Read Khiamniungan Naga Galatia 2 Bible Online

Galatia 2 - Khiamniungan Naga bible

Galatia 2

¹Nungai pon chekü püle thangoiküta, ngo Barnaba ko Tita lüko niakü müjam Yirusalemai sung.

²Tiautenai Goa nou ngo khu au atsangshei sungkü hantsün shioko khukü Aniakeihoi nousoko tengkhaiu akam tsak nai Melemaohai tü chimtsün Ngem Amei nou chimkü chite. Ngü jü chhi ayanan tao naiuso lo taoko ashio tsüepkü iula-iau tsüaiu.

³Ngüko aikü chhitsün Tita nung Grik hai lüko, apa tü tippanau ajantsoüh aiu lüko

⁴apa ta tsükoja. Amonglamhoi ta tsandekü, nung khaiunia nouso sam Yisu Khrista ko jeiaikü noitsün tsangkü sam da noitsün khaiuniatsüo thaiutha ngeloau sam hoi ongko akausaihaili napkü ha. Ngüsoüh sam Yihudahai Ngiokhem sua iula-iau aiuküla.

⁵Tititenai Ngem Amei ngiotsüo nou asam ko tsülaokü noiau shiokü hau thaiutha, sam jamtso ngüso khemai hau tsü-iula.

⁶Tsotsak niansong thetsünsongüso tilüsong noiküla nung jü thaiutha ti tsüde, Goa nou khaiunia pem tsülusanji -ngü ngioji, sauhai niansong thetsünso ngüsoüh ngo tü ti ayam tsüchim.

⁷Lüko loüh titi atippantsünso thaiutha Ngem Amei nou Peter hau kium, nungti tsütippankünso thaiutha Ngem Amei nou ngo hau lüko kiuwaniu ta, ngüsoüh ngesaniu.

⁸Tititenai Goa oukong nou atippantsünso dongai hongthon theau Peter jon, apaüh ngü lüko Melemaohai dongai hongthon theau jon.

⁹Yakob, Peter naiuso Yohan, sauhai donthe nai thsale kantsünso aniakeihoi noiküla ngüsoüh ngo hau Goa ainou atsüojin chhi mothikü kiu ta ngela: nungtiphe sam apem aikü chhitsünso ta ii hanau ngüsoüh Barnaba naiuso ngoko pha uai tha-e. Barnaba naiuso ngo Melemaohai ongai naiuso ngüso Yihudahai ongai ta chhiau samüh khemlo.

¹⁰Samüh tsosiluhai tü yangsanau noin ta ngüsoüh sam tü koja, naiuso nung chhilu chhiau ngo mongchiokü noiküla.

¹¹Tilai Peter Antiok ai shin, ngü apa tü nyung khako khengshi, tiautenai apa sasakü aphio noiküla.

¹²Tititenai khaiunia ajantso Yakob ainou moshikünai, apaüh Melemaohai ko heshiu, lüko tilai ngüso shin, apa atippantsünso ong ainou hatkü laokü khukü mothikü iula.

¹³Naiuso Yihudahai apem apako mothikü tsakai soikü khu; nai nungti Barnaba lüko ngüsoüh akausai nou shiplükhunan.

¹⁴Lüko tilai ngo ngüso Ngem Amei ngiotsüo nai tsütsakei ta ep, ngü apem khako Peter tü ngiom, “Ni Yihudahai theküta Yihudahaili tsünoikü Melemaohaili noijikünaito, naito Melemaohai tü Yihudahaili noiau ni titi koja-e?”

¹⁵Ngüsoüh jontsünli, sam atsüoting achhitsün tsangkü Yihudahai naiuso “Melemaohai angeihoi,” ta tsüde.

¹⁶Lüko sam Yihuda haiüh Yisu Khrista nai amonglam tsangkülu Goa ko apen noin ta ngen, Ngiokhem mongchiotsün tsangkü chhitsün ti tsünoi. Sam Melemaohai lüko, Yisu Khrista nai amonglam tsangkü Goa ko apen noiau ep, Ngiokhem mongchiotsün tsangkü tsüde. Tititenai saulünou Ngiokhem nou mongchiotsün tsangkü chhi nou Goa ko apen tsüep.

¹⁷Naito, sam chija Khrista ko jeiaikü Goa ko penkü hau yamnai, sam tsüthakü chhitsün, epsanji Melemaohai tü tekkü simkü naito Khristaüh angei yathsüotsün mongchioji süne? Nungti tilaitso tsüde!

¹⁸Tititenai ngü ti lothe nung ngü müjam shansan shinai, ngo jü chija angei kankeitsün ta mitha kiuji.

¹⁹Tititenai Ngiokhem tsangkü nai ngo Ngiokhem nou ta ee ko wekü noin Ngiokhem chija nou ngo nung yamai e-au sung-in tititenai nung ngo Goa thaiutha aa kih-au. Ngo Khrista ko paiphu chiai ee nai lalut-iu.

²⁰Tititenai Nungtiphe ngo loto aa tsünoi, lüko ngo da Khrista aa noiji; naiuso Goa Thso sauüh ngo tsüojin naiuso meshen thumkü jü thaiutha kiu, apa da monglam nou ngo aa noiji.

²¹Ngü khaiunia dongai Goa atsüojinyang hantsün tsüwanan. Lüko khaiunia tsak Goa ko Ngiokhem tsangkü apen noi naito, nungüh Khrista yaang nai e-en ta ngioji!