Read Khiamniungan Naga Galatia 3 Bible Online

Galatia 3 - Khiamniungan Naga bible

Galatia 3

¹Galatiahai, asam mainga! Sauüh asam longa-an? Asam niojemko Yisu Khrista Paiphu nai etsün nou tsangsheikü ngeküla!

²Nung ngio tsaklu ngü asam ainou ngeau aiuji. Asamüh Ngiokhem chhi kankei nou süne, tsüdekünai ngem amei lulaküta monglam nou Onthso lusan?

³Asam nung lektso tsüngekü noin süne? Asamüh Onthso nai yachu; lo nyih nai athapungtsün iula-iji süne?

⁴Asamüh yanjikantsün nou ti athang tsüyang süne? Atsüoting nung yaangting tsüde!

⁵Nungtiphe sauüh asam hau Onthso kiuji naiuso asam ongko athanga chhi chhiji, apaüh asamüh Ngiokhem chhi kankei nou süne, tsüdekünai ngem amei nou lulaküta monglam nou nung kankeiji?

⁶Nungti “Abrahamüh Goa da monglam, naiuso nung tsangkü apa asio ta veha,” ta asiongio nou ngiotsün lüyanglu.

⁷Sauhai amonglam taim ngüso atsüoting Abraham thsoso ta asamüh yangshiau noin.

⁸Asiongio nai, Goa nou Melemaohai apa ko amonglam tsangkü peni-e ta ngiotaim. Naiuso asiongio nai Abraham tü aya Ngem Amei chimkü ngiom: “Ni tsangkü Goa nou khaiuniale apem ouk kiu-e.”

⁹Abrahamüh Goa da monglam, naiuso Goa nou apa ouk kiu, nungtiphe Goa nou Abraham ouk kiutsünli, sauhaiüh apa da monglamji ngüso apem ouk kiuji.

¹⁰Sauhai Ngiokhem kankeitsün tü monglamkü noiji ngüso Goa athesan khemai noin. Tititenai Asiongio nou, “Sauhaiüh asaichi thsam nai satkü taiutsün Ngiokhem pungkü tsükankei-e nung Goa athesan khemai noin ta ngioji!”

¹¹Lüko Ngiokhem nou Goa khako sau tsüpenkiuji ta ngekü noin. “Tititenai amonglam tsangkülu aa kih-e; naiuso Ngiokhem to amonglam nou tsüde.”

¹²Lüko Ngiokhem nou amonglamtsün ko ti chhiau tsünoi. Nunglikoto Asiongio nou ngioji, “Sauhaiüh Ngiokhem nou mongchiotsün apem chhi-e aa kih-e.”

¹³Lüko Khrista sam thaiutha athesan iula nou sam Ngiokhem kankeitsün athesan ainou tuhsan-iu; tititenai asiongio nou ngioji, “Khaiunia sau pai tsak tü lahlutji apa Goa athesan khemai noin.”

¹⁴Khristaüh chhitsün nung Goa nou Abraham tü Melemaohai dongai Yisu Khrista tsangkü ouk kiu-e ta thaloutsün shioko noin, nungtiphe samüh Goa nou thaloutsün Onthso amonglam tsangkü eppe.

¹⁵Jü deisinioso, ngü ajekhaiu pungkü kankeitsün athatlu tsaklu kiuji: Tilai khaiunia nime chhi tsak thaiutha mong tsak hau thekü jeiaikü ngiomongshing ii tsak yangtaiu-e, sauüh nung lopek au tsüshio naiuso nung ta amao phoplutshiau lüko tsüshio.

¹⁶Lo Abraham naiuso apa “le” tü athaloutsün chite. Naiuso Goa nou le nouso tü piaküli tsüchiteji, lüko tsakluli chiteji. Ni nou “le” nou tü nung Khrista noin.

¹⁷Ngü ti yangji nung Goa nou Abraham ko athalou-e tsak shan naiuso nung thalukü taiu. Ngiokhem sübao pon 430 yanküta kiuküla, nung athalou-e alopek au tsüshio naiuso Goa nou thalutsün tsüchhikü wanau tsüshio.

¹⁸Tititenai nung Goa paopei Ngiokhem nou da lu monglam nai, naito apaüh thaloutsün da tsümonglamshi. Tititenai nung apaüh thaloutsün shioko Goa nou nung paopei Abraham hau kiu.

¹⁹Naito, nung Ngiokhem chhi nou ti noiküla? Nung aphio chhitsün ti-in ta hanau noiküla, naiuso nung Abraham thsaosithso shitsün saokü hau nung athaloutsün tsak shan. Nung Ngiokhem nou aün honghoi tsangkü khaiunia tsak ajetko tsakeitsün shankü nung kiu.

²⁰Lüko khaiunia tsaküh kiuwan naito ajetko tsakeitsün khaiunia poukü tsünoi, naiuso Goa nou tsaklu noin.

²¹Nungaito Ngiokhem nou Goa athalutsün thako noin süne? Nungti tilaitso tsüde! Tititenai aa iula-iau shiokü hau Ngiokhem kiukü noinaito, atsüoting nung Ngiokhem tsangkü asio noi-ela.

²²Lüko Asiongio nou ngioji, Goumchi apem chaithe oukong khemai noin; naiuso paopei sübao athaloutsün Yisu Khrista da amonglam chiai tsakü noin nung sauhaiüh monglam ngüso hau kiu.

²³Lüko amonglamao thaiutha atao moshikünai, nung amonglam atsangshei sung-iau thaiutha Ngiokhem nou sam apem akhothiotsün khaiuniahoi li kiapjeikü wan.

²⁴Nungtiphe amonglam nou sam pen-iau thaiutha Khrista moshikün khako Ngiokhem nou sam tü jimtsün yam niatsün iula.

²⁵Lüko loto amonglam shiphe, sam Ngiokhem nou niatsün nai tsütsakei.

²⁶Yisu Khrista da monglamtsün tsangkü asam apem Goa thsoso noin.

²⁷Tititenai asam tititso Khrista nai limkiu, asamüh meshen chija Khrista aa sheithou thoulo-iu.

²⁸Nungko Yihudahai lüko, Grik hai lüko, sua lüko, khaiuniatsüo lüko, pohai lüko, nyiuhai lüko, amomo ti tsünoi; asam apem Yisu Khrista nai tsaklu.

²⁹Asam Khrista sahoi naito, asam Abraham le, athalutsünli asam tengkamtsünso noin.