Read Khiamniungan Naga 2 Korint 6 Bible Online

2 Korint 6 - Khiamniungan Naga bible

2 Korint 6

¹Naito sam Goa ko aikü chhitsünsophe, Goa ainou eptsün atsüojinyang yaang nai lawanan ta samüh kojaji.

²Goa nou ti ngioji anglu: “Aiutsün atao nai ngü nitü ang; ‘Tilai ngü asam hachuau thaiutha ajekhaiu shingoi’ ngo asam tü hachu.” Anglu! Goa nou aiutsün aloau atao nou lo noin, lonyi aasanau ajekhaiu noin!

³Samüh sauhaulünou sam chhinai aphio epsan-iau tsüaiu, nungtiphe samüh sau yamai akiap tsütaiukiuau koweji.

⁴Lüko Goa yathsüotsünli samüh apemai meshen chija tinkü noin ta chimji: tsühenyikünai, omhe nai, atheau achek nai, angja nai,

⁵ashiotsün nai, akhothiotsün nai, angemitsün nai, sam chhi phupkü chhi nai, tsüsaikü naiuso tsühekü chhi nai,

⁶ayanthsüo nai, angetsün nai, laiukü kiplotsün nai, atsüojinyang nai, Asio Onthso nai, tsüokü atsüojin nai,

⁷Ngiotsüo ngiotsün nai, Goa oukong nai, uai si tsatai nai, asio sasilaih nai,

⁸ajinka naiuso tsüwesan tsangkü, tsümeikün ngem si amei ngem tsangkü, sam asapthio-itsünli lüko ngiotsüo,

⁹sam sauüh tsüngekünli lüko meikü ngetsün, sam eankü noitsünli lüko athaplu sam aa noin; aluattsünli lüko sam tsüluat;

¹⁰Mongkiatsünli lüko asai monglingkü noitsün, tsosilu haili lüko khaiunia piakü memei iula-itsün, ti tsütaiuli lüko apem taim.

¹¹Korint nai noitsün atsüojin haiso! Samüh sam son songkü sopkü noin; ta samüh asam tü khakhakü ngio-iu.

¹²Sam mongpem asam thaiutha tsükiap; asam mongpem kiaptsün nung asam pem noin.

¹³Asam jüthsosoli noiphe, ngü lo chiteji, samüh asam thaiutha yangtsünli wekü samhau ahan. Asam mongpem songkü asopan!

¹⁴Tsümonglamkünsoko jeiailokü khe aikü lapi. Tititenai angei sei asio tiko jeiaikü tsünoi. Naiuso anyakhem nouko awon tiko jeiaikü tsünoi.

¹⁵Tsüdekünai biya nouko Khrista tiko jeiaikü tsünoi. Tsümonglamkünso ko amonglamhoi tiko ajeiai haoson tsünoi.

¹⁶Naiuso sotsom nouko Goa amkham tsam tiko ajeiai tsünoi. Tititenai sam aa Goa Amkham Tsam! Goa nou apa chija ngiom, “Ngü Jü tsam jü khaiunia ongko shan-e küta ngo ngüso ongko noi-e; ngo ngüso Goa noi-e, naiuso ngüso jü khaiunia noi-e.”

¹⁷Nungtiphe APAOU nou ngioji, “Asamüh ngüso wankü, naiuso ngüso ainou asam chija mothikü sungkü lünoi. Tsüsiokün ti lathantan, nungai ngü asam lo-e.

¹⁸Ngo asam Po iula-e, naiuso asam jü thsoso iula-e ta APAOU Akongting nou ngioji.”