Read Khiamniungan Naga Ephesa 6 Bible Online

Ephesa 6 - Khiamniungan Naga bible

Ephesa 6

¹Methsoso, APAOU nai asamüh meshen posinyiu tü angio lü-ang, tititenai nung ayamteng.

²“Apo si anyiu nelun asu lühat, nung athaloutsün hakü nou aya ngiokhem noin.

³Nung asam goumchi nai aakihlaiu laiukü kih au naiuso asam ouk noiau.”

⁴Po nouso, asamüh meshen thsoso mongkiakü mongmat lasung-i. Nunglikoto APAOU nou chimtsün naiuso lotsüotsün nai ngüso lüniasan.

⁵Sua nouso, asamüh Khrista yathsuotsünli asam mongpem saitha nou APAOU nouso tü ahat naiuso angaongao nai angio lü-ang.

⁶Tilai khaiunia nou asam tü thappe, nungailu to asamüh lachhi, tiautenai asamüh ngüso mongleng-iau aiuji, lüko Khrista sua nousoühli Goa nou ti mongchioji nung asam mong apem nou lüchhi.

⁷Asamüh APAOU yathsüojiphe, khaiunia tüli tsüde, lüko sua nousoüh mongchiokü chhitsünli lüchhi.

⁸Sua tsüdekünai khaiuniatsüo sauhai lünou apaüh chhi amei chhitsün thaiutha APAOU nou khaiunia pungkü hau paopei kiu-e ta lüyang.

⁹APAOU nouso, nungti asamüh lüko ngüso tü lüchhi. Ngüso naiuso asam APAOU aün ai noin ta, naiuso apaüh khaiunia tü phaphi phamong tsükankeiji ta ngekü ngüso lalohat.

¹⁰Athon nai asam asongting oukong tsangkü APAOU nouko aikü oulükong.

¹¹Asamüh biya nou sapthio-itsün thako tsaloau shiokü hau Goa nou asam hau kiutsün ehli sheitho apem lütholu,

¹²Tititenai sam khaiunia thako tsüliheji lüko ahwem nai akausai angei onthso oukong thako, nokshing nouso thako, nokpao nokshing nouso thako, naiuso nung anyakhem goumchi oukong nouso thako liheji.

¹³Nungtiphe Goa ün ehli sheitho nouso lo lütholu! Naito tilai tsümeikün ajekhaiu shi-e, asamüh ehoi nou komtsün shio-e, naiuso athon saokü ehlihekütün phiai lüko asam tsakülu noi-e.

¹⁴Nungtiphe ngiotsüo nou asam omthsa jenkü thsaküta, naiuso asio son nekhut kongnai khutkü khemlokü,

¹⁵aalu Ngem Amei pungpengau akhemlotsün hokkhut khutkü lütsa.

¹⁶Nung khengai loüh amonglam shii, sübao nou asamüh tsümeikün ün in suntsün lonyatau shio-e nung asaichi lükan.

¹⁷Naiuso aasan son kandio naiuso onthso sah, sübao Goa Ngio noin, nungso lülo.

¹⁸Nung chhi apem misao nai Goa ahachu saokü lüchhi; Onthso yam niatsünli atao pungkü misao lüsao. Nungkoko tilaitso tsülaowankü asio khaiuniahoi thaiutha asaichi misao nai thsümonkü lünoi.

¹⁹Naiuso Goa nou tilai ngü hau ngio kiu-e, ngü khemloküta mongsongkü apa akaungio ngem amei ngela-ikü chimau jü thaiutha lüko misao asaokiu.

²⁰Tititenai loto ngo akhothiotsün nai noi lüko, nung Ngem Amei thaiutha ngo APAOU hongthon atengting tsak noin. Ngü chitenai ayamli Ngem Amei mongsongkü chimau thaiutha asamüh misao lüsao.

²¹APAOU yathsüotsün chhi nai monglamtsün atsüojin nai sam deisinio Taikikasüh jü thaiutha ngio apem asam hau chite-e, nungaih asamüh ngo titi noin nung nge-e.

²²Nungkoko sam apem titi noin ta chiteau naiuso asam mong losongau ngü asam dongai apa hongji.

²³Po nou Goa, naiuso APAOU Yisu Khrista ainou deisiniohoi dongai amonglam nouko aalu naiuso atsüojin lüthe.

²⁴Sauhaiüh sam APAOU Yisu Khrista atsüoting tsüojinji ngüso apem khaiuko athon tsüyangkün atsüojin lünoi.