Read Khiamniungan Naga 2 Korint 2 Bible Online

2 Korint 2 - Khiamniungan Naga bible

2 Korint 2

¹Nungtiphe ngo asam dongai yangelatikü müjam asailu tsüshi-e ta jü chija mongchiosan.

²Tititenai ngü asam mongmatinai, naito ngo mongmatitsünso tü simkü ngü monglingiau sau noin?

³Nungshioko ngo asam dongai nung thsamsat sat, ngü asam dongai shikü naiuso nung khaiuniateng nouso sauhaiüh ngo monglingi nungüh amongmatiau tsümongchiokü noiküla. Tititenai ngü tilai monglingkü noiji, nungai asam lüko monglingkü noin.

⁴Ngo mong thatü kiatsün naiuso thatü angja nou niochekhiam piakü saokü asam dongai sat; nung asam mongmatiau tsüde, lüko asam ta ngo ti chantso tsüojinji nung nge-iau sat.

⁵Lo khaiunia ajantsoüh ajantso mongmatinai, apaüh nung ngü tü tsüdekü asam apem da chhin (ngo apa wontsaotsün ta tsünge-iau thaiutha nung ngioji.)

⁶Nungtin khaiunia hau asam piakü nou nung alohat kiutsün saiukü noin.

⁷Lo titilünou apaüh thumkü tsüleanau naiuso thatü mongmatkü tsü-iulaau thaiutha asamüh apa hau wankiuau naiuso apa mong losungau noin.

⁸Nungtiphe asamüh apa tü atsüoting tsüojinji ta hanau kojaji.

⁹Asamüh athelu titi jeiluji naiuso jü ayamhan asaita angau khemkü noin süne tsünoi nung ngeloau mongchiokü ngo nung thsam sat.

¹⁰Tilai asamüh amaohaiüh ti chhin nung thaiutha aphio wankiu-e, ngü lüko apa hau wankiuji. Tititenai ngo tilai wankiuji atsüoting naito, ngü alum wankiuau noin ngü nung Khrista khako asam shioko chhiji.

¹¹Biya nou asam tsüthaluwan-iau thaiutha, tiautenai apa ayangtaiu nouso ti noin nung ngeji.

¹²Ngü tilai Khrista Ngem Amei thaiutha Troa ai shin, nungko APAOU nou jü thaiutha chhi chhiau yam sopkü ep.

¹³Lüko ngü jünio Tita tsüeptsün shioko jü onthso nai aalo tsünoiküla. Nungtiphe ngüso ainou apunge ngio chiteküta Makedonia ai khu.

¹⁴Lüko Goa tü nianlom lüthe! Tititenai Khrista ko ajeiai nai Khrista ün ashiolotsün sonthsa nai Goa tsangkü akhothiotsünsoli sam asaichi niakei. Goa nou sam Khrista thaiutha angetsün apemai anyaothing angannyam nyamtsün tsak khekkü shankü lopeng-iau sam kankeiji.

¹⁵Tititenai sauhai kipsanji naiuso sauhai mowanji, ngüso ongko Goa nai sam Khrista angannyam anyaothing noin.

¹⁶Sauhai mowankü noin nungso thaiutha, nung chinyankü nyamtsün tsak noin, lüko sauhai kipsankü noin nungso thaiutha nung aakih kankü shitsün angannyam nyamtsün tsak noin. Naito nungtin chhi shiokü hau sau noin?

¹⁷Sam amaohai piakü sauhaiüh Goa ün ngem chaile uoleli thaluji, nungso khekkü tsüde, lüko Goa nou sam hong, samüh Khrista yathsuotsünsoli apa khako mongchiokü chiteji.