Read Khiamniungan Naga Galatia 5 Bible Online

Galatia 5 - Khiamniungan Naga bible

Galatia 5

¹Sam khaiuniatsüo noinKhristaüh sam khaiuniatsüo iula-in! Nungtiphe mongkü lütsa, naiuso müjam sua la-iulashi.

²Anglu! ngü asam tü ngioji, asam chija atippantsün iulanai, Khrista asam thaiutha titso alesan tsünoi.

³Loühjam ngü asam tü lotsüoji, khaiunia ajantso atippantsün iulanai, apa nung Ngiokhem apem angio angau noin.

⁴Asam Ngiokhem nou pen-iau kongtsünso Khrista ainou pungekü noin. Atsüojin ainou asam salikü noin.

⁵Sam thaiutha to Goa nou sam apa ko penkü taiu-e ta sam ayangtsün noin; naiuso Goa Onthso oukong chhitsün tsangkü sam amonglam nung samüh ti ta taiuji nung noin.

⁶Tititenai tilai sam Yisu Khrista ko jeiaikü noin, atippantsün tsüdekünai tsütippankün nou ti le amomo tsünoiji; ti chhi amonglam noin nung atsüojin tsangkü chhiji.

⁷Asamüh meikü chhikü noiküla! Asamüh ngiotsüo nou angio tsüang-iau asam sauüh lolao?

⁸Nung asam jontsün Goa ün chhi tsüde.

⁹“Phoplao thsaothsaokü nou themtsai apem pek-iji.”

¹⁰Lüko ngo losaokü asam thaiutha mong lamkü yangji. Sam aa APAOU ko jeiaikü nou ngo mong lamji, nung asamüh ayang amomo tsünoiau naiuso nung khaiunia sauüh asam soisoileklek-iji, apa saulünou Goa nou angja kiuaulu.

¹¹Lüko deisinioso, atippanau ngio ngü loüh chim nai ngo loüh tiau omhe-iji? Nungai Paiphu dongko thekkat-itsün kankü khu-iu.

¹²Khaiunia sauhaiüh asam yangelat-iji ngüso tü chijakü thsülemanlu-iau ngü mongchioji!

¹³Deisinioso, khaiuniatsüo thaiutha asam jon, lüko nung khaiuniatsüo asam nyih mongchiotsünli chhiau lakankei-i, lüko atsüojin nou haisihai lüyathsüo-e.

¹⁴Tititenai Ngio tsak ko Ngiokhem apem shinapji; naiuso nung ngio nou nung: “Ni aphaosipo tü meshenli lütsüojin.”

¹⁵Lüko asam haisihai ne tsao-e naito, kia-etsün naiuso tsaksitsak angja kiu-ekü naito lütsüolo, tsüdekünai asam tsaksitsak moisemkü lothean-e.

¹⁶Lüko ngü asam tü ngioji: asam aakih onthso nou lüniakei-i, naito asamüh nyih mongchiotsün tsüshinapi-e.

¹⁷Tititenai nyih nou mongchiotsün Onthso thako, naiuso Onthso nou mongchiotsün nyih thako, tiautenai nung ne eh noin, naiuso asamüh ti chhiau aiuji nung chhiau tsüshioji.

¹⁸Lüko asam Onthso nou nia naito, asam Ngiokhem khemai tsünoi.

¹⁹Naiuso nyih chhi nungso tsangsheikü sungkü noin: tsütsamtsütsüo, tsüyanthsüokün, mewop;

²⁰sotsom amtsün, enyiu chhi, chinyanetsün, misingem, athapau tsüaiutsün, mongmattsün, meshen thaiuthalu yangtsün, ajanpai, atsüotsüdekü chimtsün,

²¹achinektsün, thengtuk, haikam; sauhaiüh nungtin kankei-e ngüsoüh Goa nokshing tengkam tsüeppe ta ngü titi asam kümei nai lotsüo, nungti lo lüko ngü asam lotsüoji.

²²Lüko Onthso eiu nungso noin: atsüojin, amongling, aalo, akiplu, amongmei, amei, monglamtsün,

²³meshen chija thatsangloutsün, nungso khengai Ngiokhem tsünoi.

²⁴Naiuso sauhai Khrista Yisu sahoi ngüsoüh nyih nou mongchiotsün naiuso mewop, paiphu nai lalutkü wananiu.

²⁵Onthso nou sam hau aa nou kiu-iu, loüh nungti Onthso nou sam tsakei-ela.

²⁶Samüh haisihai ne lamongmate-iko, achinek nai lakoweko, tsüdekünai lanoi-iko.