Read Khiamniungan Naga 2 Korint 5 Bible Online

2 Korint 5 - Khiamniungan Naga bible

2 Korint 5

¹Tititenai sam goumchi ko akihthang, nung nejenkhio lothenai, pha nou tsüshankün Goa ainou sam thaiutha athontsüyangkün tsam tsak aün nai noin ta samüh ngen.

²Nungtiphe sam ayang asong nou nung tsam sübao aün ainou shikü sam chiai taiu-tü ya ta yangji;

³nung ne ten-ikütünai sam pem tsühakü tsünoi-e.

⁴Sam nung goumchi nejenkhio nai kihnai, sam thangmangankü ngetji; nung sam goumchi pem ainou thakhuao sam mongchiotsün tsüde, lüko samüh sam chiai aün ainou tenlut-iau aiuji, nungtiphe sübao eantsün pem noin nung aa nou li-e-ane.

⁵Nung ali-e thaiutha sam sheithotsün nou Goa, apaüh sam hau taiutsün apem kiuau thalokü Onthso kiu.

⁶Nungtiphe sam asaita meikü mongsongkü noin, sam nung pem tsamai noin chikü APAOU ainou pungekü noin ta samüh ngen.

⁷Tititenai sam aa e-eptsün nou tsüde, amonglam nou tsakeiji.

⁸Sam tsam shesinyih pem nai noikü wanau naiuso APAOU ko sam tsamai kiha au mongsongji naiuso mongchioji.

⁹Nungai sam tsamai lüko naiuso aün ai lüko, samüh amao chiai tekkü titilünou apa monglingiau aiuji.

¹⁰Tititenai khaiunia pungkü mih khemau Khrista tsak, khaiunia pungkü nou shesinyih pem amei tsümei tilüsong chhitaiu nung likü eppe.

¹¹Samüh APAOU lon hattsün to ngeji, nung tsangkü amaohai tailoau koweji, sam apemüh ngeji nungti asamüh asam mongpemai ngü ngeji ta yangji.

¹²Samüh loüh sam chija asam ainou nianlom tsüyamji; sam thaiuthabao sam bülomau ayam amei kiuau koweji, nungtiphe apa saisile thaiutha tsüdekü sauhai khaiunia shisileng thaiutha bülomji ngüso tü asamüh thalaau shio-e.

¹³Atsüoting sam mainga süne, nung Goa dongai noin, asam mongtsüokü noin süne, nung asam thaiutha noin.

¹⁴Sam da Khrista atsüojin tsangkü nok-shingji, lo samüh apem thaiutha khaiunia tsak ean ta ngeji, nungüh apa etsün nai chikü haoson noin ta ngioji.

¹⁵Sauhai aa noin ngüso meshen thaiutha aa tsünoi lüko sau ngüso thaiutha ean küta ahkü shin, apa thaiutha ngüso aa noiau noin, nung thaiutha apa apem thaiuthako ean.

¹⁶Naito samüh sau tü khaiunia ange tsangkü mi tsüyamshiji. Atao tsak ko Khrista da samüh khaiunia ange tsangkü mi yamlüko loto samüh tsüyamshi.

¹⁷Nungtiphe khaiunia ajantso Khrista nai noinai apa ayan peksantsün. Akeng to yanlükhuniu, athaplu apem ayan iula-iu.

¹⁸Nungso apem sauüh Khrista tsangkü sam eh noitsün haimei iula-i, naiuso amaohai lüko apa haimei shanau sam hau thsale kiu nung Goa nou chhin.

¹⁹Sam ngiongem to Goa nou khaiunia apem Khrista tsangkü apa haimei iula-iji, naiuso ngüso angei apem wankiuji, naiuso sam apaüh titi haimei iula-iji nung ngioau thsale kiu.

²⁰Nungti Goa nou sam tsangkü asam tü kojaphe, Khrista thaiutha sam APAOU hongthon atengting noin. Samüh Khrista thaiutha asam Goa ko jeiaikü lünoi ta kojaji!

²¹Khrista chaithe tsüsunkü noiküla, lüko sam apa ko jeiaikü noiküta Goa ün asio haoson nai theha-iau Apa sam chaithe nai haoson the-in.