Read Khiamniungan Naga Philipi 1 Bible Online

Philipi 1 - Khiamniungan Naga bible

Philipi 1

¹Yisu Khrista yathsüotsün Paul naiuso Timothi ainou Yisu Khrista ko jeiaikü Philipi nai noitsün Goa khaiuniahoi naiuso ajimtsünso si dikonhoi apem dongai:

²Sam Po Goa naiuso APAOU Yisu Khristaüh asam hau atsüojin naiuso aalu lükiu.

³Ngü asam yangtsün nou atao pungkü jü Goa hau nianlom kiuji;

⁴naiuso asam apem thaiutha atao pungkü ngü amongling nai misao saoji,

⁵tiautenai ayating ajekhaiu ainou lonyi saokü ngü chhitsün ngem amei nouko asamüh ngo tü hachu.

⁶Tititenai Goa sauüh asam tü chhi amei yachun, apaüh Yisu Khrista ajekhaiu saokü nunglu thapungkiu-e ta ngü monglamji.

⁷Asam asaita jü mongai noin! Nungtiphe asam thaiutha ngü nung chhiau ayamting noin ta yangji. Tititenai asam apem ngoko Goa nou kiutsün haoson janelutsün noin: naiuso nung Ngem Amei thaiutha tsatsün nai ngo lo akhotsamai noin.

⁸Khrista atsüojinyang nai ngo asam thaiutha titi mongthonkü yangji nung mitha Goa noin.

⁹Ngiotsüo angetsün naiuso athapungtsün mikhem nouko kamkü asam atsüojin tekkü singkü hau ngü tsülaotingkü misao saoji,

¹⁰nung tsangkü asamüh ti ameiting noin nung shingloau shio-e. Nungaito asam Khrista ajekhaiu tsüsiokün naiuso alochi apem ainou thakhu-e.

¹¹Goa nianlom naiuso ajinka thaiutha asam aa nung tisübao ameiting saisile Yisu Khrista ainou lu noin nung ngiotsüo nou mian-e.

¹²Loüh deisinioso, jüdongai ti atsangshei sung, nung Ngem Amei tekkü nok miankü iula ta, ngü asam hau nge-iau aiuji.

¹³Mikhemtsün tsam apemai naiuso amaohai apoi chikü tü ngo ketsün Khrista thaiutha noin ta atsangshei sung,

¹⁴naiuso APAOU nai deisinio apia ngo ketsün nou Goa Ngio tsühatkü chiteau tekkü mongsongkü iulaji.

¹⁵Ajantsoüh niokia naiuso athappau tsüaiukü alihetsün nou Khrista Ngio chimji, lüko ajantsoühto atsüoting ayang nai chimji.

¹⁶Nungso lüko atsüojin ainou chhiji, tiautenai Goa nou Ngem Amei chhi soluau ngo hau kiu ta ngüsoüh ngen.

¹⁷Lüko amaohaiüh ngo ketsün nai tekkü angja kiuau yangkü ngiotsüo nou tsüdekü ajan pektsün nou Khrista thipengkiuji.

¹⁸Nungüh ti tsüde! Nunglu akausai sai lüko, atsüoting nai lüko apemai Khrista thipeng kiunaito nungko ngo monglingji, naiuso loüh monglinge.

¹⁹Tititenai asamüh kojatsün tsangkü naiuso Yisu Khrista Onthso nou kiutsün tsangkü ngo sokshi-e.

²⁰Nungtiphe ngü thatü mongkiakü yangtsünli, ngü ti amiam tsüeppe, lüko mongsongtsün apem nou, asaitali aa nou lüko, eantsün nou lüko, lo lüko jüpem nai Khrista song-iji.

²¹Tititenai jüthaiutha aa noitsün Khrista, naiuso eeau nou alesan noin.

²²Lüko ngo tsülaokü aakih nai, ngü chhi amei apia chhiau shio-e, nungai ngü sübao singlo-e nung ngü tsünge.

²³Nung nime jetko ngo soisoileklekkü noin, tititenai ngo pungekü khukü Khrista ko noiau aiuji; nung thatü ameiting.

²⁴Lüko ngo asam thaiutha nyih nai aa noiau tekkü poukü noin.

²⁵Ngo asam ko noi-e ta meikü ngen. Asam amonglam nai amongling singkü khu-iau ngo asam apemko noiha-e.

²⁶Nungaito ngo tilai asamko mejam ha-e, asam aa Khrista Yisu nai jeiaikü asam ngo shioko tekkü bülome.

²⁷Lo asam atengting aakihyam nung Khrista Ngem Amei nou mongchiotsün theau noin, nungai ngo khukü asam epau shioba tsüshioba, ngü asam mongyang tsak kolu mongkü tsann ta lu-e, nungshiokolu asam Ngem Amei amonglam nai aikü ehliau mongchiosan.

²⁸Asam eh nouso lun lahat, asaita mongsongkü lüthe, naito nungüh ngüsoüh tsüdekü asamüh shio-e, nung mitha ngüso tü hanne, tiautenai asam hau ashiotsün nung Goa noin.

²⁹Khrista da monglamtsün nailu tsüde, lüko loüh apa thaiutha angjatsün nai lüko asam hau haoson kiu.

³⁰Lo asamüh ehlitsün nai ngoko haoson theau shio. Asamüh kümi ngo ehlikü eptsün nung ehli tsaklu wekü noin, naiuso ngo losaokü ehlitsün asamüh luhji.