Read Khiamniungan Naga 2 Korint 4 Bible Online

2 Korint 4 - Khiamniungan Naga bible

2 Korint 4

¹Nungtiphe sam Goa nou apa atsüojinyang tsangkü nung chhi chhiau thoilutphe, sam ou tsüchanji.

²Samüh amiam naiuso akao thsanlutkü noitsün apem wanji, alapletsün chhi tsüchhiji, tsüdekünai Goa ngio kausaikü tsükankeiji, lüko samüh ngiotsüo atsangshei sungkü khaiunia apem sansimongai Goa khako sam chija ngiotsüo ta chimji.

³Lüko sam Ngem Amei tsangpoktaiukü noikünai, nung amowantsün khaiunia nouso thaiuthalu tsangpokji.

⁴Ngüsoüh mong tsülam, tiautenai ngüso mongpem nung goumchi angei goa tsangkü anyakhem nai wan. Apaüh ngüso chiai awon thsaluttsün ainou anyakhem nai wan, nung awon Khrista atsüoting Goa khektsün ajinka thaiutha Ngem Amei nou noin.

⁵Tititenai samüh meshen thaiutha tsüchimji, lüko Yisu Khrista APAOU noin ta chimji, naiuso Yisu thaiutha sam asam yathsüotsünso noin ta ngiopengkiuji.

⁶Tititenai “anyakhem ainou awon je-e!” ta Goa nou ngiom, nung Goa nou Khrista kha nai ajinka angetsün awon kiuau thaiutha sam mongai thsalutkiu.

⁷Lüko oukong asong nou sam ainou tsüde, Goa ün theau thaiutha sam sauhaiüh Onthso paopei taim nungso pulakli noin.

⁸Sam yam apemai angja lüko tsüthaloi, soisoileklekü lüko ayangtaiutsün tsüthalao,

⁹Eh piakü noi lüko haimei tsünoikü tilaitso tsünoide; piaküjam tankü tawai lüko, sam tsüthamo.

¹⁰Yisu aa nung sam pem nai atsangshei sungiau thaiutha Apa eantsün asai sam etsün pem nai kankü tsakeiji.

¹¹Sam nung eantsün pem nai Apa aa epsanau thaiutha sam aakih thathonkü Yisu thaiutha eau angja nai asai noin.

¹²Nungtiphe eantsün nou sam da chhiji, lüko aa nou sam da chhiji.

¹³Asiongio nai ngioji, “Ngü monglam, nungshioko ngü chite,” nung onthso amonglam khekkü samüh monglamtsün tsangkü chiteji.

¹⁴Naiuso sauüh APAOU Yisu ahkü shi-in, apaüh sam lüko Yisu ko ahkü shi-i-e naiuso apa khako ha-i-e ta nung samüh ngen.

¹⁵Goa atsüojin tekkü khaiunia dongai shisaoji, naiuso ngüsoüh misao naiuso nianlom kiutsün nou Goa tü ajinka kiu-e, nung chikü asam thaiutha noin.

¹⁶Nungshioko sam ou tsüchanji. Achiai noitsün saisile mowan lüko, sam akheiai noitsün saisile ajekhaiu tsütokü ayan iulakü noin.

¹⁷Nung ehenthso naiuso letletkü thaiutha sam angjatsün tsangkü sam hau thatü songkü naiuso athontsüyangkü ajinka sam angjatsün ta simkü kankü shi-e.

¹⁸Tiautenai samüh niovei nou eptsün jengtsaiu tsüthapji, lüko tsüepkün jengtsaiu tü thapji, tiautenai e-eptsün jengtsaiu jamlu noiji, lüko tsüepkün jengtsaiu asaita noiji.