Read Khiamniungan Naga 2 Korint 12 Bible Online

2 Korint 12 - Khiamniungan Naga bible

2 Korint 12

¹Ti alesan tsünoi lüko ngü abülomau noin. APAOU nou kiutsün atsangshei naiuso tsangsheikü sungtsün thaiutha ngü lo chite-e.

²Pon chekü püle khu-iu, ngo Khrista nai khaiunia tsak sau aün atsokting nai shipkü sung nung tsangsheikü ngeji(nung atsüoting thawao süne apaüh atsangshei ep ngü tsünge Goa noulu ngeji.)

³Ngü laoshikü ngioji, nung khaiunia nou Paradise nai shipkü sung ta ngü ngeji(loüh nung atsüoting thawao süne tsüdekünai atsangshei tsak noiküla ngü tsünge Goa noulu ngeji,)

⁴nungai apaüh achiteau tsüshiokü, nung ngio khaiunia sontham ko chiteau tsüdekün apaüh lula.

⁵Nungtiphe nungtin khaiunia thaiutha ngü bülom-e, lüko ngü meshen thaiutha tsaosilao ta simkü tsübülom-e.

⁶Tititenai ngü bülom nai, ngo aiusiji tsüde, tiautenai ngü atsüoting chite-e. Lüko ngo tsübülom-e tiautenai jü chhi naiuso jü ngio tsangkü tsüdenaito ngü mei-in ta nge-iau tsüaiu.

⁷Atsangshei sungtsünso thatü asongphe, ngü thatü phopkü tsübülomau thaiutha ngü da shiuau Biya ainou hongthon tsak jü dongai hong.

⁸Nung ngü ainou apungeankiu ta ngo APAOU tü samjam koja.

⁹Apaüh ngo tü ngiom, “Jü atsüojin athaiutha saiukü noin, tititenai jü oukongüh tsaosilao nai thapungkiuji.” Nungtiphe Khrista oukong ngesanau ngü thatü monglingatkü tsaosilao nai lüko bülomko.

¹⁰Khrista thaiutha tsaosilao nai, alochi lotsao nai, angjatsün nai, ajeiat nai, naiuso omhe angja waohetsün nai ngo mongtsamji, tititenai tilai ngo outsükongkü noiji, nung taoko ngo oukong epji.

¹¹Ngo mainga hai tsakli chitejilüko nung ngü hau asamüh chhi-iji. Ngü tha si tsütha ta mitha kiuau tsak nou asam noin. Tititenai ngo ti tsüde lüko, ngo asam ün amothi “hongthonhoi” nousoko tiyamkotso ngüso khemai tsünoi.

¹²Atsüoting ii, angawantsün, naiuso athanga chhi kiplokü chhitsün tsangkü ngo asam ongko hongthon tsak tsangsheiji

¹³chai saotsün nai tsüde, nung tü simkü amao donthe nouso akhengai angja kiukü noinai, nung aphio nou ngü hau awankiu!

¹⁴Nungti samjam ngo asam dongai shinai ngo asam hau ti thsale tsükiu-e. Tititenai ngü asam jengtsaiu tsüyamji, lüko asam yamji. Tiautenai thso nousoüh posinyiu nouso thaiutha tsüde, lüko posinyiu nousoüh thso nouso thaiutha tsadau noin.

¹⁵Asam tü hachuao ngo taiutsün naiuso jü aa kiuao ngo thatü mongleng-e. Ngü asam tü tekkü tsüojin nai, ngo tü lotsaokü tsüojinjiso?

¹⁶Naito asam hau ngo thsale tsüiula-i-e, nung asamüh ngesan-e. Lüko ajantsoüh asam tü ngo akausai tsangkü atsüotsüdekün nou thaluwan ta ngio-e.

¹⁷Ngo asam dongai hongtsün ajantsoüh asam kaosaiat süne?

¹⁸Ngü Tita tü lükhu ta koja, naiuso apako khristan deisinio nouso hong. Titaüh asam ainou alesan loumso? Sam mongyang wekünai naiuso sam hokngam wekünai tsükeiso?

¹⁹Samüh asam ainou aphio wanau saoji ta asamüh atao nung lektso yangjiso? Samüh Khrista nai Goa khako chiteji. Naiuso atsüojintsünso, samüh chhitsün apem ta hachuao thaiutha chhin.

²⁰Tilai ngü shi-e, asamüh ngo epau aiutsünli tsüdekü naiuso ngo asam epau aiutsünli tsüdekü epnai ta ngio ngemat, aluau tsüaiukün, mongmat sungtsün, athaipoptsün, akausai eh nou, anamnam nou, akoi, angemattsün noi-e ta ngo hatji.

²¹Tilai ngo müjam shishi-e, jü Goaüh asam khako ngo miami-e, naiuso sauhaiüh kümi chaithe kankei, naiuso ngüsoüh tsüyanthsüokü kankeitsün chhi nouso thaiutha mong tsüphokle, ngüso achinek naiuso ajisiwop chaithe nouso, nungtin khaiunia piakü thaiutha ngo mongkia-e ta yangelatji.