 Bible Online

2 Korint 1 - Khiamniungan Naga bible

2 Korint 1

¹Paul, Goa nou mongchiotsün tsangkü Yisu Khrista hongthon tsak, naiuso sam deisinio Timothi ainou — Korint nai noitsün Goa donthe naiuso Akaya apemai samko hatsün asiohoi apem dongai:

²Sam Po Goa naiuso APAOU Yisu Khrista ainou asam hau atsüojin naiuso aalo lüthe.

³Atsüojinyang Po, Goa sau ainou ahachu apem shiji, samüh APAOU Yisu Khrista nai apa hau nianlom kiuko!

⁴Samüh amaohai angja nai ahachu kiukühau sam Goa nou alum angja nai haloji.

⁵Sam titi Khrista omhe tsangkü piakü nai omhekü noin, nungti Khrista tsangkü Goa ainou sam aalo lüko piakü noin.

⁶Lüko sam angja nai, nung asam aalo naiuso aasan thaiutha noin; sam aalo nai asam lüko aaloji naiuso samüh kiplotsünli angja kiploau oukong kiuji.

⁷Nungtiphe asam da sam ayang noitsün tilaitso tsühenyi, asamüh sam angjatsün nai haoson lohatsün khekkü, loüh asamüh sam ahachu eptsün nai lüko haoson lohaji ta samüh ngeji.

⁸Deisinioso, Asia nai sam da ti angja thawao, nung thaiutha asam hau ngela-iau aiuji, nungai sam oukongüh tsüshiokü thatü omhetsün nou shioko sam aa kih-aulüko ayang tsünoiküla.

⁹Samüh sam dongai ee nou shisao-iu ta yang, lüko nung samüh sam chija ta tsüde, Goa sauüh ee nou ahkü shi-iji apa dalu niolutkü noiau shinapkü noin.

¹⁰Apaüh sam nung eantsün asong ainou kipsan, naiuso kipsan-e, loüh apaüh sam kipsan-e ta monglamji.

¹¹Asamüh sam thaiutha misao tsangkü hachutsünli, sam thaiutha misao piakü saotsün nou thala-e, naiuso Goa nou sam ouk kiu-e, naiuso khaiunia piakü nou sam thaiutha nianlom kiukü ngüso sang asong nou apa tü we-e.

¹²Tititenai shesinyih mongyang nai tsüde, lüko Goa atsüojin nai asio naiuso atsüoting nai samüh goumchiko kankei, naiuso loüh asam khako lüko kankei. Nung sam bülomtsün naiuso sam sansimong mitha noin.

¹³Asamüh ti veau naiuso ngela au shio-e nunglu samüh asam dongai sat. Lüko asamüh lo sam apaitsolu ngela lüko, asamüh nung sam thumkü ngela-e ta ngü yangji.

¹⁴Nungtiphe sam APAOU Yisu ajekhaiu nai asam thaiutha bülomtsünli sam da bülomau shio-e.

¹⁵Asamüh amongling müjam epau thaiutha ngü monglamkü asam dongai shi-e ta mongchiosan.

¹⁶Naiuso asam thsatkü Makedonia ai khukü, loüh Makedonia ainou asam dongai müjam shikü, asamüh ngü Yihuda goumchi ai khutsün yamai yanthio-e ta ngü mongchiosan.

¹⁷Nung chhitsünko ngü mongyang tsümongkü han süne? Ngü nungso chhiau yangsantsün jü mongchio, “Ah, ah” naiuso “Tsüde, tsüde” ta ngioau khemtaiukü chhin süne?

¹⁸Atsüoting Goa nou ngiotsüo chiteji, asam tü ngü thalutsün nou, “Ah,” ta lüko tsüde, naiuso “Tsüde,” ta lüko tsüdekü noiküla.

¹⁹Tititenai Goa Thso Yisu Khrista sau thaiutha Sila, Timothi, naiuso ngo asam ongko chim, apa “Ah” naiuso “Tsüde” ta tsüde, lüko apa to Goa ün “Ah,”

²⁰Tititenai Goa athalou nouso titi noiji nung apem Khrista da “Ah” ta noin. Nung thaiuthalu Goa ajinka thaiutha samüh Yisu Khrista tsangkü “Amen” ta ngioji.

²¹Asamko aikü sam sauüh shanji, nung Goa Apa pem noin, sam aa Khristako jeiaikü shan; sauüh sam mothikü jonsan,

²²sauüh sam tü meshen ün ta athangluttsün ii thanglut, naiuso sam mongpem nai sauüh sam hau Asio Onthso kium nung atao chikü hau apaüh sam thaiutha kamtaiukiu ta chitetsün nung Goa apa pem noin.

²³Lüko asam tsüojin nou shioko — ngo Korint nai tsüshikü jü chija lolao ta jü onthso nouko mitha theau Goa jonji!

²⁴Asamüh ti monglamau noin nung lokülu ta samüh asam tü tsükojaji, asam amonglam nai mongkü tsakü noin ta samüh ngeji. Nungliko sam asam monglingau thaiutha asamko hakü chhi chhiji.