Read Khiamniungan Naga Ephesa 5 Bible Online

Ephesa 5 - Khiamniungan Naga bible

Ephesa 5

¹Asam Goa ün atsüojin thsosophe, asam sakshi Goa khekkü theau lükowe.

²Naiuso Khristaüh titi asam tsüojin, naiuso angannyam anyaothing chaithioli Goa hau meshen chija sam thaiutha thumkü, nungti asamüh atsüojin nai lütsakei.

³Lüko asam ongko tinkü asiohoili, tsütsamtsütsüo naiuso tsüyanthsüokün apem, tsüdekünai alutsüaiukü nou lasung-i.

⁴Tsümeikün, tsüthakü chitetsün, alonyai sübao ayam tsüde, lasingio-i; lüko Goa hau nianlom lükiu.

⁵Sau tsütsamtsütsüo, tsüyanthsüo, tsüdekünai achinek, (achinektsün nungto sotsom amtsün noin), nungüh tilaitso Khrista naiuso Goa nokshing nai tengkam tsüeppe ta asamüh ngen.

⁶Sau haulünou yaang ngio nou asam lasapthio-i, tititenai nungso thaiutha angio tsüangkün thsoso ta Goa mongmat sungtsün shiji.

⁷Nungtiphe nungtin khaiunia nousoko hakü tilaitso lachhi.

⁸Tititenai asam jam anyakhem aakih nai noiküla, lüko lo APAOU nai asam awon noin. Awon thsosoli lütsakei.

⁹Tititenai awon chhi nou amei, asio, naiuso ngiotsüo amongling be-eiuyam kanjikanji.

¹⁰APAOU nung ti-in nou mongling-iji nung ngeloau lükong.

¹¹Eiu tsü eiukün anyakhem chhi nouko lahai, lüko nungso tü lüthut. Nunglikoto ngüso awon nai lüniasan.

¹²(Ngüsoüh akauai kankeitsün chhi nouso thaiutha chiteau lüko nung atsüoting thatü amiam noin.)

¹³Naiuso tilai alumtso awon nai kankü shi-e, nungaih ngüso akihthang atsüo nou tsangsheikü hanji.

¹⁴Tititenai tilüsongtso tsangsheikü sungji nung awon iulaji. Nungshioko nung ngiokü noin: “Asailatsün achu, naiuso ee ainou ahkü ashi, nungko Khrista asam da awonkiu-e.”

¹⁵Nungtiphe asam titi tsakeiji tsüokü lüthap, mongthat tsümeikünli tsüde, lüko mongthat ameihaili lütsakei.

¹⁶Atao amei apem atuhlowan, tititenai ajekhaiu nouso tsümeikü noin.

¹⁷Nungtiphe tsüngekün lathe, lüko APAOU mong ti noin nung lüngelo.

¹⁸Theng sübao nou asam lotheau noin, nungüh latukkat, lüko Onthso nou miankü lünoi.

¹⁹Nianlom jih, asio jih, naiuso Onthso jih nai chitekü, jih amei sangh songkü mong apem nou APAOU tü lühang.

²⁰Asaita Po nou Goa tü sam APAOU Yisu Khrista nian nai apem thaiutha nianlom lükiu.

²¹Khrista hatsün nai meshen chija tsaküh tsak khemai lünoi.

²²Tsammongnyiu nouso, APAOU tüli meshen tsammongpo nouso khemai lünoi.

²³Tititenai Khrista apa chija aasantsün noikü donthe khaiu noin, nungti tsammongpo nou tsammongnyiu khaiu noin.

²⁴Lüko titi donthe nou Khrista khemai noin, nungti tsammongnyiu nou apemai tsammongpo khemai lünoi.

²⁵Tsammongpo nouso, Khristaüh donthe noutü apa aa kiukü tsüojintsünli meshen tsammongnyiu nouso tü lütsüojin.

²⁶Donthe nou Goa tü apa ngio tsangkü khiam pengkütün phiai yanthsüokü tsaowantsünli losiokiuau nung apaüh chhin.

²⁷Aphio tsülepkü, alengsat tsüpokü, ajengnengneng tsüdekünai tsüthapungkün tsünoikü asio thekü donthe nou apa khako alengmei pokü noiau thaiutha apaüh chhin.

²⁸Tsammongpo nousoüh meshen pem tsüojintsünli meshen tsammongnyiuso tü tsüojinau noin. Sauüh meshen tsammongnyiu tü tsüojinji, apaüh meshen chija tsüojinji.

²⁹(Saulünou meshen nyih tilaitso tsüchinyanji. Nungliko apaüh nung Khristaüh donthe tü paotsangtsünli tsadkü paotsangji;

³⁰tititenai sam apa pem oujei noin.)

³¹Asiongio nou ngiotsünli, “nung thaiuthako khaiunia tsaküh meshen posinyiu wane küta meshen tsammongnyiu ko mong kiukü noi-e, naiuso loto ngüne nyih tsakhaulu iula-e.”

³²Nung Asiongio nouko Khrista naiuso donthe thaiutha sübao akau ngiotsüoting aokü tsak atsangshei sungkü hanji ta ngü ngelaji.

³³Nungti asam khaiunia pungkü nou meshenli meshen tsammongnyiu tü lütsüojin, naiuso tsammongnyiu nou meshen tsammongpo asu lühat.