Read Khiamniungan Naga Ephesa 1 Bible Online

Ephesa 1 - Khiamniungan Naga bible

Ephesa 1

¹Paul, Goa nou mongchiotsün tsangkü Yisu Khrista hongthon tsak ainou Ephesa nai noitsün asiohoi aa Khrista nai aikü monglamkü noinso dongai:

²Sam Po Goa naiuso APAOU Yisu Khrista ainou asam dongai atsüojin naiuso aalo lünoi.

³Sam APAOU Yisu Khrista naiuso Po nou Goa tü nianlom kiuko! Tititenai sam Khrista nouko aikü noi nou apaüh sam hau aün anoithang nai Onthso ouk apem kiu-iu.

⁴Goumchi moshankünai yakü, Goa nou sam Khrista ko aikü apa ün theau chosankü wan, nungshioko sam apa khako aphio tsülepkü asio noi-e. Apa atsüojin shioko,

⁵Goa nou sam Khrista tsangkü apa thsoso theau khemtaiutsün nung apaüh mongchiotsün naiuso athattaiu noiküla,

⁶tititenai amaitsüyang atsüojin ajinka paopei thaiutha apa atsüojin Thso nai kium, samüh apa nian lomko!

⁷Tititenai Khrista etsün tsangkü sam khaiuniatsüo iula-iu, nungüh sam chaithe nouso wankiu-iu. Goa atsüojin ti chantso!

⁸nungh apaüh sam hau mongyang naiuso angetsün athat ngoikü kiutsün apem noin.

⁹Goa nou apaüh ti yangtaiu nung chhin, naiuso Khrista tsangkü apaüh sam hau athapungtsün akau mongyang yangtaiutsün nge-in.

¹⁰Nung athattaiu Khrista khaiu thekü goumchi nai naiuso aün ai alum ashantaiu nou aikü kamshiau atao saojikan nai Goa nou thapungkiu-e.

¹¹Apem Goa nou athattaiu naiuso ashantaiu lingkü shan-iu; ayating ainou apaüh ti shantaiu, nung chikü Khrista nai apa ayangtaiu atengting apaüh sam apa khaiunia theau chosan.

¹²Nungtiphe samüh Khrista nai sauhai ayating ayang noin Goa ajinka nian lomko!

¹³Naiuso asamüh lüko ngiotsüo ngio nou, nungti asam aasan ngem amei lulaphe asamüh Khrista da monglamji, nungtiphe athaloutsün Asio Onthso nou asam da Khrista nai ii thanglut.

¹⁴Goa nou ti apa khaiuniaso tü shantaiu, nung Asio Onthso samüh epau noitsün tengkam noin, naiuso Goa nou sauhai apa ün ngüso khaiuniatsüo thapungkiu-e nung samüh tsangsheiji. Samüh apa ajinka nian lomko!

¹⁵Nungkoko ngü loüh APAOU Yisu da asam amonglam thaiutha naiuso asiohoi apem thaiutha asam atsüojin lulaphe,

¹⁶ngü misao nai asam nian jonkü asam thaiutha tsülaokü nianlom kiuji

¹⁷naiuso sam APAOU Yisu Khrista Goa, ajinka Po nou apa thaiutha ngetsün nai mongyang naiuso atsangshei sungtsün Onthso nou asam hau kiu-e ta ngü misao saoji.

¹⁸Apaüh sam jontsün nai apa ti ayangtaiu noin, naiuso asiohoi hau apa tengkam ajinka naiuso jengtsaiu ti,

¹⁹naiuso sam sauhaiüh Goa titi monglamji, oukong chhitsün asong samko noin. Nung oukong sam da chhitsün nung akhengteng oukong ko wekü noin.

²⁰Nung oukong Khrista ee ainou ahkü shi-iküta aün nokshing nai apa uai moknoi-in.

²¹Khristaüh nungai aün nokshinghoi apem khaiuai, nokpaohoi apem khaiuai, oukonghoi apem khaiuai, naiuso APAOU nouso apem khaiuai nokshinge, nung goumchi ko naiuso ashiau noitsün goumchi ko, nokpao nokshing niansong apem khaiuai, apa niansong noi-e.

²²Goa nou Khrista hok khemai apem taiu, naiuso donthe thaiutha apem khaiuko apa khaiu iula.

²³Donthe nung apa pem, naiuso sauüh nung apemko apem thawao-iji apa athapungtsün donthe.