Read Khiamniungan Naga 2 Korint 10 Bible Online

2 Korint 10 - Khiamniungan Naga bible

2 Korint 10

¹Ngo Paul, asam tü tengkhaiukü tsak kojaji, sauüh asamko noinai shitsamkü naiuso mongmeikü theau ngiom, nung ngo, lüko tilai ngo khuwan-e asamko mongsongkü noin. Khrista amongmei naiuso atsüojin tsangkü ngü asam tü kojaji.

²Ngo tilai shi-e, ngo tü mongsong-iau lakongi, tititenai sauhaiüh sam mongsongkü goumchi saisile ainou chhiji ta ngioji ngüso tü ngü mongsongkü chimau shio-e.

³Sam goumchi ko kihji, lüko samüh goumchi saisile ainou tsüli-eji nung atsüo noin.

⁴Sübao samüh ehü tsam nou lotheau kankeiji, nung sahsingiu nouso sam ehli nai kankeitsün goumchi sahsingiu tsüde lüko Goa ün oukongting sahsingiu noin. Samüh atsüotsüdekü khengetsün lotheanji;

⁵Goa ngetsün thako tsatsün abülom yam kiaptsün apem samüh loian-iji, naiuso mongyang apem samüh Khrista tü angio angau thaluji.

⁶Naiuso tilai asam angio angtsün thumkü shinape, angio tsüangkün apem thamshiau sam khemlokü noin.

⁷Asamüh ahchi-leng jengtsaiu noutü thapji. Nungai ajantsoüh apa chija Khrista ün sahoi ta monglamtsün noin süne? Athangteng, apaüh apa thaiutha chija lüyanglushi, tiautenai apaüh chhitsün titso noin nung sam Khrista ün noin.

⁸Tititenai asam alopengau tsüde, lüko ashanao APAOU nou sam hau ti akhemkhu kiu nung thaiutha ngü intso simkü lüsong lüko, ngo tsümiami-e.

⁹Lüko ngo asam jü thsamsat nou lohatau ayang tsüde.

¹⁰Ajantsoüh ngio-e, “apa thsamsat nouso alethsang naiuso oukong, lüko apa pem hatsün outsükong, naiuso apaüh chitetsün ngionai alethsang tsünoi ta ngüsoüh ngioji!”

¹¹Sam tsünoikünai thsam nai sattsün ngionai titi noin, nungti sam hanai chhitsün chhinai lüko noin; nung ngio nungtin khaiunia nou ngelaau noin.

¹²Samüh sam chija sauhai asong noithang nousoai noin nungsoko janekü hau tsüdekünai wehaau tsüsom. Ngüso tititso tsüngekünso noin! Ngüsoüh chija ange tsoithat shanji, naiuso ngüsoüh ngüso chija ange nou mi yamji!

¹³Titilünou sam thaiuthato, sam bülomtsün nou athat chiai shikü tsübülom-e, nung athatsantsün mongko sübao Goa nou sam thaiutha athat taiukium nung mongko chhi noi-e, naiuso nung sam chhi asam ongko mongluji.

¹⁴Tititenai samüh asam tsüshisaolito samüh meshen athatsan tü simkü meshen chija tsütenlaiuji, tititenai samüh Khrista Ngem Amei nai asam shingoikü shin.

¹⁵Nungtiphe Goa nou sam hau taiukiutsün chhi amaohaiüh athatsan chiai shikü chhitsün thaiutha samüh tsübülomji. Nunglikoto samüh asam ongko chhi tekkü asong shiokü chhiau naiuso asaichi Goa nou taiukiutsün athatsan mongko hau samüh asam amonglam song-iau yangji.

¹⁶Naito asam yankü amao goumchi nousoai Ngem Amei chimau samüh shio-e naiuso amao khaiunia ün eiuai sübao chhi chhianiu nung thaiutha tsübülom-e.

¹⁷Lüko Asiongio nou ngiotsünli, “Sauhaiüh bülomau aiuji APAOU nou ti chhin nung thaiutha bülomau noin.”

¹⁸Tititenai sauüh meshen chija mei ta lomlotsün tsangkü tsüde, lüko Goa nou sau tü mei ta lomsanji apa tinkü noin.