Read Khiamniungan Naga Galatia 4 Bible Online

Galatia 4 - Khiamniungan Naga bible

Galatia 4

¹Lüko lo methso sauüh apa po teng kamau noin, apa atsüoteng tengkam thalukü noilüko ehen naito apa sua tsak khekkü kankeiji.

²Po nou sonkiutsün atao thalutkü apa ajimtsün khemai noin ta ngü ngioji.

³Nung khekkü sam lüko onthso nai monyankün ataoko goumchi oukong onthso suahoi noiküla.

⁴Tilai atao thapungjikan, Goa nou apa thso hong. Ngiokhem athesan khemai noitsünso shiosanao, naiuso nung tsangkü sam Goa thsoso iula-iau,

⁵apa nyiuhai nou chettsün thso khekkü shin naiuso Yihudahai Ngiokhem khemai kih.

⁶Asam apa thsosophe, Goa nou Onthso sam mongpemai hong; naiuso nung Onthso nou “Aba, Jüpo” ta weji.

⁷Nungtiphe ni loto sua tsüde, lüko Thso, naiuso thso naito ni nung Goa teng kamtsün.

⁸Ayanan taoko asamüh Goa tsünge, nungshioko asam Goa tsüngekünso sua noiküla.

⁹Lüko lo asamüh Goa ngephetsüdekünai Goa nou asam ngephe asam nung goumchi outsükongkün naiuso atheau tsünoikün aya saisile sübao sua iulakü noiküla, nungai asam tiau müjam phokleshiji?

¹⁰Asamüh aje, alei, ah-ou ah-saiu, naiuso pon nouso tü latji.

¹¹Asam thaiutha ngü chhitsün nung yaang chhin süne ta ngü yangelatji?

¹²Deisinioso, ngo khekkü athe ta ngü kojaji. Tititenai ngo lüko asamli iulakü noin. Asamüh ngo tü aphio ti tsüchhi.

¹³Pem nai tsaosilao noiphe, ngü aya asam tü Ngem Amei chim ta asamüh ngen.

¹⁴Jüpem nai ngo tsaosilao asam lilutsün noilüko, asamüh nung tsümei ta tsüyang, tsüdekünai ngo tsüwan; lüko Goa ün hongthonhoili, Khrista Yisuli asamüh ngo lusan.

¹⁵Asam ti nou nungtingkü monglingji? Shiotünto, asamüh asam niovei khupsankü ngo hau kiu-ela ta ngü ngioau shiom.

¹⁶Ngü asam tü ngiotsüo nou ngionai asam eh iulakü noinso?

¹⁷Nungso amao khaiunia nousoüh asam hau thatü mongchiokü han, lüko ngüso mongyang tsümeikü noiküla. Ngüsoüh aiutsünto: asam ngü ainou punge-iau naiuso asam tü mongchiokü noitsünli asam lüko ngüsoko mongchio-iau aiu.

¹⁸Lo athat nou meikünaito, amongchiotsün noiau mei, nung asaita ngiotsüo noin, naiuso ngo asam ko hanailu tsüde.

¹⁹Methsoso! Asam da Khrista moepkün chikü, nyiuhai tsak methso chetnai omhetsünli ngo asam thaiutha ayang nou omheji.

²⁰Lüko lo ngo asam ko ha au naiuso jü saisile li-eau yangkü noiküla, tititenai asam thaiutha ngü yangelatji!

²¹Sauhaiüh Ngiokhem khemai noiau aiuji ngü asam tü sangko: Ngiokhem nou ti ngioji nung asamüh tsüloujiso?

²²Tititenai nung satkü noin, Abraham thso nime, tsak nou sua nyiuhai nou thso naiuso amao tsak nou khaiuniatsüo nyiuhai nou thso noiküla.

²³Abraham thso sua nyiuhai nou tsangkü chettsün nung khaiunia saisile khekkü chet, lüko apa thso khaiuniatsüo nyiuhai tsangkü chettsün nung Goa athaloutsün tsakli chet.

²⁴Nungso athatluau ngiotaim: tititenai nungso nyiuhai athalou-etsün nime noin. Tsak Sinai king ainou shiji, naiuso sua methso chetji.

²⁵Hagar nung Sinai King sübao Arabia nai noitsün thaiutha ko tsaji, naiuso lo noitsün Yirusalem noknio atsom sua khaiuniahoi apem hakü noin.

²⁶Lüko khüthaai noitsün Yirusalem nung khaiuniatsüo noin, nung sam nyiu.

²⁷Tititenai Asiongio nou ngioji, “Ni lun, methso tsüchetkü nou monglingkü lünoi! Ni tilaitso methso chetkia tsüngekün sang songkü vekü lümongling! Tititenai pohai noitsün nyiuhai nouko to, pemsa noitsün nyiuhai tü methso tekkü piakü chet-e.”

²⁸Deisinioso, lo sam Isak li athaloutsün thsoso noin.

²⁹Nung taoko methso sau khaiunia saili chet, nungüh sau Goa Onthso tsangkü chet apa omhe-i; naiuso lo lüko nunglu noin.

³⁰Lüko Asiongio nou ti ngioji? “Sua nyiuhai naiuso apa thso lühongan, tititenai sua nyiuhai nou thsoüh khaiuniatsüo nyiuhai thso nouko tengkam tsükame.”

³¹Nungtiphe deisinioso, sam sua nyiuhai thsoso tsüde, lüko khaiuniatsüo nyiuhai thsoso noin.