Read Khiamniungan Naga 2 Korint 11 Bible Online

2 Korint 11 - Khiamniungan Naga bible

2 Korint 11

¹Asamüh ngü intso maingali noitao lüko ngü ajeilu ta ngü yangji; tsüojinyangkü nungti lüchhi!

²Tititenai ngü Goa achinek nou asam thaiutha chinekji, naiuso ngü asam meso asio tsakli pohai tsak nung Khrista hau kiuau thalou-iu.

³Lüko pao mongthat mongsai nou titi Ev kausaiat, nungti asam Khrista nai noitsün atsüoting ayanthsüo ainou mong lothean-e ta ngü hatji.

⁴Tititenai samüh tsüchimkünou amao Yisu asam tü ajantsoüh chimnai, naiuso asamüh onthso amao tsak lunai, tsüdekünai amao Ngem Amei lunai, asamüh nung khaiunia pungekü taiunai mei!

⁵Ngü asongting “hongthonhoi” ta ngiotsünso tiaitso nyapkü tsü-iula ta yangji!

⁶Ngo ngio chitetsün nai amon tsünoi lüko, ange naito tsüde, samüh asam hau nung atao naiuso aküo chikü nai, sasakü chimiu.

⁷Asam song-iau thaiutha meshen chija henlüshikü Goa Ngem Amei amai tsüyangkü asam tü chimtsün nou ngü aphio süne?

⁸Ngü tilai asam ongko chhikü noiküla, amao donthehoi nousoüh ngü hachu. Angioauto, asam hachu-au thaiuthako, ngo ngüso ap-atkü noiküla.

⁹Naiuso ngo asamko noinai lüko sau da thsa tsükanlute, tititenai tilai deisinioso Makedonia ainou shin, ngüsoüh jü thaiutha poukü noitsün kiu. Naiuso asam da apemai thsa kanluttsün ainou ngü jü chija lolao, naiuso nungti lolao-i!

¹⁰Khrista ngiotsüo ngü da noiphe, Akaya goumchi lemkü nai ngo bülomtsün sauüh tsülolao-e.

¹¹Tiau? Ngü asam tü tsütsüojin nou süne? Goa nou ngeji!

¹²Amao “hongthonhoi” nou abülomtsün thaiutha ti ayam tsütaiuau naiuso ngüsoüh chhitsün wekülu samüh chhiji ta tsüngio-iau lo ngü ti chhiji, nung tsülaokü chhi-e.

¹³Nung khaiunia nouso atsüotsüdekün hongthonhoi ngüsoüh ngüso chhi thaiutha bumji naiuso Khrista hongthon atsüoting ta lusan-iao kausaiji.

¹⁴Naiuso nung ngio angau tsünoi! tititenai Biya nou lüko apa chija aün hongthonhoili li-esanji!

¹⁵Nungtiphe apa yathsüotsünsoüh lüko meshen chija asio yathsüotsünsoli li-esannai, nung thaiutha abülomau ti tsünoi. Athon nai ngüsoüh ti chhin nung thaiutha waokü epshi-e.

¹⁶Ngü müjam ngioji: ngo mainga ta sauüh layang. Asamüh nungti yanglüko, ngü mongsongkü hauli ngü aiusijili lüko alusan-i.

¹⁷Ngü lo ti ngioji nung APAOU nou mongchiotsün tsüde, lüko nung thaiutha nai ngo atsüoting aiusiji haili bülomkü ngioko.

¹⁸Piakü nou nyih phiai mongsongphe ngü lüko songko.

¹⁹Tititenai asam mongyang taiutsün shioko, asamüh monglingkü aiusiji nouso kiplo!

²⁰Sauüh asam sua iula-i, asam tü tsümeikü chhin, asam khuthio, asam alusan tsünoi, asam khakhengai pat, nungso saulünou asamüh kiploji.

²¹Nungso chhiau sam mong thatü tsüsongkü noiküla, nung chiteau ngü miamji! Lüko ajantsoüh tso thaiutha songau somnai, ngü aiusiji haili chiteji, ngo mongsongtsün tsakli noi-e.

²²Ngüso Ibri hai süne? Ngo lüko Ibri hai. Ngüso Israel hai süne? Ngo lüko Israel hai. Ngüso Abraham le süne? Ngo lüko Abraham le noin.

²³Ngüso Khrista yathsüotsünso süne? (Ngo maingahai li chiteji.) Ngü nungtü simkü! Atanat nai, akhoutsamai, ashiutsün thatü thsüokü epnai, eantsün aküoli nai piakü jam.

²⁴Yihuda haiüh atao pungojam, aosam chiai shikü shiutsün ep.

²⁵Romhaiüh ngü ta samjam pai nou shiuh, jam lung nou yak, atao samjam kheng lotheantsün nai latha, sotsu, nyitso ngo khiamnok nai noiküla.

²⁶Süme iutsün nai piaküjam ahthe nou waohe, haiu angja nai, meshen khaiuniaüh angja kiutsün nai, melemaohaiüh angja kiutsünnai, noknio nai noitsünsoüh angja kiutsün nai, liutsa angja nai, atsüotsüdekün deisiniosoüh angja kiutsünnai,

²⁷atanat angja nai, niongao lothekü angjatsünnai piaküjam, naiuso naiusilekü angjatsünnai, hokthekü angjatsünnai piaküjam, atangsep angjanai piaküjam, naiuso tsosa angjanai piaküjam.

²⁸Ngü ngiotsün angja tsehakü donthe apem thaiutha yangelattsün, nung ngü da ajekhaiu pungkü thoilutkü noin.

²⁹Ajantso outsükongkü iulanai, ngü lüko outsükongkü iula. Tilai ajantso chaithe suntsün nai salian, ngo mongkia nou mian.

³⁰Ngo abülomau poukü noinai, ngo jü tsaosilao thaiutha bülom-e.

³¹Ngü atsüotsüdekün ngio tsüchiteji ta asaita ouk kiutsün APAOU Yisu, Po nou Goa nou ngeji.

³²Damaska nai Areta nokpao khemai noitsün nokshingpao nou ngo thaluau thaiutha Damaska hai noksong bekhan jim,

³³lüko ngo kim nai lokthiokü lungpe koukhanthso thsatkü kankü khukü apa pha ainou thakhu.