Read Khiamniungan Naga 2 Korint 13 Bible Online

2 Korint 13 - Khiamniungan Naga bible

2 Korint 13

¹Ngo lo nung asam sailu shitsün samjam nou noin. “Tsüngela-ekü tso noinai, mitha ngio nime tsüdekünai süme tsangkü nung janthat kiu-e” ta Asiongio nou ngioji.

²Sauhaiüh kümi chaithe kankei, naiuso amaohai chiküko chiteau aiuji, ngo nungthaiuko asam tü müjam sailutsün taoko nung ngioyak ngio-iu, lüko lo ngo tsünoi ta ngü loüh nung ngioshi-e: nungthan ngo shishinai saulünou aluhat ainou tsüthakhu-e.

³Khristaüh ngü tsangkü chiteji ta asamüh aiutsün mitha chikü tsangshei-e. Tilai apaüh asamko chite-e, apa outsükong tsüde, nungliko apaüh apa oukong asam hau hanji.

⁴Tititenai apa outsükongkün tsangkü paiphu nai lalutkü ee-i lüko Goa oukong tsangkü apa aa noiji. Apako jeiaikü sam lüko outsükong noin, lüko sam asamko aitsün koto samüh Goa ün oukong apa aa nai haoson the-e.

⁵Asam amonglam nai noin süne tsünoi ta epsanau asam chija lülilu naiuso lüthaiusan. Asam thumkü asio noitsün lektso Yisu Khrista asam da noin ta asamüh atsüoting ngeji.

⁶Sam tsüthakünai tsüde ta asamüh nge-e ta ngü monglamji.

⁷Asamüh aphio tsüchhiau samüh Goa tü misao saoji, nung sam ashiotsün noin ta hanau thaiutha tsüde, lüko samto ashio tsüepli yang lüko, asamüh to ti thakü noin nung chhiau noin.

⁸Tititenai samüh ngiotsüo thako ti chhiau tsüshioji, lüko ngiotsüo thaiuthalu chhiji.

⁹Tilai asam outsükongji, nungai monglingji, lüko asam outsükongkü noin. Naiuso asam athapungtsün noiau thaiutha samüh misao saoji.

¹⁰Nungtiphe athapungtsün thaiutha tsüde, ashanloshiau ti oukong APAOU nou ngühau kiu nung oukong liko, ngü tsaokü tsükankeiau thaiutha nung thsamsat nouso satji.

¹¹Athon nai deisinioso, salam sai! Thapungkü lünoi, aalokü lünoi, mong wekü lünoi, jeiaikü lünoi. Nai atsüojin naiuso aalo Goa asamko noi-e.

¹²Tsaküh tsakko asio soncheptsün nou salam lükiu-e. Asiohoi apem nou asam hau salam hongji.

¹³Sam APAOU Yisu Khrista atsüojin, naiuso Goa ün atsüojin, naiuso Asio Onthso nou aalo kiutsün asam apemko hakü lünoi.