Read Khiamniungan Naga Ephesa 4 Bible Online

Ephesa 4 - Khiamniungan Naga bible

Ephesa 4

¹Apaüh tilai asam jon, Goa ün sakshi tsoithat nouko ngoikü kih au, APAOU yathsüotsün thaiuthako akhothiotsün nai noitsün ngo asam tü kojaji.

²Asaichi amongmei, atsamlotsün, mongau laiu, atsüojin naiuso ajeilotsün nou tsaküh tsak tü hankü lünoi.

³Onthso nou aalo kiutsün tsangkü asam tsak hau kamshikü jeiaikü taiuau thatü lükoje.

⁴Pem tsak naiuso Onthso tsak noin, nungti asam lüko ajontsün mongyang tsak nai jon.

⁵APAOU tsak, Amonglam tsak, alimtsün tsak,

⁶sam chikü Goa naiuso Po tsak, apa apem khaiuko naiuso apem tsangkü chhiji naiuso apem ko noin.

⁷Khrista paopei athatsan yangkü sam pungkü hau momo omtso atsüojin kiu.

⁸Asiongio nou ngiotsünli, “Tilai apa atsokting nai koiai sungh, apaüh sua khaiunia piakü apako nialo, naiuso apaüh khaiuniale hau paopei nouso kiu.”

⁹Lo, “apa koiai sungtsün” nung ti athat? Nung apa chong akheiting goumchi nai ehentingau thekü saotsün athat noin.

¹⁰Nungtiphe sau goumchi apem apa noitsün nou mian-iau koi ainou saom, nung tsaklu nou aün atsokting nai lüko yankü sungh.

¹¹Apaüh ajantso hongthon au, ajantso E-po au, ajantso achim au, ajantso Pastor au, naiuso ajantso atsande au thiokiu, nung apaüh “khaiunia le au paopei kiutsün apa noiküla.”

¹²Apaüh nung asiohoi donthe atuntsün chhi thaiutha khemtaiuau naiuso Khrista pem mongkü lahsanau chhin.

¹³Nungtiphe sam apem amonglam nai, naiuso Goa Thso ngetsün nai tsak hau kamshikü thenaito, Khrista athapungtsün atsokting nou sungyapkü sam ashehoi au iula-e.

¹⁴Sam loto methsoli tsünoi-e, tsüdekünai achimtsün ahsheih pungkü nou tsüsheilükhuni-e, tsüdekünai khaiunia laple akoitsün naiuso phiokü atsüotsüdekü chimtsün nou tsopkü khusishi ta tsüthe-e.

¹⁵Lüko atsüojin nai ngiotsüo chitekü alumai apa da sam sung-e, apa khaiu noin, nung Khrista;

¹⁶naiuso apa da pem apem jeiaikü kelutekü, oujei pungkü nou kiutsün, oujei pungkü momo chhi chhitsünli pem nou meshen chija atsüojin nai sung-iji.

¹⁷Nung thaiuthako Melemaohaiüh meshen mong songtsünko tsakeitsünli asam loüh tsütsakeiau thaiutha ngü nung ngiokü APAOU nai lotsüokiuji.

¹⁸Ngüso meshen da tsüngekün noikü mong kongphe, ngüsoüh ngesantsün anyakhem iulakü Goa ün aa ainou ngüso pungekü noin.

¹⁹Ngüso mongtsükiukü iulakü; tsüyanthsüokün apem kankeiau ngüso mongchiotsün shioko, ngüso meshen chija abülom hau thumkü kiuwan.

²⁰Asamüh Khrista ngelotsün nungti tsüde!

²¹Asamüh ngiotsüo nung apa da lulakü noi naito, naiuso Yisu da noitsün ngiotsüo nou apa da hankü noi naito,

²²asam kümei aa khaiunia akeng, sübao laple mongchiotsünli mowanji, nung lüwan,

²³naiuso asam mong Onthso nai ayan iulakü,

²⁴khaiunia ayan sau Goa khektsün nai ngiotsüo, amei naiuso asio nai shansaniu, nung lütholo.

²⁵Nungtiphe tsütsüokü chitetsün wankü, khaiunia pungkü meshen phaosipo nouko ngiotsüo lüchite, tititenai pem tsak nouko sam oujei tsak tsak noin.

²⁶Mongmat sungkü angei lakankei. Ni mongmat sungtsün tao chikü mongko aje nou lanappi.

²⁷Tsüdekünai biya hau anoithang lakiu.

²⁸Sauüh kaukü noiküla, apaüh loto lakaushi, lüko pokü noitsün khaiunia hau kiuau thaiutha, apaüh meshen pha nou ti chhi amei nung lüchhi.

²⁹Asam son ainou ngio tsümeikü tsaklu lüko lasung-i. Lüko atheauli ti ashanlutau thaiutha amei noin, alulatsün hau atsüojin kiuau nung lüchite.

³⁰Goa Asio Onthso sau da akipsanau ajekhaiu thaiutha ii nou thanglut, apa lamongmat-i.

³¹Aküo apem, naiuso mongmat sungtsün, ahatsün, angemtsün, alutsaotsün, naiuso chinyantsün apem asam mong ainou lüpunge-i.

³²Haisihai ne tsüojinekü mongmeikü lünoi, naiuso Goa nou Khrista nai asam aphio titi wankiu, nungti asamüh lüko tsaküh tsak hau aphio lüwankiu-e.