Read Khiamniungan Naga Ephesa 3 Bible Online

Ephesa 3 - Khiamniungan Naga bible

Ephesa 3

¹Ngo, Paul, asam Melemao nouso thaiutha Khrista nai akhothiotsün nou Goa tü misaoji.

²Asam meiau thaiutha Goa nou apa atsüojin nai nung chhi ngü hau kium ta asamüh lula-iu.

³Atsangshei sungtsün akaungio nou ngü tü nge-itsün nung (ngü kümei ngio thsaothsaokü nou sat;

⁴naiuso asamüh ngü ti sat nung venaito, Khrista akaungio thaiutha ngo ngelatsün ngeloau shio-e.)

⁵Nung akaungio nou lo Onthso nai apa asio hongthon nouso naiuso E-po nouso tü atsangshei sungtsünli amao vetaoko khaiuniathsoso tü tsüngela-ikü noiküla.

⁶Naiuso nung akaungio nou nung noin: Ngem Amei tsangkü Khrista Yisu nai Melemao nouso sam ko tengkamtsünso, naiuso nung pem nouko hakü athaloutsün wekü lotsünso noin.

⁷Nung Ngem Amei thaiutha Goa nou mothikü oukong chhitsünli ngü hau kiutsün Goa atsüojin nou ngo ayathsüotsün iula.

⁸Khrista ün tsüngesankün jengtsaiu Melemaohai tü chimau, asiohoi apem ongko ehenting nou tü ehentso ngüli nou hau nung atsüojin kiu.

⁹Naiuso khaiunia apemüh Goa akaungio titi noin nung alesan chhi nai taiuau shio-e. Goa sau apem shantsün noin, apaüh ayanan atsangtaiutsün apem taim,

¹⁰apa mongyang asong lotaoko donthe tsangkü aün anoithang nai aün hongthon nokshing nouso naiuso oukong nouso tü nge-iau thaiutha kiu.

¹¹Goa athontsüyang mongthatli, sübao apaüh sam APAOU Yisu Khrista nai epsan.

¹²Khrista nai apa da sam amonglam tsangkü sam thatü yangtsün nou mongsong naiuso Goa dongai shi-itsün sam taim.

¹³Asam monghenkü lanoi, tititenai ngo asam thaiutha omhe, nung asam apem thaiutha alesan noin ta ngo kojaji.

¹⁴Nung thaiutha ngo Po, nou khako kauji,

¹⁵sau ainou aün ai naiuso goumchi ko tsamkhaiu pungkü niantsüo nou epji.

¹⁶Apa ajinka jengtsaiuli, apa Onthso tsangkü asam akhei Onthso nai apa oukong nou asam oukong-iau thaiutha ngo Goa tü sang.

¹⁷Amonglam tsangkü asam mongai Khristaüh apa tsam shanau ngü misao saoji, asam atsüojin nai eiu saokü mongkü tsakü hau ngü misao saoji.

¹⁸Nungtiphe asamüh Goa khaiunia nouso apemko aikü, Khrista atsüojin titi apun naiuso atheng titi atsok naiuso titi aokü noin nung ngeau oukong eppe.

¹⁹Ah, apem to tilaitso ngeau tsüshio, asamüh apa atsüojin ngekü shi-e naiuso Goa athapungtsün nou tongtü mian-e.

²⁰Sam da chhitsün oukongli, sam sauüh ayangtsün apem chiai tekkü chhiau naiuso yangau shioji.

²¹Apa tü donthe nai naiuso Yisu Khrista nai ajinka vetao apem nai athontsüyangkü lünoi! Amen.